Yakobo 1 - Baibuli Ekibono kya Katonda 2014

¹ Ninze Yakobo omugheereza wa Katonda, era owa Musengwa Yesu Kurisito. Mpandiikira ebika eikumi n'ebibiri ebisansaaniire woonawoona. Mbalamwisa inho.

Okwikiriza n'amagezi

² Aboluganda, bwe mutuukibwangaku ebizibu ebya buli nsambo, musangaalenga.

³ Kuba mwidhi ng'okwikiriza kwaimwe bwe kugezesebwa, kibaviiramu okuguma.

⁴ Muleke okuguma kwaimwe okwo kukolere mu imwe, olwo mube abantu abatuukiriire era abalamba, nga muziraku kibulaku.

⁵ Oba nga ghaligho ku imwe azira magezi, asabe Katonda aidha ku gamugha kuba oyo agabira abantu boonaboona n'omwoyo mulala.

⁶ Aye ali n'okusabira mu kwikiriza era na mwoyo mulala, kuba asaba n'emyoyo ebiri ali oti n'amayengo ag'oku nhandha agayuuzibwayuuzibwa empewo.

^7-8 Era omuntu ng'oti n'oyo akola ekintu n'emyoyo ebiri, era atasalagho mu byonabyona by'akola, atadhuuba ati aja kufuna ekintu kyonakyona okuva ye Musengwa.

Obwavu n'obukombe

⁹ Owoluganda omughafu yeesiimenga nga Katonda amutoire mu bughafu.

¹⁰ N'omukombe yeesiimenga nga Katonda amutoireku obukombe, kuba ng'ekimuli eky'omu nsiko bwe kiwaagho, yeena bw'aliwaagho.

¹¹ Endhuba bw'evaayo n'omusana gwayo ogw'amaani, eniaza ekimera ekimuli kyakyo kyagwa n'obulungi bwakyo bwawaagho. N'omukombe atyo bw'aliwaagho mu ebyo by'akola.

Okugezesa n'okuleba

¹² Omuntu agumira okulebwa wa nkabi, kuba bw'abita mu kugezesebwa okwo, aligheebwa obulamu ng'ekirabo Katonda kye yasuubiza abo abamugonza.

¹³ Ole bw'abanga nga alebeibwa, atakobanga ati: “Katonda n'andebye.” Kuba ghazira kighanga kuleba Katonda kukola kibi, era ni Katonda mwene ghazira y'aleba.

¹⁴ Aye omuntu akemebwa nga asendebwasendebwa, era nga atwalirizibwa okwegomba kwe mwene.

¹⁵ Okwegomba kuvaamu ekibi ate ekibi kyavaamu okufa.

¹⁶ Aboluganda abagonzi, batabasubaghanga.

¹⁷ Kiisi kirabo kikalamu era ekituukiriire, kiva mu igulu ye Lata eyatonda ebyaka ku igulu. Oyo tafuukafuuka, oba okuleeta enzikiiza ng'akyukakyuka.

¹⁸ Olw'okwenda kwe mwene yatutonda n'ekibono eky'amazima, olwo tutwale ekifo ekisooka mu bitonde bye.

Okuwulira n'okukola

¹⁹ Aboluganda abagonzi, nhenda mumanhe kino: Buli muntu abenga mwangu okuwulira, aye alwengagho okwogera n'okusungughala,

²⁰ kuba obusungu obw'omuntu tibuleetagho butuufu bwa Katonda.

²¹ Kale mulekeyo emize n'empisa embi dhoonadhoona, mwikirize n'obuwombeefu ekibono Katonda ky'asiga mu myoyo gyaimwe era ekisobola okubawonia.

²² Mulobenga kwesubagha nga muwulira buwulire ekibono, aye mukolenga nga bwe kikoba.

²³ Omuntu yeenayeena awulira obuwulire ekibono n'atakola nga bwe kikoba ali ng'oti n'omuntu eyeebona mu maiso mu mbonerwamu.

²⁴ Kuba bw'amala okwebona n'aja, akaseera keene ako yeerabira bw'afaanaine.

²⁵ Aye oyo eyeekalirisa amateeka amatuufu agaleetera abantu eidembe, era n'ageekalanguliraku nga tawulira buwulire ni yeerabira, aye ng'akola bye gakoba, omuntu oyo anaabanga wa nkabi mu buli ky'akola.

²⁶ Ole bw'alowooza ati aikiriza, aye n'atafuga lulimi lwe, yeesubagha era n'okwikiriza kwe muzira.

²⁷ Okwikiriza okutuufu era okuziramu buguya mu maiso ga Katonda Lata ni kuno: okulabirira bamulekwa, ni banamwandu, n'okwekuuma obutoonoonebwa nsi eno.