Yeremia 12 - Baibuli Ekibono kya Katonda 2014

Yeremia abuuza Musengwa Katonda ebibuuzo

¹ Wo Musengwa Katonda, ni bwentakana niiwe, niiwe oba omutuufu. Aye era ka nkubuuze ebigema ku kukola mu butuufu. Lwaki abakozi b'ebibi ebintu bibajiira bukalamu? Lwaki abakupankupania bali mu miraala?

² Oja waabasimba ng'oti bisimbe baasimba emizi. Baakula baatuuka okubala ebibala. Buliidho baakwogerangaku bukalamu, waire nga bwenebwene tibakufaaku.

³ Wo Musengwa Katonda, aye iwe nze ondidhi bukalamu, oneekebeedha wambona nga bwe nfaanana. Kwekwebya abantu ababi abo obatoolegho, ng'oti n'omuntu bw'atwala entaama edh'okwita. Era obakuume okutuusa ng'ekiseera kyaibwe eky'okwitibwa kituuse.

⁴ Ensi yaife erituusa li okukala, n'eisubi lyamu lyonalyona okuniala? Ensolo n'enhonhi dhiri kufa, olw'obubi bw'abantu baife abo abakoba bati: “Katonda tabona bye tukola.”

Musengwa Katonda airamu ebibuuzo bya Yeremia

⁵ Musengwa Katonda yaakoba ati: “Yeremia, oba nga okulumuka n'ab'ebigere kukukooyiiza, onaasobola otya okulumuka n'abali ku mbalaasi? Oba nga tosobola kwemerera ghantu ghatereevu nga togwire, olikola otya bw'oliba mu kibira ky'oku mwiga Yorudani?

⁶ Abantu bo beene b'oba nabo aghalala n'ab'ekika kyo, baakuliiremu olukwe. Beeyimbye n'abo abakukiriga. Otabeesiganga ni bweboogera ebiwooma bitya.”

Musengwa Katonda enaku emugema olw'abantu be

⁷ Musengwa Katonda akoba ati: “Ndekuliire agho Abaisiraeli, eighanga eryo lye neerondera ndiviireku. Abantu abo be ngonza einho mbaghaireyo mu ngalo dh'abazigu baibwe.

⁸ Abantu bange be neerondera banfuukiire ng'oti mpologoma bw'ewologomera mu kibira, bankaabukira nga banvuma. Kyenviire ni mbakyagha.

⁹ Abantu bange be neerondera bali ng'oti n'enhonhi erumbiibwa ensega ku ndhuyi dhoonadhoona. Ja oyete ensolo edh'omu nsiko dhoonadhoona dhiidhe dhirye.

¹⁰ Abafuzi kamaala boonoine eisamba, eisamba lyange eryo ery'emizabbibu, baatyankirira obulime bwange. Ensi yange enungi bagirese bw'agho etyo, ng'eri bwa bifulukwa byereere omutaba bantu.

¹¹ Bagifiire bifulukwa byereere omuzira kalungi ke mbonaku. Ensi eyo yoonayoona efuuse irungu, aye ghazira na muntu afaayo naire.

¹² Abanhazi babisebise mu nsozi dhoonadhoona edh'omu irungu edhiziraku kantu. Nze Musengwa Katonda nsindiike olutalo okuzikiriza ensi eyo yoonayoona. Era ghazira muntu ali mu miraala.

¹³ Abantu bange baasiga engaano, aye baakungula mawa. Baafaabiikana inho, aye baaloba kufunamu muganhulo. Baaswala olw'obutabaagho ke bafunamu, kuba obusungu bwange obubitirivu bwabalemeesa.”

Musengwa Katonda bye yasuubiza amaghanga agaliiraine Isiraeli

¹⁴ Agho Musengwa Katonda yaakoba ati: “Kino kye ndidha okukola ab'omu maghanga agaliiraine Isiraeli agoonoona ensi ye nagha abantu bange Abaisiraeli. Ndidha kubatoola mu nsi dhaibwe, ng'oti n'omuntu bw'aiwululagho ekisimbe n'emizi gyakyo. Era ndiwonia Abayudaaya naabatoola mu ngalo dh'abantu abo ababi.

¹⁵ Aye bwendimala okubatoola mu nsi dhaibwe, ndiiramu okubagemerwa ekivunika, naiza buli ighanga mu kiketezo kyalyo ni mu nsi yaalyo.

¹⁶ Ate bwebalyega empisa dh'abantu bange n'omwoyo omulala, ni balayiranga mu liina lyange bati, ‘Nga Musengwa Katonda bw'ali omulamu,’ nga bwe baayegeresa abantu bange okulayiranga omusambwa Baali, olwo boona baliba bantu bange, n'ebintu biribajiiranga bukalamu.

¹⁷ Aye eighanga lyonalyona eritalingondera nja kulitoola mu nsi yaalyo, ng'oti n'omuntu bw'aiwululagho ekisimbe n'emizi gyakyo. Era nja kulizikiriza. Nze Musengwa Katonda, ninze nkobye.”