Yeremia 14 - Baibuli Ekibono kya Katonda 2014

Endoboozi enkakali

¹ Bino Musengwa Katonda bye yakobera Yeremia nga bigema ku ndoboozi, ati:

² “Ensi Buyudaaya eri mu kulira, ebibuga byamu biri kufaagho. Abantu baamu balambaala ku itaka olw'okunakughala. N'ab'omu Yerusalemu baawowoola ebitaloodheka.

³ Abakungu batuma abagheereza baibwe banone amaadhi. Abagheereza baaja baatuuka ku bidiba aye baayagaana nga muziramu maadhi; baira n'ensugha dhaibwe nga nkaya. Ensoni dhaabagema, beeghemba mu maiso nga baswaire.

⁴ Abalimi basoberwa, beeghemba mu maiso nga baswaire, olw'amaadhi obutagwa eitaka ni libbalanguka.

⁵ N'empongo erekulira eyo mu nsiko enhanha ye yaakamala okuzaala, olw'okubulwa eisubi.

⁶ N'endogoyi edh'omu nsiko dheemerera ghaigulu ku nsozi, dhaalakalaka nga dhaasaamiriire ng'oti bibe, dhaaloba kubona ku ka kulya naire.

⁷ Abantu bange bandirira bati, ‘Wo Musengwa Katonda, waire ebibi byaife bitulumiriza olw'okukuvaaku emikuzi kamaala ni twonoona, iwe mala gaganha otuyambe nga bwe watusuubiza.

⁸ Niiwe wenka eisuubi ly'Abaisiraeli; niiwe otuwonia mu biseera ebizibu. Lwaki oba mu nsi yaife ng'oti n'omuntu omusenze obusenze, era ng'oti n'omugeni omubise asula obw'olunaku olulala lwonka?

⁹ Lwaki oba ng'omuntu asobeirwa, era n'oba ng'omulwani ow'amaani aye atasobola kutuwonia naire? Ate nga bwenebwene iwe Musengwa oli mu ife. Ife tuli bantu bo, otatulekulira agho.’ ”

¹⁰ Abantu abo Musengwa Katonda abairamu ati: “Abantu bange benda inho okunvaaku, baaloba kwefuga naire. Zeena kyenva ni ntabasiima naire, era ndidha kwegemerera ensobi dhaibwe, mbabonereze olw'ebibi byaibwe.”

¹¹ Agho Musengwa Katonda yankoba ati: “Yeremia, otadaaga kusabira bantu bano nze kubayamba.

¹² Ni bwe banaasiiba, nze tija kuwulirisa bye bansaba nga bandirira. Era ni bwe banampanga ebigheebwayo ebyokebwa n'ebigheebwayo eby'emere y'empeke, nze tiidha kubasiimanga. Aye ndidha bwa kubazikiriza mu ntalo era mbasindikire endhala n'endwaire ya kawumpuli bibaite.”

¹³ Nze naakoba nti: “Aa, Musengwa Katonda waife, abalanzi bakobera abantu abo bati, ‘Tighaja kubaagho lutalo waire endhala, kuba mbu iwe wasuubiza oti ghaidha kubangagho miraala myereere mu nsi yaife.’ ”

¹⁴ Aye Musengwa Katonda yankoba ati: “Abalanzi abo balanga bya buguya mu liina lyange. Nze tibatumangaku oba okubalagira ekintu kyonakyona, waire okwogera nabo. Okubonekerwa kwe boogeraku kwa buguya, ni bye balagula biziramu makulu, babiyiiya buyiiye beene.

¹⁵ Agho ni, nze Musengwa Katonda ka nkukobere kye nja okukola abalanzi abo be ntatumangaku, aye ate ni balanga mu liina lyange nga bakoba mbu tighaja kubaagho lutalo waire endhala mu nsi eno: Ndidha kubazikiriza mu lutalo era mbasindikire endhala ebaite.

¹⁶ N'abantu be bakobera obulanzi obwo boona baliitibwa mu nsambo n'endala. Emirambo gyaibwe, ghalala n'egya bakazi baibwe, n'egya batabane baibwe ni baghala baibwe, gija kusuulibwa mu nguudo dha Yerusalemu, nga ghazira na muntu agiziika mu nsambo eyo mbeesasuulizeeku olw'ebibi byaibwe.”

¹⁷ Agho Musengwa Katonda yandagira okukobera abantu enaku yange nti: “Amaziga ka gakuuluule okunva mu maiso omusana n'obwire aghazira kulekera, kuba abantu bange bafumitiibwa ebibwa ebinene era baalumizibwa inho.

¹⁸ Bwentambula ni njaaku eyo mu byalo, mbona mirambo gy'abaitirwa mu lutalo. Bwenhingira mu bibuga, mbona bantu bali kulambuka ndhala. Abalanzi ni bakabona bakola emirimo gyaibwe nga buliidho mu nsi, aye bazira kye baidhi.”

Abantu beewolerezaayo ye Musengwa Katonda abawonie

¹⁹ Wo Musengwa Katonda, obwo Abayudaaya wabaviiraku irala, waakyagha abantu b'e Sioni? Lwaki watulumya n'otutaaku ebibwa otyo, ni tutasobola kuwonezebwa? Twasuubira okufuna emiraala, aye ghazira kalungi ke twafunamu. Era twasuubira okufuna ekiseera eky'okuwonezebwa, aye bona, twafuna bwa bitutiisa.

²⁰ Wo Musengwa Katonda, bwenebwene twayonoona y'oli, twikiriza ebibi ebyaife era n'ebya badhaadha baife.

²¹ Idhukira bye watusuubiza olobe kutusuula bw'ere. Otaswaza Yerusalemu ekifo eky'ekitiisa ekibaamu ekityamo kyo eky'obwakyabazinga. Otamenhagho ndagaano ye wakola n'ife.

²² Ku bakatonda ab'amaghanga agandi abaziramu makulu, ghaligho asobola okugwisa amaadhi? N'eigulu ku bwalyo lyonka lisobola okutoonhesa waire obw'olumiiyirizi? Ti niiwe Musengwa Katonda waife? Eisuubi lyaife lyonalyona liri mu iwe, kuba niiwe okola ebintu ebyo byonabyona.