Tobiti 6 - Baibuli Ekibono kya Katonda 2014

Tobia agema ekyenhandha

¹ Agho Tobia ni malaika baatoolera olugendo lwaibwe.

² N'embwa ya Tobia oyo yoona yaaja nabo. Baatambula okutuusa endhuba okugwa. Agho baasimba weema dhaibwe okumpi n'omwiga Tiguri.

³ Agho Tobia yaaja okunaaba ku bigere mu mwiga ogwo. Bwe yali ng'ali eyo ekyenhandha ekibba kyatuuma okuva mu maadhi nga kyenda okumira ekigere kye. Tobia yaayana inho.

⁴ Aye malaika yaamukoba ati: “Gema ekyenhandha ekyo okikalangule kirobe kukunuuka mu ngalo.” Tobia yaakigema, yaakighaluza okukituusa ku bukalu.

⁵ Malaika yaamukoba ati: “Kibaage okitoolemu akaka n'omwoyo n'eini, obitereke kuba bya mugaso inho ng'obulezi. Aye ebyenda obisuule.”

⁶ Tobia yaakola nga malaika bwe yamukoba. Yaamala yaayokya ekyenhandha ekyo ku muliro, baalyaku kitundu. Ekyasigalagho yaakitaaku omuunhu baaja nakyo. Agho bombi beeyongerayo mu lugendo lwaibwe, baatuuka kumpi n'e Media.

⁷ Agho Tobia yaabuuza malaika ati: “Mukagwa Azaria, bulezi bwaki obuli mu kaka ni mu mwoyo ni mu ini eby'ekyenhandha?”

⁸ Malaika yairamu ati: “Omwoyo n'eini ebyo osobola okubyokya waabiniokeza okubinga ku muntu omuzimu omubi oguba guli kumudaazadaaza. Gwalekerera gheene agho okumulumba, gwalumuka era gwaloba kwiramu kabiri kumudaazadaaza.

⁹ Akaka osobola okukakozesa okuwonia amaiso g'omuntu agaidhieku olubwibwi olweru ng'oti mata. Osiiga busiige ku maiso, waafuuwa ku lubwibwi olweru ng'oti mata olugaliku, ng'olwo airamu okubona.”

Ebyaligho mu ngira nga baja Ekubatana

¹⁰ Bwe baatuuka e Media nga bali kumpi okutuuka mu kibuga Ekubatana,

¹¹ Rafaeli yaayeta Tobia ati: “Mukagwa.” Tobia yaavugira ati: “Ndi ghano.” Rafaeli yaakoba ati: “Olwaleero tuja kusula ewa Ragueli. Ragueli oyo wa mu kika kyo, era ali ni mughala we ayetebwa Sara.

¹² Aziraku mwana wundi k'abe omulenzi oba omughala, okutoolaku Sara oyo yenka. Kale iwe nga bw'oli einho ow'ekika kya Ragueli oyo, niiwe ogwaniire okufumbirwa Sara oyo n'okusikira ebintu bya Ragueli oyo byonabyona. Sara oyo mughala wa mpisa, omugumu, era aboneka obulungi einho. Ni lata we muntu mukalamu.

¹³ Obwire bwaleero ndidha kwogera ni lata we oyo, era aidha kuganha okumukugha omufumbirwe. Bwe tuliba twirayo eka nga tuviire e Ragesi tulikola embaga ey'obugole. Nze ndidhi nga Ragueli tasobola kuloba kumukugha, kuba era tasobola kumugha musaadha wundi. Bw'akola ekyo aba agwanira kumusalira gwa kufa ng'amateeka ga Musa bwe gakoba. Era akiidhi bukalamu nga niiwe ogwaniire okufumbirwa mughala we n'okusikira ebintu bye. Kale ni mukagwa, jiira ku bye ndi kukukoba. Obwire bwaleero nze ni Ragueli twidha kwogera ku nsonga eyo tutegeke n'okwandhula. Olwo bwe tuliba twirayo eka nga tuva e Ragesi, tuliirayo ni Sara.”

¹⁴ Agho Tobia yaakoba Rafaeli ati: “Mukagwa Azaria, nawulira nti Sara oyo yaakafumbirwa abasaadha musanvu era nga buli musaadha ku abo omusanvu afiiranga mu kisenge eky'obugole mu bwire bwene obw'embaga, ng'akaali na kuba na Sara oyo mu buliri. Era nawulira ng'abantu bakoba bati omuzimu omubi n'ogwidhanga ni gubaita.

¹⁵ Aye ate mbu Sara mwene tigumukolaku kabi naire, okutoolaku okwita kiisi musaadha agezaaku okuba naye mu buliri. Kale nze ntya omuzimu ogwo omubi, kuba abazaire bange banzaala mulala zenka. Bwe nfa, boona basobola okufa olw'enaku ate nga bazirayo mwana wundi wa kubaziika.”

¹⁶ Malaika yairamu ati: “Weerabiire lata wo bye yakusikirira n'akukoba okufumbirwa omukazi mu kika kye? Kale ni wulirisa bukalamu kye ndi kukoba. Omuzimu omubi ogwo gutakweraliikiriza. Iwe twala Sara abe mukazi wo. Nze ndidhi ng'olwaleero Ragueli aidha kumukugha omufumbirwe.

¹⁷ Olwingira mu kisenge eky'obugole oti, ng'otoola ku mwoyo ni ku ini eby'ekyenhandha kire, ng'obita ku bubbaani obuli kunioka. Okuwunha kwabyo kwidha kubuna mu kisenge kyonakyona.

¹⁸ Omuzimu omubi olunaabiwunhiza guti, gwidha kuvaagho guje era tiguliirayo kabiri kuseeta ghali Sara. Aye nga mukaali kuba ghalala mu buliri, mwembi muli n'okwemerera mwasaba Musengwa ali mu igulu abagemerwe ekivunika era abakuume. Otatya, kuba Sara yakutegekerwa nga wuwo ng'ensi etondebwa. Oidha kumuwonia omuzimu omubi gulobe kumukolaku kabi, olwo aje n'iwe ewaimwe. Era nkakasa nga mulizaala naye abaana kamaala b'oligonza einho. Kale oteeraliikirira.” Tobia bwe yamala okuwulira ebyo Rafaeli bye yayogera, era n'amanha nga Sara amuliku oluganda ku luuyi lwa ise, yaatoolera okumugonzanga einho nga takaasobola na kumutoolaku birowoozo.