Yakobo 5 - Baibuli Ekibono kya Katonda 2014

Okulabula abakombe

¹ Muwulire ni kino imwe abakombe, mulire amaziga era muwologome olw'okudaagadaaga okuli kubaidhira.

² Eby'obukombe byaimwe biwumbu, ni bye muvaire byaliibwa ebisiisa.

³ Zaabu waimwe ni feeza byatalaiga, era obutalaivu obwo n'obuja okubalumiriza busiriize emibiri gyaimwe ng'oti muliro, kuba mu nnaku dhino edhisembayo mwesololeizaaku eby'obukombe.

⁴ Muwulire, okulira kw'abakozi abaakola mu nimiro dhaimwe ni mutabagha mpeera yaibwe olw'obulyase bwaimwe. Muwulire, n'okulira okw'abantu abaabatoolera ebirime mu nimiro kwatuuka mu kutu wa Musengwa Afuga Amagye.

⁵ Ku nsi kuno mubaire mu bulamu obw'okudiibuula n'okwesanhusa. Mugeedheire olunaku lule olw'okwitibwa.

⁶ Omuntu azira musango mwamusalira omusango okumusinga, mwamwita. Tiyaghaghaana!

Okuguminkiriza n'okusaba

⁷ Baganda bange, muguminkirize okutuusa Musengwa lw'aliira. Mubonere ku mulimi bw'ateegerera eitaka lye okumugha amakungula ag'omugaso. Ateegerera amaadhi amatoigo n'amasambya.

⁸ Mwena muguminkirize. Mutawaamu isuubi kuba olunaku Musengwa lw'aliira luli kumpi.

⁹ Aboluganda, mutaduuduumanga nga mwogeraganaku kino oba kire, olwo lwe mutalisalirwa musango. Mwidhukire ng'omusazi w'omusango tabali ghala.

¹⁰ Aboluganda, mubonere ku balanzi abaayogeranga mu liina lya Musengwa, abaadaazibwadaazibwa era ni baguminkiriza.

¹¹ Abantu abo abaaguminkiriza tubeeta ba nkabi. Imwe mwawulira obuguminkiriza bwa Yobu era mwabona ni Musengwa bye yamukolera ku nkomerero, kuba Musengwa wa kisa era musaasizi.

¹² Aye ekikulu ekisinga byonabyona, aboluganda, mutalayiranga igulu, waire ensi, oba ekintu ekindi kyonakyona. Bwe mukobanga muti “Yii” kibenga yii era bwe mukobanga muti “Busa” kibenga busa Katonda alobe kubasalira musango kubasinga.

¹³ Ghaligho mu imwe adaagadaaga? Kale asabe Katonda. Ghaligho omusangaavu? Kale ayembe enhembo edhisaaka Katonda.

¹⁴ Ghaligho mu imwe omulwaire? Ayete abakulembeze ab'Ekikunsu eky'Abaikiriza mu Kurisito bamusabire, era bamusiige omuzigo mu liina lya Musengwa.

¹⁵ Okusaba okwo nga kukoleibwa n'okwikiriza, kuliwonia omulwaire oyo. Musengwa alimugologosa era bwe ghalibaagho ebibi bye yakola birisoniyibwa.

¹⁶ Kale ni buli muntu akoberenga baine ebibi bye mwene, era musabiraganenga, muwonezebwe. Okusaba okw'omutuukirivu kuli n'amaani mangi.

¹⁷ Eliya yali muntu buntu ng'oti niife. Yasaba inho amaadhi galobe kugwa era emyaka gyabitagho esatu n'emyezi mukaaga ng'ezira liidhi litoonha ku nsi.

¹⁸ Kabiri yaasaba, amaadhi gaagwa, eitaka lyatoolera okukulaku ebimera.

¹⁹ Aboluganda, owundi ku imwe bw'adaaliima n'ava ku mazima, memale omuntu owundi n'amwiza,

²⁰ oyo amwiziiza ali n'okumanha ati: kiisi atoola mukozi wa bibi mu ngira ye ensobu, aja kuwonia omwoyo ogw'omukozi ow'ebibi oyo okufa era ebibi bye olukunkumuli bisoniyibwe.