Ruthi 2 - Baibuli Ekibono kya Katonda 2014

Ruthi alondalonda sayiri mu musiri gwa Boazi

¹ Naomi yali n'omumanhe mu kibuga omwo nga bamweta Boazi era nga ba kika kirala ni Elimeleki eyali iba. Yali mukombe era nga mutaka mukulu.

² Lulala, Ruthi Omumoabu yakoba Naomi ati: “Njeeku mu misiri eyo nonderonde ku sayiri aja ng'akunkumuka ku bakungula? Nkakasa nga ndidha kwagaanayo ananganha okukola ekyo.” Naomi yaamwiramu ati: “Kola oje mwana wange.”

³ Agho Ruthi yaaja mu misiri yaavanga einhuma ew'abakungula ng'alondalonda sayiri eyajanga ng'akunkumuka ku bakungula. Yaja okweyagaana ng'omusiri gwe yajaamu gwali gwa Boazi eyali n'oluganda ku Elimeleki.

⁴ Bwe ghaabitaghooku entangama, Boazi mwene yaatuuka ng'ava e Bethelehemu. Yaalamusa abakungula ati: “Musengwa Katonda abe n'imwe.” Baamwiramu bati: “Musengwa Katonda akughe enkabi.”

⁵ Boazi yaabuuza omukulu w'abakungula ati: “Omughala ole naani?”

⁶ Omukulu ow'abakungula yairamu ati: “Oyo n'ole omughala Omumoabu eyaidha ni Naomi lwe yaira okuva e Moabu.

⁷ Ansabye mmuganhe avenga einhuma ew'abakungula ng'alondalonda sayiri aja ng'akunkumuka, era okuva enkyo na buti ali kukola atyo. Abaire yaakalekeramu era n'okuja mu kinsense agho okuwolaku.”

⁸ Agho Boazi yaakoba Ruthi ati: “Muna, wulira. Otaja kulonda sayiri mu musiri gundi gwonagwona n'oleka guno. Londeranga agho mu kikunsu kya bakazi baino abali kunkolera.

⁹ Weetegereze omusiri mwe bali kukesa era mw'obe osigale mwonka. Mmaze okukoba abasaadha abali kukungula obutakukobaaku. Era buli lw'owulira endiwo ng'oja onhwa ku maadhi okuva mu nsugha dhe baseneiremu amaadhi.”

¹⁰ Ruthi yaakuba amakiryaivu, yaakutama n'ekyeni kyatuuka ku itaka. Yaakoba Boazi ati: “Yenga oli wa kivunika! Kiviire ku ki ninze omugwira n'ombona era n'ongemerwa ekisa?”

¹¹ Boazi yaamwiramu ati: “Nawulira bukalamu byonabyona bye wakolera inhazaala wo kasookanga balo afa. Era naawulira ni bwe wasalagho okuleka lata wo ni inhoko, n'ensi yo, n'oidha okutyama mu bantu be wali toidhiiku naire.

¹² Nsaba Musengwa Katonda akughe ebirungi olw'ebyo bye wakola Musengwa Katonda oyo owa Isiraeli ye waidha okwewogomamu.”

¹³ Ruthi yaamwiramu ati: “Isebo ondholeike ekisa ekinene, bw'oyogeire ninze mu bibono ebindhiziizaamu amaani, waire nga tibalirwa mu bakozi bo abakazi.”

¹⁴ Esaawa ey'okulya bwe yatuuka, Boazi yaayeta Ruthi ati: “Idha olye ku mere. N'eiva liirino koza.” Kale Ruthi yaatyama ghalala n'abakozi, Boazi yaamugha emere ey'empeke enkalange, yaalya yaiguta bukalamu, yaalekerera n'okulekerera.

¹⁵ Bwe yamala yaasituka yairayo okulonda sayiri. Ng'amaze okuja, Boazi yaalagira abakozi be ati: “Mumuleke alonde sayiri waire oyo agwire agho ebinhwa ghe biri, mutamulobera.

¹⁶ Ekindi, mumutoolerengaku sayiri ku miganda egibali mu ngalo mumulekere agho alonde. Ghatabaagho ayogera kumutiisa.”

¹⁷ Kale atyo yaalonda sayiri mu musiri ogwo okutuusa eigulo einho bwe lyatuuka, yaamukuba yaafunamu sayiri agheza kilo ng'oti ikumi.

¹⁸ Yaamubbeeda yairayo naye mu kibuga. Bwe yatuuka yaamwoleka inhazaala we era yaamugha n'emere ere yeyalekerera.

¹⁹ Inhazaala we yaamubuuza ati: “Ono sayiri yeenayeena omulonze gha olwaleero luno? Musiri gw'ani gw'obairemu? Katonda aghe enkabi omuntu oyo akuboine n'akugemerwa ekivunika!” Agho Ruthi yaakobera Naomi ati sayiri yamulonda mu musiri ogw'omuntu ayetebwa Boazi.

²⁰ Naomi yaakoba ati: “Nsaba Musengwa Katonda aghe Boazi enkabi, kuba olw'okusaasira kwe talekuliire agho balamu oba okwerabira abaafa.” Era yaaja mu maiso yaakoba ati: “Omusaadha oyo waluganda n'ife. Oyo asobola n'okuba omusika wa balo yaatulabirira.”

²¹ Agho Ruthi yaayongeraku ati: “Era akobye ati nsobola okuja naalondanga sayiri ghalala n'abakozi be okutuusa lwe balimala okukungula omusiri gwonagwona.”

²² Naomi yaamwiramu ati: “N'ekyo kyene mwana wange. Kiba kikalamu okuja okulondanga sayiri n'abakazi abakozi ba Boazi. Bw'oja mu musiri ogw'omuntu owundi baghanga okukulumba.”

²³ Kale Ruthi yaajanga, yaalondanga sayiri ghalala n'abakazi abakozi ba Boazi okutuusa bwe baamaliriza okukungula sayiri n'engaano. Ruthi yaasigala ng'aba ghalala n'inhazaala we.