Tobiti 8 - Baibuli Ekibono kya Katonda 2014

Tobia abinga omuzimu omubi

¹ Ghe baamalira okulya n'okunhwa, olwo nga n'ebiseera eby'okuja okulambaala bituuse. Kale baatwala Tobia mu kisenge kire.

² Tobia oyo yaidhukira Rafaeli bye yamukoba. Agho yaatoolayo omwoyo n'eini eby'ekyenhandha kire bye yatereka mu nsawo ye, yaabita ku bubbaani obuli kunioka.

³ Okuwunha kwabyo kwabingagho omuzimu omubi, gwalumukira e Misiri. Rafaeli yaagubingirira yaagugema era yaagusiba emikono n'amagulu.

Tobia asaba Katonda

⁴ Abazaire bwe baafuluma mu kisenge ni baigalagho olwigi, Tobia yaava ku buliri, yaakoba Sara ati: “Omugonzi wange, situka tweghembe Musengwa atugemerwe ekisa era atukuume.”

⁵ Sara yaasituka, baatoolera okweghemba Katonda abakuume. Tobia yaasaba ati: “Wo Katonda wa badhaadha baife, ogwaine osaakibwenga, n'eriina lyo ligwaine ligheebwenga ekitiisa ebyanda n'ebyanda. Ebitonde byonabyona mu igulu ni mu nsi ka bikusaakenga ebyanda n'ebyanda.

⁶ Watonda Adamu era waatonda ni mukazi we Eva, waamumugha amubeerengaku era amugumyenga. Mu abo bombi n'omwasimuka abantu boonaboona. Wakoba oti, ‘Ti kirungi omuntu okubanga yenka. Ndidha kumukolerayo omubeezi amugwanira.’

⁷ Mpegaano nsazeegho okutwala owoluganda ono lwa kuba ng'ekyo n'ekituufu okukola, se ti lwa kuba nga mmwegombye bwegombe mu mubiri. Tukweghembye tugemerwe ekisa, otughe okukairigha nga tuli ghalala.”

⁸ Bombi baakoba bati: “Amiina.”

⁹ Agho baatenduka obwire obwo. Aye obwire obwo, Ragueli yaayeta abagheereza be, yaaja nabo okusima amagombe,

Abazaire beeraliikirira

¹⁰ kuba yakoba mule ati: “Tobia yeena asobola okufa abantu baatuvumirira era baatusekerera.”

¹¹ Bwe baamala okusima amagombe, Ragueli yairayo mu ndhu ye, yaakoba mukazi we ati:

¹² “Tuma owundi ku bairu abakazi abone oba nga Tobia akaali mulamu. Aye bw'aba ng'afiire, tumuziike nga ghakaali na kubaagho amanha.”

¹³ Kale baatuma omwiru omukazi, yaakunaania eitaala, yaaja yaigulagho olwigi, yaingira. Yaabona nga bombi bali kutenduka endoolo enhingi einho.

¹⁴ Agho yairayo yaabakobera ati Tobia mulamu era ghazira kabi koonakoona kaamutuuseeku.

¹⁵ Agho Ragueli yaasaaka Katonda ali mu igulu, ng'akoba ati: “Wo Katonda waife, tugwaine tukusaakenga n'omwoyo mulala. Abantu bo ka bakusaakenga, bakusaakenga ebyanda n'ebyanda.

Ragueli asaba Katonda

¹⁶ Nkusaaka, kuba ondeeteire okusangaala. Ongemeirwa ekivunika, ebyo bye mbaire ndi kutya okwidha byaloba kutuukirira.

¹⁷ Wo Musengwa, ogwaine osaakibwenga, kuba ogemeirwa ekivunika abaana bano bombi, abazaire baibwe be bali nabo nga ni bonka bati. Basaasire era obakuume, obaleetere okuba n'eisanhu mu bulamu bwaibwe.”

¹⁸ Agho Ragueli yaalagira abagheereza be okuziikira amagombe bagasaaniegho ng'obwire bukaali kukya.

Embaga ey'obugole

¹⁹ Ebyo nga biwoire, Ragueli yaakoba mukazi we afumbe emere nhingi. Ate mwene yaaja mu lugo lwe, yaatoolayo ente enume ibiri n'entaama enume ina, yaalagira dhiitibwe. Kale baatoolera okutegeka embaga ey'obugole.

²⁰ Era yaayeta Tobia yaamukoba ati: “Ndayiire, toidha kuva ghano okumala enaku ikumi na ina. Oidha kusigala ghano tulye era tunhwe, osanhuseeku mughala wange abairenga mu nnaku einho atyo.

²¹ Ebyo nga biwoire, twidha kugabaniamu ebintu bye ndi nabyo ghabiri otwaleku ekitundu, oireyo miraala ewa lata wo ng'oli mulamu. Ekitundu ekinaasigalagho olikitwala nga nze ni mukazi wange tumaze okufa. Mwana wange, kikakase okuva ni mpegaano nti iwe oli mutabane waife ng'oti ni Sara bw'ali mughala waife ebyanda n'ebyanda. Ekyo otakibuusabuusangamu naire.”