Omulangirizi 4 - Baibuli Ekibono kya Katonda 2014

¹ Bwe nava ku ebyo, naabona abantu bwe batuntuzibwa mu nsi, ni balira amaziga, aye nga ghazira n'abayamba. Abantu abo tibafuna abayamba, kuba ababatuntuza, ni beene abo abali mu buyinza.

² Ekyo kyandeetera okulowooza nti abaafa eira beesiimye okusinga abo abakaali abalamu.

³ Aye abo abakaali kuzaalibwa n'abeesiimye einho, okusinga abo abakaali abalamu ni bale abaafa kuba bakaali kubona bikolwa bibi ebikolebwa mu nsi.

⁴ Agho naabona ng'ekireetera abantu okukola einho ni bakuguka mu mirimo, kuba kwegomba kufuna ebirungi banaibwe bye baba nabyo. Ekyo kyona muzira muganhulo, era kiri ng'oti kubinga mpewo ogigeme.

⁵ Ghaligho ensambo ekoba eti: Omusiru azingira emikono, okutuusa lw'atuuka okweisa endhala mwene.

⁶ N'eyindi eti: Omala gafuna katono k'ogemera mu mukono omulala ng'oli n'emiraala, otafunie kinene ky'ogemera mu mikono ebiri ng'oli kufaabiikana, ng'oti n'abinga empewo okugigema.

⁷ Kabiri naabona ekindi ekiziramu muganhulo mu nsi.

⁸ Ghabaagho omuntu aziraku mwana oba muganda we, aye nga buli kiseera ayenda kweyongera kufuna bya bukombe. Nga tiyeebuuzaaku ati: “Ndi kufaabiikanira ani, ni ndoba okwesanhusa?” Ekyo kyona kiziramu muganhulo, era kireeta n'enaku.

⁹ Abantu ababiri basingaku omulala, kuba bwe bakolera aghalala babeeranwa.

¹⁰ Bwe bagwa, owundi abbeedagho mwine yaamwemereza. Aye ali yenka akagwireku, kuba bw'agwa azira amubbeedagho kumwemereza.

¹¹ Era abantu ababiri bwe balambaala aghalala mu biseera eby'empewo basuugha, aye omulala asobola atya okusuugha?

¹² Waire ng'omuntu asobola okulwanisa ole ali yenka yaamughangula, bwe baba ababiri bamulema. Omugugha ogw'enkosi eisatu tigukutuka mangu.

¹³ Omala gaba muto ng'olimu amagezi waire ng'oli mwavu, aye otabaire kyabazinga mukaire omusiru era atawulirisa magezi ge bamugha.

¹⁴ Omuntu asobola okuzaalibwa mu nsi ye nga mwavu oba yaaviira mu ikomera, yaafuuka kyabazinga.

¹⁵ Nabona abantu boonaboona ababa ku nsi, nga n'omuli n'omwisuka aja okwira mu kifo kya kyabazinga oyo.

¹⁶ Abantu kyabazinga b'afuga baba kamaala inho abatabalika, aye bw'afa ezira aidhukira kumusiima olw'ebyo bye yabakoleranga. Bwenebwene ekyo kyona muzira muganhulo, era kiri ng'oti kubinga mpewo ogigeme.