Ruthi 4 - Baibuli Ekibono kya Katonda 2014

Boazi abayiza Ruthi

¹ Boazi yaaja mu kifo eky'olwekobaano ku mulyango ogwingira ekibuga, yaatyama. Agho omusaadha asobola okuba omusika wa Elimeleki, Boazi ye yayogeraku asooka, yaidha. Boazi yaamweta ati: “Idha Mukagwa, otyameku ghano.” Yeena yaaja yaatyama.

² Boazi yaabonayo abataka abakulu mu kibuga ikumi, yaabasaba boona batyame agho. Era baatyama agho.

³ Agho yaakoba ow'ekika kye oyo ati: “Naomi eyaira ng'ava mu nsi ey'e Moabu, ali kutunda ekibandha ekyali ekya Elimeleki ow'ekika kyaife,

⁴ era nze naadhuuba nti ogwaine okukimanha. Mpegaano ndi kukoba nti oba nga okyenda kigule, ng'abantu abakulu bano abatyaime ghano babona. Aye oba nga tookigule koba, nze nkigule, kuba niiwe omusika asooka memale nze naakwiririra.” Omusaadha yairamu ati: “Ndidha kukigula.”

⁵ Boazi yaakoba ati: “Otyo, ekyo kirungi! Anti okiidhi nti bw'ogula ekibandha ekyo okuva ku Naomi, oba oli n'okutwaliramu Ruthi namwandu Omumoabu, era nga kisigala mu maina ga mufu.”

⁶ Agho omusaadha n'okukoba ati: “Oba nga ebyo bityo bwe biri, nkulekuliire obukumu bwange bwe ndi nabwo okukigula. Tiidha ku kigula, iwe kigule kuba kiba kitegeeza kudobania busika bwa baana bange.”

⁷ Mperaano mu biseera ebyo mu Isiraeli, nga ghaligho empisa ekolebwa mu kugulaana, oba mu kufaanisaamu ekintu: Ng'okukakasa nga mwene kintu ekyo tanhagiibwaku bunhagibwe, ng'atoolamu engaito mu kigere yaagigha ole ali kufuuka mwene kintu ekyo omuyaaka.

⁸ Kale omusaadha bwe yakoba Boazi ati: “Tiidha kukigula, iwe kigule,” yamutooleramu n'engaito yaagimugheeraku.

⁹ Ebyo nga biwoire Boazi yaakoba abataka abakulu abaaligho n'abantu abandi ati: “Olwaleero muli badhulizi, nga ndi kugula ku Naomi ebyo byonabyona ebyali eby'omufu Elimeleki, n'ebyo ebyali eby'abafu batabane be, Kilioni ni Mahaloni.

¹⁰ Okwo kwe nhongereza okutwala Ruthi Omumoabu namwandu wa Mahaloni nga mukazi wange. Olwo, ebintu ebyo tibiidha kuva mu maina ga bafu, era n'amaina gaibwe tigaidha kwerabirwa mu bantu ab'omu kibuga, nti lwa kubulwa musika. Imwe muli badhulizi b'ebyo olwaleero luno.”

¹¹ Agho abataka abakulu n'abantu abandi abaali mu kifo eky'olwekobaano, agho munda ng'omaze okubita mu mulyango ogwingira mu kibuga, baakoba bati: “Yii, tuli badhulizi. Musengwa Katonda aghe enkabi mukazi wo oyo, abe ng'oti ni Rakeli ni Leeya, abo bombi abaavaamu ekika eky'Abaisiraeli. Musengwa Katonda akughe obukombe mu kika eky'Abaefuratha era obe mumanhifu inho mu Bethelehemu.

¹² N'abaana Musengwa Katonda baaja okukugheera mu mughala oyo bagwananga baaleetera amaka go okwegombebwa ng'aga Perezi mutabane wa Yuda ye yazaala mu Tamari.”

¹³ Kale Boazi yaatwala Ruthi ewuwe nga mukazi we. Musengwa Katonda yaamugha enkabi yaatoola enda era yaazaala omwana mulenzi.

¹⁴ Abakazi baakoba Naomi bati: “Musengwa Katonda asaakibwe atakulekuliire agho nga ghazira musika wa kukulabirira! Omwana oyo agwananga yaakula yaaba mumanhifu inho mu Isiraeli mwonamwona!

¹⁵ Mughala wo oyo akugonza inho, akukoleire ebintu kamaala okusinga n'abaana abalenzi omusanvu. Era mpegaano akuzaaliire omwidhukulu, oyo aidha okukwiza obuto, era akulabirire mu myaka gyo egy'obukaire.”

¹⁶ Naomi yaatoola omwana yaamulera okutuusa lwe yakula.

¹⁷ Abakazi ab'oku muliiraano baatuuma omwana eriina Obedi, era baakobera buli muntu bati: “Ruthi azaaliire Naomi omwana omulenzi.” Obedi oyo n'eyazaala Yesse, eyazaala Daudi.

^18-22 Bano ni baidhukulu ba Perezi: Perezi n'eyazaala Hezironi, Hezironi yaazaala Ramu, Ramu yaazaala Amminadabu, Amminadabu yaazaala Nahashoni, Nahashoni yaazaala Salumoni, Salumoni yaazaala Boazi, Boazi yaazaala Obedi, Obedi yaazaala Yesse, Yesse yaazaala Daudi.