Omulangirizi 6 - Baibuli Ekibono kya Katonda 2014

¹ Ghaligho ekintu ekibi einho kye nabona ku nsi, ekinhiga abantu:

² Katonda aja yaagha omuntu okuba omukombe, yaaba n'ebintu kamaala, era yaaba n'ekitiibwa, nga ghazira kintu ky'atali nakyo. Aye ate Katonda oyo yaaloba okumuganha okweyagalira mu bintu ebyo, kabiri omuntu atamanhiibwa naire yaabyeyagaliramu. Ekyo kiziramu muganhulo, era kiruma inho.

³ Omuntu asobola okuzaala abaana ekikumi, era yaaghangaala emyaka kamaala. Aye ni bw'aghangaala einho, bw'aba nga tafunie isanhu mu bulamu bwe era nga taziikiibwa bukalamu, nze nkoba nti omwana azaalibwa nga mufu asinga omuntu oyo;

⁴ kuba omwana oyo omufu ghazira muganhulo gw'afuna mu kuzaalibwa. Aidhira mu nzikiiza, era yaajiira mu nzikiiza yeerabirwa.

⁵ Tabona ku ndhuba waire okumanha ekintu kyonakyona, aye awuumula okusinga omuntu ole,

⁶ atafunie isanhu mu bulamu bwe waire ng'aba aghangaire emyaka enkumi eibiri (2,000), kuba era bombi baja mu kifo kirala ekyo.

⁷ Omuntu mu by'akola byonabyona akolerera kufuna kya kulya, aye by'afuna tibimwigusa.

⁸ Omuntu omugezi kiki ky'asingaku omusiru? Ate omuntu omwavu afunamu ki bwe yeebisa obukalamu mu bantu?

⁹ Ekintu ekikyo ky'oli nakyo, kisinga ky'ozira kye weegomba obwegombe. Ekyo kyona muzira muganhulo, era kiri ng'oti kubinga mpewo ogigeme.

¹⁰ Buli kintu ekirigho, kyamala ira okutuumibwa eriina. N'omuntu ekikula kye kimanhiibwa: tasobola kutakana n'oyo amusinga maani.

¹¹ Omuntu y'akoma okwogera ebingi, ni by'ayogera ye bikoma obutabaamu makulu. Kale ekyo omuntu kimugasa ki?

¹² Bwenebwene naani aidhi omuntu ky'agwaniire okufuna mu bulamu bwe obumpi butyo obuziramu muganhulo, era obubitagho obubite ng'oti kinsense? Era naani asobola okukobera omuntu ebiribaagho ku nsi, ng'omuntu oyo aviiregho?