Tito 2 - Baibuli Ekibono kya Katonda 2014

Endhegeresa entuufu

¹ Aye iwe yegeresanga ebyo ebiisania n'endhegeresa entuufu.

² Kubirizanga abasaadha abakulu beefugenga, babenga bantu bakalamu. Batenga amagezi mu bye bakola, babenga baidhuvu mu kwikiriza, mu kugonza ni mu kuguminkiriza.

³ Abakazi abakulu boona bakubirizenga, babenga n'empisa edhigwanira abantu abatya Katonda nga tibasalagania bibono, era nga ti batamiivu. Bateekwa okwegeresanga ebigwaniire,

⁴ memale bagalagirenga bakazi banaibwe abakaali abato okugonzanga baibaibwe n'abaana baibwe.

⁵ Era batenga amagezi mu bye bakola, babenga baamufu, abakola obukalamu emirimo mu maka gaibwe, ab'ekisa era abawulize ye baibaibwe. Memale ekibono kya Katonda kirobenga kuvumibwa.

⁶ Mu nsambo n'endala, kubirizanga abaisuka okwefuganga.

⁷ Era iwe mwene oteekwa okuba eky'okuboneraku ekirungi mu by'okola byonabyona, ng'oli wa mazima era omumalirivu mu kwegeresa kwo.

⁸ Kozesanga ebibono ebituufu byene omuntu by'atasobola kubisaamu maiso olwo, abazigu bo baswale olw'okubula ekibi kye basobola okutwogeraku.

⁹ Koba abairu bawulirenga basengwa baibwe era babasiimyenga mu bintu byonabyona nga tibabatakania,

¹⁰ waire okubaibaku ebyaibwe. Aye boolekenga obwesigwa obw'amazima mu buli kintu, kino kireetere abantu okusiima ebyegeresebwa ku Katonda Omulokozi waife.

¹¹ Kuba ekisa kya Katonda kiboneike, abantu boonaboona baghange okulokoka.

¹² Era kitwegeresa okutya Katonda n'okulekayo okwegomba okw'ensi eno, n'okuba abantu abasobola okwefuga, abeesimbu, era abatya Katonda mu nsi muno.

¹³ Era tube nga tuteegerera olunaku olw'enkabi lwe tusuubira, era nga tuteegerera okuboneka okw'ekitiisa kya Katonda waife omukologho era Omulokozi waife Yesu Kurisito.

¹⁴ Oyo n'eyeeghaayo okutununula mu bibi byaife byonabyona era n'okutufuula abantu be abaamufu abenda einho okukola ebintu ebikalamu.

¹⁵ Yegeresanga ebintu bino ng'olamba era ng'onenianga abantu bo n'obuyinza bwonabwona. Ghatabangagho muntu yeenayeena akunhoomanga.