Yakobo 4 - Baibuli Ekibono kya Katonda 2014

Mutabanga bakagwa ba nsi

¹ Biki ebibaleetera okulwanalwana n'okusoolasoola? N'okwegomba okw'emibiri gyaimwe okulwanira mu imwe?

² Bwe muba ni kye mwenda ni mutakifuna ng'olwo mwita. Bwe mwegomba ni mutafuna ng'olwo musoola era nga mulwana. Timufuna kye mwenda kuba timukisaba Katonda.

³ Bwe musaba timufuna lwa kuba musobya mu kusaba kwaimwe nga mwenda okwigusa okwegomba kwaimwe kwonka.

⁴ Ye bano abatatya Katonda! Timwidhi ng'okuba bakagwa b'ensi kitegeeza kuba bazigu ba Katonda? Kiisi ayenda kuba mukagwa wa nsi aba yeefiire muzigu wa Katonda.

⁵ Oba mudhuuba muti ekyaghandiikibwa kino ti kituufu ekikoba kiti: “Katonda ali n'enkikidi ku mwoyo gwe yatutaamu.”

⁶ Aye atwoleka ekisa kye okusingagho, ekyaghandiikibwa kye kiva ni kikoba kiti: “Katonda atakania abeekudumbaza, aye abeewooya abooleka ekisa kye.”

⁷ Kale ni mugondere Katonda, aye Sitaani mumutakanie, aidha kubalumuka.

⁸ Museete kumpi ni Katonda, yeena aidha kuseeta kumpi n'imwe. Munaabe mu ngalo dhaimwe mwetukuze imwe abakozi b'ebibi. Mutukuze emyoyo gyaimwe imwe abaguya.

⁹ Munakughale era mulire; enseko dhifuuke maziga, okusagamba kufuuke kuwuubaala.

¹⁰ Mwewooye mu maiso ga Musengwa, alibafuula okuba ng'aba ghaigulu.

Otasaliranga muganda wo musango

¹¹ Aboluganda, mutoogeranga bubi ku banaimwe. Ole ayogera ku woluganda obubi oba amusalira musango, aba ayogeire bubi ku Mateeka era aba agasaliire omusango. Ate nga bw'osalira Amateeka omusango oba tokaali mugemi wa Mateeka, aye oba ofuuse agasalira omusango.

¹² Agha Amateeka era asala emisango ali mulala yenka. Oyo n'asobola okuwonia n'okuzikiriza. Aye iwe niiwe ani asalira mwino omusango?

Muteesuutirizanga

¹³ Muwulire ni kino imwe abakoba mbu: “Olwaleero oba olwaidho tulija mu kibuga eky'e bulebe twamalayo omwaka mulamba, twatunda era twafuna amagoba”,

¹⁴ ng'ate timwidhi bya nkyo. Aye obulamu bwaimwe mwidhi bwe buli? Buli ng'oti lufu bufu olubaaghooku akaseera obuseera ate ni luwaagho.

¹⁵ Mu kifo ky'ekyo mugwaine kukobanga muti: “Musengwa bw'ayenda twidha kuba balamu era tukole kino oba kire.”

¹⁶ Aye mperaano mwesuutiriza era mwekudumbaza. Okwekudumbaza ng'oti n'okwo kubi.

¹⁷ Kale ni ole yeenayeena aidhi ekituufu eky'okukola aye n'atakikola aba agwire mu kibi.