Yeremia 10 - Baibuli Ekibono kya Katonda 2014

Okusinza ebitali Katonda, n'okusinza Katonda mwene

¹ Imwe Abaisiraeli, muwulire Musengwa Katonda by'ali kubakoba.

² Musengwa Katonda oyo akoba ati: “Mutayeganga mpisa dha bamaghanga gandi. Mutatyanga olw'obumanhiso obubabonekera ku igulu waire nga abamaghanga agandi babutya.

³ Empisa edh'abamaghanga ago muzira muganhulo. Omuntu aja yaatema omuti mu kibira, omubaadhi yaatoola ebyuma yaagubaadhamu ekifaananie n'engalo dhe.

⁴ Abantu baakinhiriza ni feeza ni zaabu, era baakikomereramu emisumaali n'enhundo, kirobe kugwa.

⁵ Ebifaananie byaibwe ebyo biri ng'oti ni bire bye bata mu nimiro okutiisa enhonhi. Tibisobola kwogera. Era tibisobola kutambula, babibbeeda bubbeede. Mutabityanga naire, kuba ghazira kabi ke bisobola kubakola, waire okuba n'akalungi ke bisobola okubakolera.”

⁶ Wo Musengwa Katonda, ghazira ali ng'oti niiwe. Oli mukologho, n'eriina lyo lyona ikologho era lya maani.

⁷ Naani asobola obutakutya, iwe kyabazinga ow'amaghanga goonagoona? Bwenebwene ogwaniire okutiibwanga, kuba mu bagezi boonaboona abali mu maghanga goonagoona ni mu bwakyabazinga bwaibwe bwonabwona, muzira ali ng'oti niiwe.

⁸ Abo boonaboona basiru era baziramu kategeera, kuba bazira kye basobola kwegera ku bifaananie ebyo eby'ekiti obuti.

⁹ Ebifaananie ebyo baabirimbyaku feeza ye baatoola e Tarushishi, ni zaabu ye baatoola mu Ufazi. Era abagheesi b'ebintu bya zaabu n'abakola ebifaananie ebyo n'obukugu. Baabivaaza engoye dha langi ya bbululu n'edh'eya nakasooma, edhaakolebwa abalusi b'engoye abakugu.

¹⁰ Aye iwe Musengwa Katonda, niiwe Katonda mwenemwene, niiwe Katonda omulamu era kyabazinga ow'ebyanda n'ebyanda. Bw'osungughala ensi etengeeta, era amaghanga goonagoona tigasobola kugumira kiruyi kyo.

¹¹ Iwe Musengwa Katonda kyova n'okoba oti: “Emisambwa egyo ti n'egyakola eigulu n'ensi, era gija kuzikirizibwa give ku nsi ni ghansi gh'eigulu.”

Olwembo olusaaka Katonda

¹² Musengwa Katonda n'eyakola ensi n'obuyinza bwe, yaataagho eby'oku nsi n'amagezi ge, era yaabamba eigulu n'okutegeera kwe.

¹³ Bw'alagira, amaadhi ku igulu gadudumuka, era asitusa olufu ku ndhuyi dhoonadhoona edh'ensi. Aleetera olukuba okughemya ng'amaadhi gali kugwa, era yaatoolayo empewo mu materekero ge, yaagireeta.

¹⁴ Olwo abantu boonaboona baaba nga basirughaire era nga tibakaalimu kategeera. Buli mugheesi wa bintu bya zaabu yaaswala olw'ebifaananie ebisinzibwa by'agheesa; kuba bya buguya bwereere, era biziramu bulamu naire.

¹⁵ Biziramu muganhulo era bya buguya bwereere. Ku lunaku Musengwa Katonda lw'alibisaliraku omusango okubisinga, bija kuzikirira.

¹⁶ Aye Katonda wa Yakobo tali ng'oti ni byene, kuba n'eyakola ebintu byonabyona. Era yaalonda Isiraeli okuba eighanga erirye ku bubwe. Eriina lye ni Musengwa Katonda Afuga Amagye.

Yeremia alanga abantu okutwalibwa mu bunhage

¹⁷ Imwe abantu ab'omu Yerusalemu, musibe emigugu, kuba abazigu babazingiiza.

¹⁸ Musengwa Katonda akoba ati: “Bona eno, ku luno ndi kuja kuwoloba ere abantu b'omu nsi eno, ng'oti bali bwa mu nsuumulo. Ndidha kubaleetera enaku ebalume ebitaloodheka.”

¹⁹ Agho abantu bairamu bati: “Tukagwireku okufumitibwa ebibwa tuti. Batutaireku ebibwa ebitaja kuwona. Aye tuzira kya kukoba: enaku eno etutuuseeku tuteekwa kugigumira.

²⁰ Eweema dhaife badhoonoine, n'emigugha egidhibamba gyonagyona gikutwike. Abaana baife batuviireku, tibakaaligho. Ghazira muntu wa kutubambira weema dhaife, na kudhitaamu nsuubo dhaamu.”

²¹ Nze naabakoba nti: “Abakulembeze baife basiru, tibeebuuzaaku ku Musengwa Katonda. Kyova ebintu ni bitabajiira bukalamu, n'abantu be batwala ni basansaana obusansaane.

²² Wulira oluvuuvuumo luli kwidha. Ghaligho akabuguutano nga kava mu nsi eri ku luuyi olw'omukono omugooda olw'e buvandhuba. Eigye lyayo lija kufuula ebibuga bya Buyudaaya bifulukwa byereere, omuba obw'ebibe.”

²³ Wo Musengwa Katonda, ndidhi nti ghazira muntu ali na buyinza ku bulamu bwe, waire okuba n'obusobozi obubukuuma.

²⁴ Lamba abantu bo balongooke empisa, aye otabakayukira inho, oba okubabonereza mu busungu; kuba agho oba otusaaniagho busaanie.

²⁵ Kyukiza obusungu bwo ku maghanga agatakusinza, ni ku bantu abo abaloba okukugondera; kuba baatwita ife abantu bo, baatuzikiriza okutumaliriragho, era baaleka ensi yaife ng'eri bifulukwa byereere.