Tobiti 4 - Baibuli Ekibono kya Katonda 2014

Tobiti alamba mutabane we Tobia

¹ Ku lunaku olwo lwene, Tobiti yaidhukira empiiya dhe yateresa Gabaeli mu kibuga Ragesi mu nsi Media. Agho yaakoba mule ati:

² “Nga bwe nsabye Katonda andeke nfe, ka ndhete omwana wange Tobia mmukobereku ku mpiiya edho nga nkaali kufa.”

³ Kale yaamweta yaamukoba ati: “Mwana wange, bwe nfanga onziikanga mu nsambo egwaniire. Inhoko omutangamu ekitiisa era waamulabiriranga enaku dhoonadhoona dh'alimala nga mulamu ku nsi. Omukoleranga ebimusangaaza, waaloba kumuleetera nnaku.

⁴ Mwana wange, idhukira nga inhoko oyo yabita mu bizibu kamaala okukuzaala. Era bw'afanga omuziikanga ghalala ninze.

⁵ “Buli kaakyeire idhukiranga Musengwa Katonda waife. Otakolanga bibi, waire okudheemeranga ebiragiro bye. Banga mwesimbu enaku dhoonadhoona dh'olimala ng'oli mulamu ku nsi, era oteeyimbanga mu bikolwa bibi.

⁶ Bw'onaakolanga ebituufu, olwo byonabyona by'onaakolanga biidhanga kukujiira bukalamu.

⁷ “Ogabiranga abantu abeesimbu ku bibyo n'omwoyo mulala, aghazira kabiri iwe mwene okulinga ku kintu ky'oli kugaba nga weenhiinkaire mu maiso. Era otalobanga kuyamba muntu yeenayeena mwavu, olwo Katonda yeena bw'ataalobenga kukuyamba mu byetaago byo.

⁸ Ogabanga ng'ojiira ku by'oli nabyo. Bw'obanga ng'oli na bingi ogabanga bingi, ate bw'obanga ng'oli na bitono era otatyanga kugaba ku bitono ebyo by'oli nabyo.

⁹ Olwo waaba nga weeterekeire ebirikuyamba ng'oli mu bwetaavu,

¹⁰ kuba okugabira abaavu kuleetera omuntu okuwona okufa n'okwingira mu nzikiiza y'e magombe.

¹¹ Era kiisi agabira omwavu aba aghairegho ye Katonda Ali Ghaigulu Yeene ekigheebwayo ekisinga bukalamu.

¹² “Mwana wange, weekuumenga olobe kukola bwenzi. Ekisookera irala, ofunanga omukazi ow'okufumbirwa mu b'oku lulyo lwa badhaadha baife kuba tuli ba ku lulyo lwa balanzi. Otafumbirwanga atali wa ku lulyo lwaife. Idhukira nga badhaadha baife ab'eira, Noa, Aburahamu, Isaaka ni Yakobo, boonaboona baafumbirwa ba ku lulyo lwaibwe. Katonda yaabagha enkabi baazaala abaana, era baidhukulu baibwe balitwala ensi Isiraeli yaaba yaibwe.

¹³ Kale ni mwana wange, weena ogwaine otenga ekinhagansi mu bantu bo abakuliku oluganda. Otabanhoomereranga n'oloba kufuna mukazi wa kufumbirwa okuva mu beene abo, kuba mu kwekuluntaza muvaamu kutabukatabuka na kuzikirira, ng'oti ni mu bugayaavu bwe muvaamu obwavu n'okufa endhala.

¹⁴ “Otaloberanga ku mpeera ya mukozi akukolera, n'ogigemereranga kutuusa ku lunaku olwiririra, aye ogimugheerengagho mangu ku lunaku lwene olwo lw'amaze omulimo. Bw'onaatanga mu Katonda ekitiisa otyo, olisasulwamu ebirungi. Mwana wange, weegenderezenga mu byonabyona by'okola era obenga wa mpisa nkalamu.

¹⁵ Ebyo by'otayenda bantu bakukole, weena otabibakolanga. “Otanhwanga mwenge kutuuka ku kutamiira. Era okutamiira otagufuulanga muze.

¹⁶ “Abo abali endhala obaghanga ku mere yo, n'abo ababita amadu waabaghanga ku bivaalo byo. Bw'ofunanga ebintu ebingi okusinga ebyo bye weetaaga, ebyo by'oteetaaga obigabanga aghazira kabiri iwe mwene okulinga ku kintu ky'oli kugaba nga weenhiinkaire mu maiso.

¹⁷ “Omuntu atya Katonda bw'afanga oghangayo emere ku lumbe lwe, aye ekyo otakikolanga ng'omwonooni n'afiire.

¹⁸ “Fubanga inho okufuna amagezi okuva ku bantu abagezi, era otanhoomereranga magezi malungi goonagoona agakugheebwa.

¹⁹ “Osaakanga Musengwa Katonda wo mu buli mbeera y'obaamu, era waamusabanga akughenga enkabi mu byonabyona by'otegeka okukola, bikujiirenga bukalamu. Ghazira muntu ku bamaghanga gandi ali na kutegeera. Aye Katonda oyo n'agaba buli kirungi, era bw'aba ayenze asobola okughanula omuntu yeenayeena ghaigulu, yaamwisa ghansi. “Kale ni mwana wange, idhukiranga bye nkugalagiire era otabyerabiranga naire.

²⁰ “Mpegaano nhenda omanhe nga Gabaeli mutabane wa Gaburia e Ragesi mu Media, namuteresa empiiya dha feeza edhigheza obuzito bwa kilo ng'oti bikumi bisatu (300).

²¹ Kale otatya waire nga tuli baavu buti, kuba bw'onaatyanga Katonda, ni weesambanga buli kibi kyonakyona, era n'okolanga by'ayenda, oliba n'obukombe obutaloodheka.”