Yeremia 16 - Baibuli Ekibono kya Katonda 2014

Musengwa Katonda akobera Yeremia nga bw'ali n'okwebisa

¹ Agho Musengwa Katonda yankoba ati:

² “Ng'oli mu kifo kino otabayiza mukazi era otazaala baana.

³ Ndidha kukukobera ekija okuba ku baana abazaalibwa mu kifo kino, ni ku bazaire baibwe:

⁴ Baja kufanga endwaire embi einho, era ghazira aja kubalira waire okubaziika. Emirambo gyaibwe gija kubanga ku itaka okwo ng'oti mmungo ya busa. Baja kwitibwanga mu ntalo oba balambukenga endhala bafe, n'emirambo gyaibwe giriibwenga enhonhi n'ensolo dh'omu nsiko.

⁵ “Otangiranga mu ndhu omuli abali kulira abafu. Otajangayo kubalirisaaku waire okubagumya. Abantu abo, nze Musengwa Katonda, nabatoolaku emiraala gyange, naalekera agho okubagonzanga n'okubasaasiranga.

⁶ Abantu ababbede beene n'abo abasembayo ghansi balifiira mu nsi eno aye ghaabulagho omuntu abaziika oba abalira, nga yeesalasala ku mubiri gwe, oba ng'amwa enviiri gha mberi ku mutwe gwe gwaba ng'oti gwa mpaata olw'okunakughala.

⁷ Tighalibaagho atwalira mulizi kya kulya okumugumya ng'afiiriirwa, waire okumusaasira n'amugha eky'okunhwa ni bw'aliba ng'afiiriirwa ise oba inhina.

⁸ “Era otangiranga mu ndhu omuli abali ku mbaga, n'otyama nabo okulya n'okunhwa nabo.

⁹ Wulirisa bukalamu, nze Musengwa Katonda Afuga Amagye era Katonda wa Isiraeli, bye ndi kubakoba: Bona, ndidha kulekeza amamiro ag'abali mu binhumo ni mu kusagamba galobe kuwulirwaku naire, ndekeze n'emizira gy'abo abali mu mbaga dh'obugole. Ekyo nja kukikola nga n'imwe mukaali balamu era nga mubona.

¹⁰ “Bw'onaakobera abantu ebintu ebyo byonabyona, baidha kukubuuza bati, ‘Lwaki Musengwa Katonda alangiriire akabi akanene katyo okututuukaku? Twiziiza musango ki? Era kibi ki kye tukoze eri Musengwa Katonda waife?’

¹¹ Agho iwe oidha kubakoba oti, ‘Badhaadha baimwe banvaaku baaja ye bakatonda abandi, baabagheerezanga era baabasinzanga. Nze baaneerabira baaloba kukuuma mateeka gange.

¹² Aye imwe mukoze bubi n'okusinga badhaadha baimwe abo. Buli muntu ku imwe akola ebyo omwoyo gwe omukalangufu era omubi bye gwenda, yaaloba okumpulira.

¹³ Kyenva ndidha okubatoola mu nsi eno, mbasuule mu nsi imwe beene ni badhaadha baimwe ye mutawulirangaku naire. Eyo ye mwidha okubanga nga mugheereza bakatonda ab'amaghanga agandi omusana n'obwire. Era tija kubagemerwanga kivunika naire.’

Abantu baira okuva mu bunhage

¹⁴ “Musengwa Katonda yaakoba ati, ekiseera kiri kwidha, mube nga timukaalayira mu liina lyange nga Katonda omulamu eyatoola Abaisiraeli mu nsi Misiri.

¹⁵ Aye mulayirenga mu liina lyange nga Katonda omulamu eyatoola Abaisiraeli mu nsi eri ku luuyi lw'omukono omugooda olw'e buvandhuba, ni mu nsi edhindi dhoonadhoona ye nali mbabingiire kuba nja kubaiza mu nsi yaibwe ye nagha badhaadha baibwe. Nze Musengwa Katonda, ninze nkobye.”

Ekibonerezo ekiri kwidha

¹⁶ Musengwa Katonda akoba ati: “Bona, nze nja kwetesa abavubi kamaala, baje bavube abantu abo ng'oti byanhandha. Memale kabiri ndhetese abayiizi kamaala, baje babayiige ng'oti nsolo ku buli lusozi, ni ku buli kasozi, ni mu buli mpuku eri mu lwatika lw'olubaale.

¹⁷ Buli kye bakola nkibona, ghazira kye basobola kungisa. Buli kibi kye bakola nkibona bukalamu.

¹⁸ Nja kubabonereza nga mbeesasuulizaaku emikuzi ebiri olw'okwonoona kwaibwe n'ebibi byaibwe kuba baayonoona ensi yange baagireetamu ebisinzibwa byaibwe ebitali Katonda ebyenhinhalwa ebiri ng'oti bwa mirambo, era bagiidhuza emisambwa.”

Yeremia yeesiga Musengwa

¹⁹ Wo Musengwa Katonda, niiwe amaani gange era niiwe onkuuma; niiwe onhamba mu biseera ebizibu. Amaghanga galiva mu buli nsonda y'ensi, gaidha y'oli, gaakoba gati: “Badhaadha baife tibaali na Katonda, aye baali na bisinzibwa ebitali Katonda, ebintu obuntu ebiziramu muganhulo naire.

²⁰ Bwenebwene omuntu asobola okwekolera mwene bakatonda ababe? Busa naire, ebintu omuntu by'akola obukole tibiba Katonda mwene.”

²¹ Musengwa Katonda akoba ati: “Kale ni bona, amaghanga ago ndigooleka obuyinza bwange n'amaani gange, omukuzi mulala guti aye nga gumala. Era galimanha nga ninze Musengwa Katonda.”