Tobiti 5 - Baibuli Ekibono kya Katonda 2014

Okutegeka olugendo

¹ Agho Tobia yairamu ise ati: “Lata, ndidha kukolanga byonabyona by'onkobye.

² Aye nsobola ntya okutoolayo empiiya edho nga nze ni Gabaeli oyo titwidhigaine?”

³ Agho Tobiti yaamugha endagaano mwene ye yakola ni Gabaeli, era yaamukoba ati: “Funayo omuntu muje naye, nze ndimusasula empeera ye bwe ndiba nga nkaagheeragho. Ja otooleyo empiiya edho.”

Tobia ayagaanana ni malaika Rafaeli

⁴ Agho Tobia yaaja okunoonia omuntu ow'okuja naye e Media. Yaayagaanana ni Rafaeli malaika wa Katonda, aye nga tamwidhi nti malaika.

⁵ Tobia yaamubuuza ati: “Oidhi engira eja e Ragesi mu nsi Media? Era tusobola okujaayo twembi?”

⁶ Malaika yairamu ati: “Yii, ngiidhi. Era eyo nabangayo nga nsula ew'omusaadha atuliku oluganda ayetebwa Gabaeli. Kale ndidha kuja n'iwe.”

⁷ Agho Tobia yaamukoba ati: “Nteegaaku ghano mukagwa, nje nkobere lata wange kuba nhenda omperekereku, era ndikugha empeera ey'okumperekera mu lugendo olwo.”

⁸ Malaika yaakoba ati: “Kale ka nkuteege, aye otalwayo.”

⁹ Tobia yairayo mu ndhu, yaakobera Tobiti, ise, ati: “Ndhagaine Muisiraeli munange ye nnaaja naye.” Ise yaamukoba ati: “Mwete aidhe ghano. Ndi kwenda okumanha ekika kyenekyene ky'avaamu, era mmanhe oba nga bwenebwene mwesigwa era ng'asobola okuja n'iwe.”

Tobiti ayagaanana ni malaika Rafaeli

¹⁰ Agho Tobia yaaja yaayeta Rafaeli ati: “Lata wange ali kwenda okwogeraku n'iwe.” Rafaeli bwe yaingira, Tobiti n'eyasooka okumulamusa. Rafaeli yaamwiramu ati: “Nsangaire okukwagaana.” Tobiti yairamu ati: “Kusangaala ki nze kwe nkaali nakwo nga ndi mutulu? Nzira kye mbona. Ndi bwa mu nzikiiza ng'oti n'abafu abatakaabona butangaavu bwa ndhuba. Waire nga nkaali mulamu, aye era kumpi ndi mufu mpulira abantu nga boogera aye tisobola kubabona.” Rafaeli yaamukoba ati: “Guma. Ekiseera kiri kumpi, Katonda aidhe akuwonie. Leka kweraliikirira.” Agho Tobiti yaamukoba ati: “Mutabane wange Tobia ali kwenda okuja e Media. Aye osobola okumugherekeraku omulage engira? Mukagwa, nze ndikusasula empeera yo ey'okumugherekera.” Rafaeli yairamu ati: “Nsobola okumugherekeraku, kuba eyo e Media mbaire njangayo emikuzi kamaala, era engira dhaayo dhoonadhoona edhibitira mu nsozi ni mu biketezo eby'oku museetwe ndhiidhi bukalamu.”

¹¹ Tobiti yaayongera okumukoba ati: “Mukagwa, nkobera amaka g'ovaamu n'ekika kyo.”

¹² Rafaeli yairamu ati: “Lwaki oli kwenda okuumanha?” Tobiti yaakoba ati: “Ndi kwenda mmanhe abazaire bo beene, era n'eriina lyo lyene.”

¹³ Rafaeli yairamu ati: “Nze bandheta Azaria. Ndi mwana wa Anania omukologho, ow'ekika kyo.”

¹⁴ Agho Tobiti yaamukoba ati: “Mukagwa, tusangaire okukubona mu maka gaife, era Katonda akughe enkabi. Nkweghembye otasungughala olw'okuba nhenze okumanha obuzaale bwo. Mpegaano kyeyoleike bukalamu ng'oli wa kika kyaife era wa mu ndhu. Abaana ba Shemaia omukologho ababiri abo, Anania ni Nathani, nabamanha bukalamu. Baali bagumu mu kwikiriza kwaibwe, era twajanga nabo okusinza e Yerusalemu. Abantu bo b'ovaamu bakalamu, era osimuka mu lulyo lulungi. Tusangaire inho okukubona!”

¹⁵ Tobiti yaayongeraku ati: “Ndidha kukusasula empeera yo eya buli lunaku, era mbasasulire ni bye mwetaaga mu lugendo lwaimwe mwembi. Kale ni kola ogherekereku mutabane wange oyo,

¹⁶ era ku mpeera yo ndyongeraku n'akasiimo.” Rafaeli yaakoba ati: “Ndidha kumugherekera, oteeraliikirira naire. Twidha kuja era tumale twire bukalamu. Mu ngira muziramu kizibu naire.”

¹⁷ Tobiti yairamu ati: “Katonda abe n'iwe.” Agho yaayeta Tobia, yaamukoba ati: “Mwana wange, tegeka byonabyona bye muneetaaga mu lugendo, memale muje ni mwino ono. Katonda oyo ali mu igulu aje n'imwe abatuuse, era abaize miraala ye ndi nga muli balamu. Malaika we abagherekere abakuume mu ngira.” Tobia bwe yamala okutegeka olugendo, yaasiibula ise n'inhina ng'abagwa mu kifuba yaabanhwegera. Ise yaamukoba ati: “Mutambule bulungi.”

¹⁸ Aye inhina yaatoolera okulira, era yaakoba Tobiti ati: “Lwaki oli kuleka omwana wange aje? Naani anaatugemanga ku mukono? Era naani anaatuyambanga?

¹⁹ Obwo empiiya edho odhitwala nga kintu kikulu inho, olwo otoole obulamu bw'omwana waife obute mu kabi ak'okuja okudhitoolayo?

²⁰ Lwaki tituba bamativu n'ebyo Musengwa by'atughaire?”

²¹ Tobiti yaamukoba ati: “Omugonzi wange, oteeraliikirira naire. Omwana waife aidha kuja atuuke era aire nga mulamu. Ku lunaku lw'aliira olimubona n'amaiso go nga mulamu mwene. Kale lekera agho okweraliikirira olwa Tobia oyo ni mwine. Malaika omulungi aidha kugherekera Tobia oyo aje atuuke bukalamu era aire nga mulamu.” Anna bwe yawulira ebyo, yaalekera agho okulira.