Yakobo 3 - Baibuli Ekibono kya Katonda 2014

Olulimi

¹ Aboluganda, muteeyugha ku mulimo gwa kwegeresa, kuba mwidhi nga ife abeegeresa tuja kunhunkuuzibwa inho okusinga abandi nga tusalirwa omusango.

² Twenatwena tusobya. Aye oba nga ghaligho atasobya mu ndhogera, oyo mutuukirivu era asobola okufuga n'omubiri gwe gwonagwona.

³ Tuta ebyuma mu minwa gy'embalaasi dhitugondere, olwo twasobola okudhiragira okuja yoonayoona ye tuba nga twenze.

⁴ Oba lingirira amaato: waire gaba mabba gatya era nga gatwalibwa empewo ey'amaani, akantu omuvuzi k'akozesa okugalagira okuja y'ayenda kaba katono inho.

⁵ N'olulimi bwe luli: kantu katono ku mubiri aye keesuutira mu bintu kamaala. Ogubira ni bwe gwaga gha, kaba kaliro katono kaagwokya.

⁶ Olulimi muliro. Lwidhwire obubi bwonabwona; ate nga kitundu kya ku mibiri gyaife. Lwonoona omubiri gwonagwona era lwakunaania omuliro ku bulamu bwaife bwonabwona, omuliro oguva mu geyeena gwene.

⁷ Kiisi kika kya nsolo, na nhonhi, n'ebyekulula, n'eby'omu nhandha, bighanga okufugibwa omuntu era byamala okufugibwa ira,

⁸ aye ezira muntu asobola kufuga lulimi. Olulimi kintu kibi inho ekitatyamisa ghalala, era lwidhwire obusagwa obuziraku muzimulo.

⁹ Lwe tukozesa okusaaka Musengwa era Lata, ate era lwe tukozesa okufuugha abantu beene abaakolebwa mu kifaananie kya Katonda.

¹⁰ Omunwa mulala ogwo n'omuva okusaaka, kabiri n'okukolima. Aboluganda, kino tikigwaine kuba kityo.

¹¹ Enhindo endala eti ey'ensulo esobola okuvaamu amaadhi amakalamu kabiri yaavaamu n'ag'oluunhu?

¹² Aboluganda, omutiini gusobola okutaaku emyoliva oba omuzabbibu okutaaku emitiini? N'ensulo ey'amaadhi ag'oluunhu etyo bw'etasobola kuvaamu maadhi makalamu.

Amagezi agava mu igulu

¹³ Ghaligho mu imwe ali n'amagezi n'okumanha? Kale akakase ekyo nga yeebisa bukalamu mu bulamu bwe, mu bikolwa ebikalamu eby'okwewombeeka n'amagezi.

¹⁴ Aye oba nga mu myoyo gyaimwe mwidhwire ensaalwa enkambwe, n'okweyendeza mwenka, muteesuutanga biziramu muti mbu muli n'amazima.

¹⁵ Amagezi ago ti n'ago agava mu igulu aye ga ku nsi, ga bantu buntu, era ga Sitaani.

¹⁶ Kuba aghaba ensaalwa n'okweyendeza, n'aghaba n'okutabukatabuka n'emize emibi eja buli nsambo.

¹⁷ Aye okusookera irala, amagezi agava mu igulu maamufu, ga idembe, mawombeefu, gawulirisa ensonga, gaidhwire okusaasira, gavaamu bikalamu byereere, ganoonia ekituufu era tigabaamu buguya.

¹⁸ Era abo abakolerera emiraala bakungula obutuufu obw'ensigo dhe basiga olw'okuleetagho emiraala.