Tobiti 1 - Baibuli Ekibono kya Katonda 2014

¹ Bino n'ebyafaayo eby'obulamu bwa Tobiti. Tobiti yali mutabane wa Tobieli, era yaaba mwidhukulu wa Ananieli. Ananieli oyo yali mutabane wa Adueli, Adueli yaaba mutabane wa Gabaeli, Gabaeli yaaba mutabane wa Rafaeli, ate Rafaeli yaaba mutabane wa Ragueli eyali ow'oku nda ya Asieli mu kika kya Nafutali.

² Tobiti oyo baamutwala mu bunhage mu biseera Shalumaneseri bye yabeeramu kyabazinga ow'e Assiria, nga bamutoola e Thisube ekiri ku luuyi olw'omukono omusaadha olw'e buvandhuba bwa Kadeshi mu kiketezo kya Nafutali, ere e Galilaaya eitale wa Asheri.

Obulamu bwa Tobiti obwasooka

³ Nze Tobiti najiiranga ku mazima ni ku kukolanga ebituufu mu bulamu bwange bwonabwona. Naatoolanga ku byange naayambanga baganda bange ni Bayudaaya banange abandi, be twatwalibwa nabo mu bunhage e Nineve mu Assiria.

⁴ Bwe nali nga nkaali mwisuka, nabanga mu nsi yange Isiraeli ku luuyi olw'omukono omugooda olw'e buvandhuba. Ebika byonabyona mu Isiraeli byalinga n'okugheerayo emisengo mu Yerusalemu kuba ekyo n'ekibuga Katonda kye yalondamu mu bibuga byonabyona eby'omu Isiraeli kizimbwemu eisinzizo lye, oyo Ali Ghaigulu Yeene, era lifuulibwe ekifo ekitukuvu eky'olubeerera. Aye ekika kyange kyonakyona ekya Nafutali, kyamala kyekutula ku kibuga ekyo Yerusalemu ni ku bakyabazinga ab'oku lulyo lwa Daudi.

⁵ Buli maka agaali mu kika kya Nafutali aghalala n'ago agaali mu bika ebindi ebyava ku kwikiriza Katonda ni bye kutulaku, gaajanga mu kibuga ekyetebwa Dani mu nsozi edh'oku luuyi olw'omukono omusaadha olw'e buvandhuba olwa Galilaaya, gaaghangayo emisengo eri ekifaananie eky'ente ento enume kyabazinga Yeroboamu owa Isiraeli kye yakola. Kale n'amaka ag'ewaife goona gaakolanga gatyo.

Tobiti agumira ku nsinza entuufu

⁶ Nze zenka ku b'omu maka ag'ewaife, ninze eyajanga buliidho e Yerusalemu okukuza ebibinuko ng'Amateeka ga Musa bwe gaalagira buli muntu ali mu Isiraeli okukolanga. Natwalanga ekitundu kirala kirala ku buli bitundu ikumi: ku birime byange bye nasookanga okukungula, ni ku nsolo dhange edhaazaalibwanga mu nzaalo edhisooka, ni ku buviiri bwe nasookanga okusala ku ntaama dhange. Ebyo nabitwalanga ku alutaari mu isinzizo, naabighangayo eri bakabona ab'oku lulyo lw'Aaroni.

⁷ Natoolanga ekitundu kirala kirala ku buli bitundu ikumi eby'ebibala byange byonabyona bye nakungulanga, naakighanga Abalevi abaagheerezanga Katonda mu Yerusalemu. Buli mwaka, ng'otoireku ogwomusanvu abantu gwe baalekerangamu eitaka okuwuumula, natundanga ekitundu ekindi kirala kirala ku buli bitundu ikumi eby'ebintu byange, naakozesa empiiya edho okukuza ekibinuko e Yerusalemu.

⁸ Ate buli mwaka ogwokusatu natoolanga ekitundu ekindi kirala kirala ku buli bitundu ikumi, naakighaayo olw'okukuliza aghalala ekibinuko ni banamwandu, ni bamulekwa, n'abagwira abaabanga aghalala n'abantu ab'eighanga lyange. Nakolanga ntyo olw'okutuukiriza Amateeka ga Musa, Debora inhina wa dhaadha wange Ananieli ge yandhegeresa okukuumanga, kuba Lata wange yali amaze okufa yandeka nga ndi mulekwa.

Obwesigwa bwa Tobiti ng'ali mu bunhage

⁹ Bwe nakula naafumbirwa Anna ow'omu ighanga lyange, era twazaala omwana mulenzi, twamutuuma eriina Tobia.

¹⁰ Ebyo nga biwoire, bangema bantwala e Nineve mu bunhage mu Assiria. Bwe twali eyo, ab'ekika kyange boonaboona ni Bayudaaya banaife abandi, baalyanga emere abantu abamaghanga agandi abaali eyo ye baalyanga.

¹¹ Aye nze naaloba okugirya

¹² kuba nagumira ku Katonda wange bye yalagira n'omwoyo gwange gwonagwona.

¹³ Era Katonda oyo Ali Ghaigulu Yeene yaaleetera kyabazinga Shalumaneseri okuunhenda einho, yampa omulimo ogw'okumuguliranga bye yeetaaganga.

¹⁴ Kale naajanga emikuzi mingi mu nsi Media okumugulirayo ebintu. Olundi bwe nali ndi mu kibuga Ragesi mu nsi eyo Media, naateresa Gabaeli muganda wa Gaburia empiiya dha feeza edhigheza obuzito bwa kilo ng'oti bikumi bisatu (300).

¹⁵ Shalumaneseri bwe yafa, mutabane we Sennakeribu yaamusikira ku bwakyabazinga. Aye enguudo edhija e Media dhaafuuka dha kabi okudhibitamu, kale naaba nga tikaasobola kujaayo.

Tobiti aziika abafu

¹⁶ Mu biseera bya Shalumaneseri natoolanga ku byange naayambanga Bayudaaya banange buli lwe baabanga n'obwetaavu.

¹⁷ Naghanga abayala emere, n'ababita amadu naabaghanga eby'okuvaala. Bwe nabonanga omulambo ogw'ow'eighanga lyange nga baguswire kuliya kw'ekimante eky'oku kibuga Nineve, najanga naaguziika bukalamu.

¹⁸ Era kyabazinga Sennakeribu bwe yaita abantu nga bali kulumukira e Media nga bava e Buyudaaya, nze naja naatoolagho emirambo gy'abantu abo, naagiziika mu kyama. Kyaba nti Sennakeribu oyo bwe yaira okuginoonia tiyagibona.

¹⁹ Ghaabaagho omuntu mulala ku b'e Nineve yaakobera kyabazinga ati ninze eyaziikanga abantu be yaitanga. Agho bwe nakitegeera nti bali kuunoonia okwenda okundhita, naalumuka naaja neekweka olw'okutya.

²⁰ Kale bangemaku ebintu byange byonabyona, naasigazaagho bwa mukazi wange Anna na mwana wange Tobia.

Omwana wa muganda wa Tobiti awolerezaagho Tobiti

²¹ Aye ghaali ghaakabitagho enaku ng'oti makumi ana (40), Sennakeribu oyo yaitibwa babiri ku batabane be, era baamala baalumukira mu nsozi edh'e Ararati. Mutabane we owundi Esarahaddoni yaamusikira ku bwakyabazinga. Era oyo yaalonda Ahikari omwana wa muganda wange Anaeli, yaamutaagho abe omughanika we mu bwakyabazinga bwonabwona.

²² Guno gwali mukuzi gwakubiri nga Ahikari alondebwa ku bukulu obwo: kuba Sennakeribu bwe yali ng'akaali kyabazinga w'e Assiria, Ahikari oyo n'eyagheerezanga kyabazinga eby'okunhwa, yaakuliranga eby'obughanika, era yaakuumanga empeta eriku akamanhiso ak'obwakyabazinga. Kale nga bwe yali omwana wa muganda wange, yaaja yampolerezaayo ewa kyabazinga, kyabazinga yandhikiriza okwira e Nineve.