Omulangirizi 9 - Baibuli Ekibono kya Katonda 2014

¹ Ebyo byonabyona nabirowoozaaku inho era naabyekebeedha, naabona nga Katonda n'afuga abatuufu n'abagezi, n'ebyo bye bakola. Aye tibasobola kumanha oba nga Katonda oyo abagonza oba abakyagha. Ebintu byonabyona ebija okubatuukaku ye bwidha biziramu muganhulo

² kuba enkomerero y'abantu boonaboona eri ndala, ka babe abatuufu oba ababi, abalungi oba aboonooni, abalongoofu oba abatali balongoofu, abaghaayo emisengo oba abataghaayo misengo. Omuntu omulungi n'ole atali mulungi, bombi bafaanana. N'omuntu alayira n'ole atalayira, boona bafaanana.

³ Ekibi ekiri mu byonabyona ebikolebwa ku nsi, kiri nti enkomerero yaabyo byonabyona eri ndala. Mu myoyo gy'abantu abalamu mwidhwire bibi na iralu, era ekisembayo kuba kufa bufe.

⁴ Aye era ole ng'akaali mu nsi ey'abalamu aba akaali n'eisuubi, kuba embwa enamu esinga empologoma enfu.

⁵ Bwenebwene abantu abalamu bamanha nga baja kufa, aye abafu baba bazira kye baidhi era nga bazira kye bakaasuubira kufuna, kuba baba tibakaidhukirwa naire.

⁶ Baba tibakaali na kugonza, oba okukyagha, waire okwegomba byonabyona biba byawaagho ira, era nga tibakaasobola kukola kintu kyonakyona ekikolebwa ku nsi.

⁷ Kale ja olye emere yo ekuwoomere, onhwe omwenge gwo ogw'emizabbibu osangaale, kuba Katonda ekyo kye yakutegekera.

⁸ Kuumanga ebivaalo byo nga biyondho, era otalobanga kwesiiga bizigo mu maiso n'onhirira.

⁹ Sanhukiranga mu bulamu buno ni mukazi wo y'ogonza, enaku dhoonadhoona edh'obulamu bwo buno obuziramu muganhulo. Ogwo n'omugabo gwo Katonda gw'akugha mu kufaabiikana kwo ku nsi.

¹⁰ Buli mulimo gw'okola gukolenga na maani, kuba eyo e magombe y'olija ezira kukola oba okubaayo okulowooza, era ezira kumanha waire okubaayo amagezi.

¹¹ Kabiri neetegereza eby'oku nsi, naabona nti omuntu omulumusi einho ti n'aghangula embiro edh'okusinganwa, ow'amaani ti n'aghangula olutalo, omugezi ti n'afuna eky'okulya, omutegeevu ti n'aba omukombe, n'omukugu ti n'afuna emirimo egya ghaigulu. Boonaboona bibagwaku bugwe

¹² kuba ghazira muntu aidhi kiseera kye. Ng'ebyenhandha bwe babigemya mu katimba k'omuvubi, n'enhonhi ni badhigemya ku mutego gw'omuyiizi, n'abantu boona batyo bwe bagwa ku bizibu, byabazinduukiriza ng'oti mutego.

Ebindi ebigema ku magezi ni ku busiru

¹³ Ghaligho eky'okuboneraku ekindi ku nsi ekigema ku magezi, ekyambonekera nga kikulu:

¹⁴ Ghaaligho ekibuga ekitono nga kirimu n'abantu batono. Yaavaayo kyabazinga ow'amaani yaalumba ekibuga ekyo, yaakizingiza era yaakibungaku emungo y'eitaka okukyezunguluza, asobole okuniiniraku okukirwanisa.

¹⁵ Mu kibuga omwo mwabaamu omuntu omugezi aye nga mwavu. Omuntu oyo yaakozesa amagezi ge, yaawonia ekibuga ekyo, aye ghaaloba kubaagho yaidhukira muntu oyo omwavu.

¹⁶ Nze nkoba nti amagezi gasinga amaani, waire ng'amagezi ag'omuntu omwavu ganhoomebwa, ni by'ayogera ghaabulagho abiwulirisa.

¹⁷ Omala gawulirisa omugezi by'ayogera empola empola, otawuliriisa mufuzi by'ayogera mu basiru ng'akaabuka.

¹⁸ Amagezi ga maani okusinga eby'okulwanisa eby'omu lutalo, aye omwonooni omulala ati asobola okuzikiriza ebirungi kamaala.