Omulangirizi 5 - Baibuli Ekibono kya Katonda 2014

Toyanguyirizanga kusuubiza

¹ Weegenderezenga inho ng'oli kuja mu isinzizo. Okujaayo n'owulirisa oyege, kisingaku okumala gaghaayo misengo ng'abasiru bwe bakola; kuba tibaidhi nga bali kukola kibi.

² Toyanguyirizanga kwogera n'osuubiza Katonda kintu, kuba Katonda ali mu igulu ate iwe oli ku nsi. Kale oyogeranga bitono

³ kuba y'okomya okwetawula mu bintu kamaala, y'okomya n'okuloota. Era y'okomya okwogera einho, y'okomya n'okwoleka bw'oli omusiru.

⁴ Bw'obanga weeyamye ekintu eri Katonda, otalwangagho kukituukiriza, kuba Katonda tasanhukira basiru. Tuukirizanga kye weeyamye okukola.

⁵ Omala galekayo okweyama, aye oteeyamye n'oloba kutuukiriza kye weeyama.

⁶ Otaganhanga munwa gwo kukuleeteranga kukola kibi, olwo omale okobe omukwenda wa Katonda oti tiwagenderera kukoba otyo. Lwaki okoba ebisungughaza Katonda n'omuleetera okuzikiriza bye wakolerera?

⁷ Bwenebwene omuntu y'akomya okuloota ebirooto ebiziramu makulu, y'akomya n'okwogera ebimuleetera okuzikirira. Aye iwe sigalanga ng'otya Katonda.

Obulamu buziramu muganhulo

⁸ Bw'obonanga abakungu mu ighanga nga batuntuza abaavu, baaloba kubakolera mazima, era baaloba kubakolera ebyo bye bagwaniire okukolerwa, oteewuunhianga kuba buli mukungu abaaku n'omuntu amusingaku amufuga, era n'oyo amusingaku yeena yaabaaku abamufuga.

⁹ Aye nga mu kutwalira aghalala, eitaka ligasa boonaboona, ni kyabazinga yeena aganhulwa mu bikungulwa mu nimiro.

¹⁰ Omuntu ayenda einho empiiya tidhirimumala n'adhiiguta. N'oyo ayenda einho eby'obukombe, ezira magoba galimumala n'agaiguta. Ekyo kyona kiziramu muganhulo.

¹¹ Omuntu y'akomya okufuna ebintu ebingi, n'abo ababirya ye bakoma okweyongera okuba abangi. Kale magoba ki mwene bintu ebyo g'abifunamu, okutoolaku okubiringangaku obulinge?

¹² Omuntu akola n'emikono gye atenduka endoolo dhaamuwoomera, ni bw'aba nga taliire n'aiguta, aye omukombe tatenduka olw'okweraliikirira ebintu by'ali nabyo.

¹³ Ghaligho ekintu kye nabona mu nsi nga kya nnaku inho: eky'omuntu okutereka eby'obukombe nga yeerumya,

¹⁴ aye eby'obukombe ebyo yaabifiirwa bubi inho, yaaloba kusigazaagho kantu ate ng'aliku abaana.

¹⁵ Nga bwe yava mu nda ya inhina ng'ali bwereere, era atyo bw'aja okuva ku nsi. Ghazira ky'alitwala ku ebyo bye yafaabiikanira.

¹⁶ Ekyo kyona kya nnaku inho, omuntu okuja ng'azira k'ali nako nga bwe yaidha. Olwo magoba ki g'aba afunie mu kufaabiikana kwe ng'oti n'abinga empewo okugigema?

¹⁷ Yaamala enaku dhe dhoonadhoona ng'aliira mu nzikiiza, ng'ali mu bulumi, ni mu bweraliikirivu, era nga munakughavu.

¹⁸ Bona eno, nze ekirungi kye nabona omuntu ky'agwaine okukola, kyandibaire kulya, na kunhwa, na kweyagalira mu ebyo by'aba afunie mu kufaabiikana kwe ku nsi, mu nnaku entono edho Katonda dhaamugha okuba omulamu. Ogwo n'omugabo gwe.

¹⁹ Katonda n'agha omuntu obukombe obw'okuba n'ebintu, era yaamugha n'okweyagalira mu bintu ebyo, ng'omugabo gwe Katonda oyo gwe yamutegekera oguva mu kufaabiikana kwe. Ekyo kiba kirabo ekiva eri Katonda.

²⁰ Katonda aleetera omuntu okuba mu masanhu amangi, olwo omuntu oyo yaaloba kulowooza inho ku kiseera kya bulamu bwe.