Ruthi 3 - Baibuli Ekibono kya Katonda 2014

Naomi agha Ruthi amagezi

¹ Nga ghabiseeghooku entangama, Naomi yaakoba Ruthi ati: “Mwana wange, nteekwa okukufunira omusaadha ofune amaka agago ku bubwo.

² Oidhukira bukalamu oti omusaadha ono Boazi, mwene bakozi bale abakazi be mwalondanga nabo sayiri, atuliku oluganda. Mperaano ni bona, eigulo lino aidha kuba ghale ghe bakubira sayiri, ng'ali kusensa sayiri.

³ Kale naabaku, weesiige akawoowo era ovaale ebivaalo byo ebisinga bukalamu. Bw'omala, oje agho ghe bakubira sayiri, aye bw'otuuka agho bona gh'oba era tiweyolekera Boazi, okutuusa ng'amaze okulya n'okunhwa.

⁴ Bw'omala, weetegereze gh'anaalambaala, era endoolo bwe dhimutoolagho, oje oghembule gha bigere bye, olambaale agho. Aidha kukukobera eky'okukola.”

⁵ Ruthi yaamwiramu ati: “Ebyo byonabyona by'onkobye ndidha kubikola.”

⁶ Kale Ruthi yaaja ghe bakubira sayiri era yaakola nga inhazaala we bwe yamukoba.

⁷ Boazi bwe yamala okulya n'okunhwa yaawulira emiraala n'eisanhu. Kale yaabona agho emungo ya sayiri, yaaja yaalambaala agho. Agho Ruthi yaadhooma mpola, yaaja yaaghembula gha bigere bye, yaalambaala agho.

⁸ Agho nga mu bwire ghagati Boazi bweyaira engulu ni yeekyusa, yaamwezinduka. Okuja okubona nga ghaligho omukazi alambaire gha bigere bye.

⁹ Yaabuuza ati: “Niiwe ani?” Omukazi yaamwiramu ati: “Isebo, ninze Ruthi. Nga bw'ondiku oluganda nkusaba okundabirira.”

¹⁰ Boazi yaamwiramu ati: “Muna, Musengwa Katonda akughe enkabi, kuba obwesigwa bw'oli kwoleka buti businga obwo bwe wayoleka mu ebyo bye wakolera inhazaala wo. Kuba wandibaire buti ng'oli kwenoonezaayo mulenzi muto, k'abe mukombe oba mwavu, aye ekyo ti ky'okoze.

¹¹ Kale ni muna, otafaayo. Ndidha kukukolera kyonakyona ky'oba onsabye, kuba ekibuga kyonakyona kiidhi nga bw'oli omukazi omulungi.

¹² Aye ekituufu kiri nti waire nze nsobola okuba omusika wa balo, eriyo asooka memale nze naamwiririra.

¹³ Mperaano sigala ghano obwire bukye, bwe bunaaba bukyeire twidha kumubuuza oba nga anaakulabirira. Bw'anaaba ng'anaakulabirira, kinaaba kikalamu aye bw'anaaba nga taakulabirire, nze ndayira mu liina lya Musengwa Katonda omulamu nti ndidha kukulabiriranga. Aye buti lambaala bukye.”

¹⁴ Kale yaalambaala agho gha bigere bya Boazi, aye yasitukagho mangu nga bukaali kukyera irala, muntu kughanga kwetegereza mwine kuba Boazi tiyayenda bamanhe nga Ruthi yajaaku ghe bakubira sayiri.

¹⁵ Boazi yaakoba Ruthi ati: “Toolaku ekikubiro ky'ovaire okyandhuluze ghano.” Era Ruthi yaakola atyo. Boazi yaapima kilo ng'oti abiri edha sayiri yaadhimufukira mu kikubiro kye era yaadhimutwika. Ruthi yaira nadho mu kibuga.

¹⁶ Bwe yatuuka ye inhazaala we, inhazaala we yaamubuuza ati: “Mwana wange bikujiiriire bitya?” Yaamubitiramu byonabyona Boazi bye yamukolera.

¹⁷ Era yaayongeraku ati: “Boazi yankobye ati ntaira ye iwe na ngalo nsa, n'okumpa sayiri ono yeenayeena.”

¹⁸ Naomi n'okumukoba ati: “Mwana wange, iwe tyama oteegerere, oidha kubona ekinaavaamu. Boazi taidha kuwuumula olwaleero ng'akaali kugondhoola nsonga dhino.”