Yeremia 15 - Baibuli Ekibono kya Katonda 2014

Akabi akaja okutuuka ku Bayudaaya

¹ Agho Musengwa Katonda yankoba ati: “Musa ni Samueli ni bwe bandyemereire ghano ninze, okuwolereza abantu abo ye ndi, era nze tinandisaasiire bantu abo naire. Babinge baje, banve mu maiso.

² Bwe bakubuuza ye babe baje, bakobe oti nze Musengwa Katonda nkobye nti, ‘Ab'okufa endwaire ya kawumpuli, baje eri endwaire ya kawumpuli. Ab'okufiira mu lutalo, baje eri olutalo. Ab'okufa endhala, baje eri endhala. Ab'okutwalibwa mu busibe, baje mu busibe.’

³ ‘Nze Musengwa Katonda ndidha kubataaku eby'okubazikiriza bina: olutalo lwidha kubaita, embwa dhiyuzeyuze emirambo gyaibwe, enhonhi dhibamoodhogole, n'ensolo edh'omu nsiko dhibakankamire okubamalagho.

⁴ Ndidha kubafuula ekintu ekitiisa einho abantu boonaboona ku nsi, olw'ebyo Manasse mutabane wa Hezekia bye yakola mu Yerusalemu nga ni kyabazinga wa Buyudaaya.’

⁵ “Musengwa Katonda akoba ati: ‘Imwe abantu bange ab'e Yerusalemu, naani alibasaasira? Naani aliwulira enaku olwaimwe? Naani alikyukira ewaimwe ababuuze okumanha embeera ye mulimu?

⁶ Imwe mwanvaaku, mwaja mu bye mwalimu eira. Kale zeena n'okugolola omukono ni mbazikiriza; kuba nkooye okubasaasiranga.

⁷ Mu buli kibuga eky'omu nsi eno, imwe abantu bange nabasensa n'olugali ng'oti n'ole asensa engaano enkube, empewo n'efuuwa ere ebiwusu byaku. Naita abaana baimwe, niimwe abantu bange naabazikiriza, olw'okuba mwaloba okukyuka ni muva mu mpisa dhaimwe embi.

⁸ Ensi yaimwe nagyongeramu banamwandu bangi, okusinga n'omusenho oguba ku mbali kw'enhandha. Naitira abaisuka baimwe mu maani ghagati, bainhaibwe enaku yaabaluma. Nabasindikira obulumi n'okutya nga tibabyetegekeire naire.

⁹ Omukazi eyazaala abaana omusanvu aziriike, amaani gaamuwaamu. Abona nzikiiza waire nga bukaali musana. Ensoni dhimugemye yaaswala. Abo abaliba nga bakaasigairegho ku imwe, ndibaleka abazigu baabaita. Nze Musengwa Katonda, ninze nkobye.”

Yeremia yeemuluguunhiza Musengwa

¹⁰ Ye nga nkagwireku nze Yeremia! Maama yanzaalira ki ku nsi kuno? Ku nsi kuno ndi n'okusoola era n'okutakana n'abantu boonaboona. Tiwolangaku muntu, waire nze mwene okwewola ku muntu yeenayeena, aye ate abantu boonaboona bankolimira.

¹¹ Aa, Musengwa Katonda, kale ka kibe kityo, ebikolimo byaibwe bingeme, bwemba nga tyakugheereza bukalamu, era bwemba nga tyewolerezaagho muzigu mu biseera ebizibu era eby'obulumi.

¹² Ka mbuuzeeku: Ghaligho omuntu asobola okumenha ekintu eky'ekyuma ekigumu einho, ekyuma ekigumu einho kye batabwiremu ekikomo, nga kiva ere ku luuyi olw'omukono omugooda olw'e buvandhuba?

¹³ Musengwa Katonda yankoba ati: “Eby'obukombe n'ebintu eby'omughendo eby'abantu bange, nja kubighaayo abazigu babinhage olw'okusasulamu ebibi ebingi bye bakoze mu nsi eno.

¹⁴ Nja kubafuula bagheereza ba bazigu baibwe eyo mu nsi ye bataidhi naire, kuba obusungu bwange butumbwike ng'oti muliro era tiguja kuzikira.”

¹⁵ Agho naakoba Musengwa Katonda nti: “Wo Musengwa Katonda, iwe ondidhi! Nkusaba ondidhukire oidhe onhambe, oneesasuulizeegho ku abo abankiriga. Otabaguminkiriza kubagha kaghagaanhia ka kundhita. Oteerabira nga buliidho banvuma ku lulwo.

¹⁶ Wo Musengwa Katonda Afuga Amagye, Iwe wayogera ninze, naawulirisa buli kibono kye wakoba. Ekyo kyaleetera omwoyo gwange okusanhuukirira; kuba nze ndi wuwo.

¹⁷ Tibangaku na bantu ku binhumo mu kusagamba. Aye nabanga agho zenka nga njiira ku biragiro byo, nga ndidhwire obusungu.

¹⁸ Lwaki obulumi bwange bweyongera bweyongere? Lwaki eibwa lyange lifuuse lya kokolo, ni litawona? Oyenda kunfuukira ng'oti n'akaiga akateesigika, akakala mu biseera by'endoboozi? Oba ng'oti n'amaadhi agaloba okugwa mu biseera ebituufu?”

¹⁹ Agho Musengwa Katonda yankoba ati: “Bw'onaira ye ndi, zeena ndidha kukwiza obe wange ompeerezenga. Bw'onaalekera okwogera ebiziramu makulu, n'oyogeranga eby'amakulu, oidha kwiramu okuba omulanzi wange. Abantu baidha kwidhanga y'oli, se ti iwe okujanga ye bali.

²⁰ Ndidha kukufuula obe ye bali ng'oti kimante ekigumu eky'ekyuma eky'ekikomo. Balikulwanisa aye tibalikughangula, kuba ndidha kubanga ghalala niiwe okukukuuma n'okukuwonia ebizibu.

²¹ Ndikutoola mu buyinza bw'ababi, era naakuwonia abakambwe balobe kukukola kabi. Nze Musengwa Katonda, ninze nkobye.”