Omulangirizi 7 - Baibuli Ekibono kya Katonda 2014

Ebirungi abantu bye bagwaine okuba nabyo mu bulamu

¹ Okuba n'eriina eirungi kuba kwa mughendo okusinga eby'akawoowo eby'omughendo; n'olunaku omuntu lw'afiiraku luba lulungi okusinga lw'azaalibwaku.

² Okuja mu ndhu omuli okulira omufu, kusinga okuja omuli embaga; kuba okufa n'enkomerero ya buli muntu, era abalamu bagwaine okukirowoozangaku.

³ Okubona enaku kusinga okusanhuka, kuba waire enaku yeenhiinkaaza omuntu mu maiso, aye etereeza omwoyo gwe.

⁴ Omuntu omugezi olowooza inho ku nnaku ey'okufa; aye omusiru buli kiseera aba bwa mu binhumo.

⁵ Omala gawulirisa omuntu omugezi ng'akunenia, otawuliriisa nhembo dha basiru.

⁶ Kuba, ng'enku edh'amawa bwe dhitulikatulika mu ziiko ghansi gh'entamu, n'enseko edh'abasiru dhityo bwe dhiwulikana, dhaaloba kubaamu makulu naire.

⁷ Bwenebwene okunhigirizibwa kuleetera omuntu omugezi okukola eby'ekisiru, n'enguzi yaaleetera omuntu okwonooneka.

⁸ Omuntu ali kumaliriza ekintu asinga ole ali kutoolera obutoolere, n'omuntu omuguminkiriza yaasinga ole eyeekuluntaza.

⁹ Otayanguyirizanga kusungughala, kuba mu mwoyo ogw'omusiru mwidhula busungu bwereere.

¹⁰ Otabuuzanga oti: “Lwaki ebiseera eby'eira byalinga birungi okusinga ebirigho buti?” Ekibuuzo ekyo ti kya magezi.

¹¹ Amagezi malungi gali ng'oti kufuna bya busika, gali n'omuganhulo eri boonaboona abali ku nsi;

¹² kuba gakuuma omuntu ng'oti n'empiiya bwe dhimukuuma. Aye ekireetera omuntu omugezi okusingaku abandi kiri nti: amagezi g'aba nago gamugha obulamu.

¹³ Lowooza ku ebyo Katonda bye yakola. Naani asobola okugodolola ekyo Katonda kye yagodagoda?

¹⁴ Olunaku ebintu lwe bikujiiriire obukalamu, osangaalanga, ate lwe bikujiiriire obubi, oidhukiranga oti: Katonda naataagho ebyo byombi, olwo abantu balobenga kumanha biribaagho.

¹⁵ Mu bulamu bwange buno obuziramu muganhulo, mboine ebintu kamaala: Mbona abantu abakola ebituufu nga bafa mangu, waire nga bantu balungi ate naabona abakozi b'ebibi nga baaghangaala, waire nga boonooni.

¹⁶ Kale ni otabitirizanga kuba mutuufu, oba kuba mugezi. Oidha kweita mwene.

¹⁷ Aye era otabitirizanga kuba mwonooni, waire okuba omusiru. Oidha kufa ng'entuuko dho dhikaali.

¹⁸ Kirungi weefugenga, olobenga kubitiriza mu ebyo byombi, kuba oyo atya Katonda aja kuwona ebyo byonabyona.

¹⁹ Omuntu omugezi, amagezi gamuleetera okuba ow'amaani agasinga ag'abafuzi eikumi abali mu kibuga.

²⁰ Bwenebwene ezira muntu mutuufu ku nsi, akola ebirungi ebyereere n'atayonoonaku naire.

²¹ Otatanga inho mwoyo ku buli kintu abantu kye bakoba, olirwa eira waawulira n'ebibi omugheereza wo by'akwogeraku

²² kuba okiidhi bukalamu nga iwe weena, emikuzi kamaala oyogera ebibi ku bantu abandi.

²³ Ebyo byonabyona nabigezaaku nga nkozesa amagezi gange. Agho naakoba nti: “Ndidha kuba mugezi.” Aye amagezi gaanema okugatuukaku.

²⁴ Ebintu ebirigho buti biswikiriire amagezi gaife. Titusobola kubitegeera ni tubimalayo. Naani asobola okubinoonerezaaku n'abitegeera?

²⁵ Agho neemalira ku kunoonereza, nsobole okufuna n'okumanha amagezi, era ntegeere ebintu byonabyona nga bwe biri. Olwo mmanhe ng'omuntu okuba omubi kiba kya busiru, era ng'obusiru buli ng'oti iralu lyene.

²⁶ Nazuula ekintu ekikakali okusinga n'okufa kwene: oyo nga n'omukazi akwenda n'akugemya ng'oti mutego oba ng'oti lutuula, n'akusiba mu mikono gye ng'oti ndhegere. Omuntu akola Katonda by'ayenda asobola okuwona omukazi oyo, aye omwonooni amugwa bwa mu ngalo.

²⁷ Bona eno, Omulangirizi akoba ati ekyo nakizuula mpola nga nja bwe neekalirisa ekintu kirala kirala, nga nhenda okumanha ebintu nga bwe biri.

²⁸ Ekintu kye mbairenga nnoonerezaaku emikuzi kamaala, aye nga nkaali kukizuula, ni kino: Mu bantu olukumi nazuulamu omusaadha mulala yenka omukalamu, aye mu bantu abo boonaboona tyazuulamu mukazi naire mulala ati.

²⁹ Era bona n'ekindi kye nazuula: Katonda yakola abantu nga balungi, aye beene baaja nga beeyonoona.