Omulangirizi 8 - Baibuli Ekibono kya Katonda 2014

¹ Naani atuuka ku muntu omugezi? Naani aidhi okwinhonhola amakulu g'ebintu? Amagezi galeetera omuntu okumoga obulungi, yaalekera n'okwenhiinkaala mu maiso.

Okugondera kyabazinga

² Ogonderanga ekiragiro kya kyabazinga olw'ekirayiro kye walayira.

³ Toyanguyirizanga kuva gh'ali nga tosoose kwefumintiriza, oba okumweyawulaku n'oba n'abamutakania kuba kyabazinga ky'ayenda ky'akola.

⁴ Era bw'alagira ghazira airamu, oba okumubuuza ati: “Oli kukola ki ekyo?”

⁵ Oyo agondera ekiragiro kya kyabazinga tafuna buzibu, era omugezi amanha ekiseera n'ensambo ey'okutuukirizaamu ekiragiro ekyo

⁶ kuba buli kintu kiba n'ekiseera kyakyo eky'okukikoleramu, waire ng'ebizibu eby'omuntu biba bingi.

⁷ Omuntu tamanha kija kubaagho, era ghazira asobola kumukobera bwe kija kuba.

⁸ Ghazira muntu ali na buyinza bwa kulobera ku bulamu bwe, oba okusalagho olunaku lw'alifiiraku. Ng'olutalo bwe lutaganha ole alulimu okuluvaamu, n'ekibi kityo bwe kitalekula ole akikoze.

Aboonooni n'abatuufu

⁹ Ebyo byonabyona nabyetegereza bwe nalowooza einho ku ebyo abantu bye bakola ku nsi, naabona ng'abantu abandi bwe bafugisa banaibwe obukambwe, aye ate boonaboona ni balumizibwa abafuzi beene n'abo be bafuga.

¹⁰ Era naabona ababi nga baziikibwa mu kitiibwa. Abantu abo baajanga mu kifo ekitukuvu emikuzi mingi era abantu baabasaakanga mu kibuga mwene mwe baakoleranga ebibi. Ekyo kyona kiziramu muganhulo.

¹¹ Olw'okuba ekibonerezo ekisalirwa omuntu akoze ekibi tibakigheeragho mangu, abantu kyebava beeyongerera irala okukola ebibi.

¹² Aye waire ng'omwonooni asobola okukola ebibi emikuzi kamaala ate yaaghangaala inho, nze ndidhi nti abo abatya Katonda baidha kubanga bukalamu olw'okumutya.

¹³ Aye aboonooni tibaidha kubanga bukalamu, era obulamu bwaibwe bwidha kubanga bumpi ng'oti n'ekinsense bwe kitalwagho, kuba tibatya Katonda.

¹⁴ Ghaligho ekintu ekiziramu muganhulo ekibaagho ku nsi: abantu abatuufu okufuna ekibonerezo ekyandibaire eky'aboonooni, ate aboonooni ni bafuna empeera eyandibaire ey'abatuufu. Ekyo kyona kiziramu muganhulo.

¹⁵ Kale nze mbona ng'omuntu agwaniire okwesanhusanga kuba ku nsi kuzira kirungi kindi okutoolaku okulya, n'okunhwa, n'okwesanhusa. Eryo n'eisanhu omuntu ly'aba nalyo mu kiseera eky'obulamu bwe kyonakyona Katonda ky'amugha ng'ali mu kufaabiikana ku nsi.

¹⁶ Bwe nafuba einho okufuna amagezi, n'okumanha emirimo egikolebwa ku nsi, ni mbona n'engeri abantu ye batatenduka ku ndoolo omusana n'obwire,

¹⁷ naazuula ng'omuntu tasobola kutegeera Katonda by'akola ku nsi ni bwe yeefubiriza atya okubinoonerezaaku. Waire ng'abantu abagezi basobola okukoba nga bwe babiidhi einho, aye mu butuufu tibabiidhi.