Ruthi 1 - Baibuli Ekibono kya Katonda 2014

Ebyagwira amaka ga Elimeleki

¹ Eira einho, ensi Isiraeli ng'efugibwa balamuzi, endhala yagwa mu nsi eyo Isiraeli. Ghaabaagho omusaadha ow'e Bethelehemu eky'omu Buyudaaya, yaalumuka mu nsi eyo Isiraeli yaaja yaasenga mu nsi Moabu. Yaja ni mukazi we ni batabane baibwe babiri.

² Eriina ery'omusaadha oyo nga ni Elimeleki, ate erya mukazi we nga ni Naomi, ate aga batabane baibwe nga ni ba Mahaloni ni Kilioni. Ekika kyaibwe baali Baefuratha. Baali bakaali eyo,

³ Elimeleki yaafa, Naomi yaasigala yenka nga namwandu, ni batabane be bombi.

⁴ Bano baabayiza ku baghala Abamoabu, owundi nga ni Orupa era n'owundi nga ni Ruthi.

⁵ Bwe ghaabitagho emyaka ng'oti ikumi, abalenzi abo bombi boona baafa. Naomi yaasigala agho nga namwandu, era nga n'abaana bamuwoireku.

Naomi airayo e Bethelehemu yaatwala ni Ruthi

⁶ Nga ghabiseeghooku entangama, Naomi yaawulira nga Musengwa Katonda yaidhukira abantu be yaabagha omwero ogw'emere. Olwo yeetegeka okuva mu Moabu ni banamwandu ba batabane be bombi.

⁷ Baatoolera olugendo bonsatule okwirayo e Buyudaaya. Aye bwe baali baja,

⁸ Naomi yaakoba banamwandu abo ati: “Mwireyo buli muntu ye maama we. Nsaba Musengwa Katonda abe mulungi ye muli, nga imwe bwe mubaire abalungi eri nze n'eri abo abaafa.

⁹ Musengwa Katonda abaghe buli muntu abayire omusaadha owundi era afune amaka ge.” Agho yaabanhwegera ng'abasiibula, aye bombi baatoolera okulira amaziga.

¹⁰ Baamukoba bati: “Busa. Ife twidha kuja n'iwe, tubenga ghalala n'iwe n'abantu bo.”

¹¹ Naomi yaabakoba ati: “Baana bange, mwireyo. Lwaki mwandyenze okuja ninze? Mudhuuba muti nkaaghanga okuzaalayo abalenzi baafuuka baibaimwe?

¹² Mwireyo ewaimwe, baana bange, nze nkairiighe, tighanga kubayira nti oba oli agho nandibaireku n'eisuubi aye era ni bwenandibayiire obwire buno ni nzaala abaana abalenzi,

¹³ mwandibateeze okutuusa ghe bandikuliire? Mwandyekuumye mwaloba kubayira bandi? Busa, baana bange, mbalumirwa inho olw'ekyo Musengwa Katonda kye yankola.”

¹⁴ Agho kabiri baayongera okulira amaziga. Orupa yaanhwegera inhazaala we, yaamusiibula, aye Ruthi yaasigala ng'akeegemye ku inhazaala we.

¹⁵ Naomi yaakoba Ruthi ati: “Oli kubona mughalikwa wo aizeeyo mu bantu be, ni ye bakatonda be, weena irayo.”

¹⁶ Aye Ruthi yaamwiramu ati: “Lekera agho okunkoba oti nkuleke, oba oti ndekere okuja n'iwe. Gh'onaaja woonawoona zeena ghe nnaaja. Amaka g'onabangamu zeena ge nnaabangamu. Abantu bo n'abanaabanga abantu bange, era Katonda wo n'anaabanga Katonda wange.

¹⁷ Mu kifo mw'olifiira zeena mwe ndifiira, era eyo ye balinziika. Musengwa Katonda ampanga ekibonerezo ekisembayo kuba kibi, bwenganhanga ekintu kyonakyona ni kintoola ku iwe, ni bwe kuliba okufa.”

¹⁸ Naomi bwe yabona nga Ruthi mumalirivu okuja naye, yaamuleka baaja.

¹⁹ Baaja batyo bombi okutuusa bwe baatuuka e Bethelehemu. Bwe baatuuka ekibuga kyonakyona kyasuuyirira, ng'abakazi beewuunhia bati: “Ono ni Naomi?”

²⁰ Aye yaabakoba ati: “Mutandheta Naomi, mundhete Mara ekitegeeza okukaayirira, kuba Katonda oyo Aghanga Ebintu Byonabyona yandeetera obulamu okunkaayira.

²¹ Kuba nava kuno nga ndi n'ebyange kamaala aye ndhize makaya. Kale agho nga lwaki mundheta Naomi, ng'ate Musengwa Katonda Aghanga Ebintu Byonabyona aneefuukiire yandeetera okudaagadaaga kuno.”

²² Atyo Naomi bwe yaira ng'ava e Moabu yaira ni Ruthi Omumoabu, namwandu wa mutabane eyafiira e Moabu. Baatuuka e Bethelehemu ng'abantu baakatoolera okukungula sayiri.