Yeremia 1 - Baibuli Ekibono kya Katonda 2014

Yeremia

¹ Bino n'ebibono Yeremia bye yayogera. Yeremia oyo yali mutabane wa Hilikia, eyali owundi ku bakabona ab'e Anathothi mu kiketezo kya Benjamini.

² Musengwa Katonda yayogera ni Yeremia mu mwaka ogweikumi n'esatu (13) ogwa kyabazinga Yosia mutabane wa Amoni, eyali nga n'afuga Buyudaaya mu kiseera ekyo

³ Era Musengwa Katonda yairamu okwogera ni Yeremia nga Yehoiakimu mutabane wa Yosia ni kyabazinga wa Buyudaaya. Kabiri era yeeyongera okwogeranga naye okutuukiza irala mu mwaka ogweikumi n'omulala (11) ogw'obufuzi bwa kyabazinga Zedekia owa Buyudaaya. Mu mwaka ogwo, mu mwezi ogwokutaanu, abantu ab'omu Yerusalemu baatwalibwa mu bunhage.

Okwetebwa kwa Yeremia

⁴ Agho Musengwa Katonda yankoba ati:

⁵ “Nakulonda nga nkaali na kukuwumba mu nda ya inhoko. Era wali okaali kuzaalibwa naakutukuza naakulonda obe mulanzi eri amaghanga.”

⁶ Nze naakoba nti: “Aa, Musengwa Katonda wange, bona eno, nze tiidhi kwogera kuba nkaali muto inho.”

⁷ Aye Musengwa Katonda yankoba ati: “Otakoba oti okaali muto inho. Aye oidha kuja eri abantu eyo yoonayoona ye nnaakutuma, obakobere byonabyona bye nnaakulagira okwogera.

⁸ “Otatya muntu yeenayeena, kuba nze ndi ghalala n'iwe okukukuumanga. Nze Musengwa Katonda, ninze nkobye.”

⁹ Agho Musengwa Katonda yaagolola omukono gwe, yangema ku munwa. Yankoba ati: “Bona eno, nkutaire mu kanwa mwo, ebibono byange by'onaayogera.

¹⁰ Olwaleero luno, nkugemiisa amaghanga n'obwakyabazinga, oiwululengagho era omenhemenhenga, ozikirizenga era osaaniengagho ozimbenga era osimbenga.”

Okubonekerwa okw'emikuzi ebiri

¹¹ Agho Musengwa Katonda yambuuza ati: “Yeremia, oli kubona ki?” Naamwiramu nti: “Ndi kubona olusaga olw'omuti omwalumondi.”

¹² Musengwa Katonda yankoba ati: “Oboine bukalamu, kuba ndi kwetegereza inho ekibono kyange kye nja okutuukiriza.”

¹³ Kabiri Musengwa Katonda yambuuza omukuzi ogwokubiri, ati: “Oli kubona ki?” Naamwiramu nti: “Ndi kubona entamu eri kutogota, ng'eri ku luuyi olw'omukono omugooda olw'e buvandhuba era nga yeeghendhekeire eruuyi eno.”

¹⁴ Agho Musengwa Katonda yankoba ati: “Akabi kaliva ku luuyi olw'omukono omugooda olw'e buvandhuba, kaatuuka ku bantu boonaboona ababa mu kiketezo kino.

¹⁵ Bona eno, ndyeta abantu b'omu bwakyabazinga bw'eyo ku luuyi olw'omukono omugooda olw'e buvandhuba. Bakyabazinga baayo baliidha baata ebityamo byaibwe eby'obwakyabazinga ku miryango gy'e Yerusalemu, n'okwezunguluza ebimante ebikiriku, era n'okwezunguluza ebibuga ebindi eby'omu Buyudaaya.

¹⁶ Ndisalira abantu bange omusango gwabasinga olw'obubi bwaibwe; kuba banvaaku baaniokeza bakatonda abandi obubbaani, era baasinza ebintu bye baakola beene n'engalo dhaibwe.

¹⁷ Iwe mperaano situkiramu, weesibe weenhweze, oje obakobe ebyo byonabyona bye nnaakulagira okubakoba. Otabatya naire, tiikulwa nga nkutiisa nga bali kubona, ng'ojiire ye bali.

¹⁸ “Bona eno, olwaleero nkufiire ng'oti n'ekibuga ekyezungulwirwa ebimante ebigumu, oba ng'oti n'empango eyakolebwa mu kyuma ekigumu einho, oba ng'oti n'ekisenge ekyakolebwa mu kyuma eky'ekikomo olwanise bakyabazinga ba Buyudaaya, n'abakungu baayo, ni bakabona baayo, era n'abantu baayo boonaboona.

¹⁹ Balikulwanisa, aye tibalikughangula kuba nze ndi ghalala n'iwe okukukuumanga. Nze Musengwa Katonda, ninze nkobye.”