Yakobo 2 - Baibuli Ekibono kya Katonda 2014

Okulabula ku kuboolagana

¹ Aboluganda, nga bwe mwikiriza mu Musengwa waife Yesu Kurisito, oyo Musengwa ow'ekitiisa, mulekere kuboolanga bantu abatababonekera bukalamu.

² Omuntu avaire empeta edha zaabu n'ebivaalo eby'omughendo bw'aidha ghe mwesololeiza okusinza, era n'omuntu omwavu avaire ebikepya yeena n'aidha,

³ memale n'ofa ku ole avaire ebivaalo eby'omughendo n'omukoba oti: “Iwe tyama ghano aghalungi,” aye ole omwavu n'omukoba oti: “Yemerera ghale” oba oti: “Idha otyame ghano gha nsi gha bigere byange”,

⁴ olwo oba oboire ng'ojiira ku bidhuubo ebibi.

⁵ Aboluganda abagonzi, muwulire kino: Katonda yalonda abaavu ab'oku nsi kuno okuba abakombe mu kwikiriza, era n'okuba mu Bwakyabazinga bwe yasuubiza abo abamugonza.

⁶ Aye imwe munhooma abaavu! Abakombe ti n'ababatuntuza? Ti ni beene abo ababatwala ni babakuba mu mbuga?

⁷ Ti ni beene abo abavumirira eriina ery'ekitiisa lye mwetebwa?

⁸ Muba mukoze bukalamu bwe mutuukiriza eiteeka lino eikulu, nga bwe kyaghandiikibwa kiti: “Ogonzanga muntu mwino ng'oti ni bwe weegonza mwene.”

⁹ Aye bwe muboola abantu olw'emboneka yaibwe muba mukoze ekibi, era muba muli bamenhi ba Mateeka.

¹⁰ Oyo agema Amateeka goonagoona aye eirala liti ni limulema, abaaku omusango ogw'okumenha Amateeka goonagoona

¹¹ kuba eyakoba ati: “Otayendanga,” era n'omulala eyakoba ati: “Otaitanga.” Bw'otayenda aye n'oita, oba ofuuse mumenhi wa mateeka.

¹² Kale ni mwogerenga era mukolenga ng'abo abaja okusalirwa omusango mu mateeka agatuleetera eidembe.

¹³ Mu kusala omusango Katonda taja kusaasira muntu oyo atasaasira ate okusaasira n'okusinga mu kusala emisango.

Okwikiriza n'ebikolwa

¹⁴ Aboluganda, kiganhula ki omuntu okukoba ati ali n'okwikiriza ng'ate ebikolwa bye tibyoleka kwikiriza okwo? Okwikiriza kwe okwo kughanga okumulokola?

¹⁵ Bwe ghabaagho owoluganda omusaadha oba omukazi ng'ali mu bikepya era muyala,

¹⁶ kiganhula ki okumukoba oti: “Nkwendeza nkabi, empewo etakufuuwa, era endhala etakuluma,” aye nga ghazira ky'omughaire ku byetaago bye eby'omubiri?

¹⁷ Kye kuva okwikiriza okutaliiku bikolwa kuba okufu.

¹⁸ Aye ole aidha kukoba ati: “Iwe oli na kwikiriza aye nze ndi na bikolwa.” Oyo nze mmukoba nti: “Ndaga okwikiriza kwo okuziraku bikolwa, nze ndidha kukulaga okwange nga nkozesa ebikolwa.”

¹⁹ Oikiriza ekya Katonda okuba omulala? Ekyo kikalamu! Aye n'emizimu emibi gyona giikiriza ekyo, era gyadhugumira n'okudhugumira.

²⁰ Musiru iwe, oyenda okukulaga ng'okwikiriza okuziraku bikolwa bwe kuli okufu?

²¹ Dhaadha waife Aburahamu tiyasiimibwa Katonda lwa bikolwa, bwe yaghaayo mutabane we Isaaka ku alutaari?

²² Obona ng'okwikiriza kwe bwe kwakolera aghalala n'ebikolwa bye, era ng'ebikolwa bye bwe byatuukiriza okwikiriza kwe.

²³ Era ebyaghandiikibwa byatuukirira ebikoba biti: “Aburahamu yaikiriza Katonda, era ekyo kyamuviiramu okugheebwa obutuukirivu era ni Katonda okumweta mukagwa we.”

²⁴ Kale nga bwe mubona, omuntu agheebwa obutuukirivu lwa bikolwa se ti lwa kwikiriza kwonka.

²⁵ Kityo ti bwe kyali ni ku Rahabu omukazi malaaya? Tiyasiimibwa Katonda lwa bikolwa bye, bwe yaganha okukuuma abakwenda abaatumibwa n'abawonia ng'ababisa mu ngira eyindi?

²⁶ Kuba ng'omubiri oguziramu mwoyo bwe guba omufu, n'okwikiriza okuziramu bikolwa kutyo bwe kuba okufu.