Omulangirizi 3 - Baibuli Ekibono kya Katonda 2014

Buli kintu kiri n'ekiseera kyakyo

¹ Buli kintu ekiba ku nsi kibaaku ekiseera kyakyo, era buli kintu ekikolebwa kiba n'ekiseera kyakyo ekituufu:

² Ekiseera eky'okuzaalibwa, n'ekiseera eky'okufa; ekiseera eky'okusiga, n'ekiseera eky'okukungula ebyasigibwa.

³ Ekiseera eky'okwita, n'ekiseera eky'okuwonia. Ekiseera eky'okumenha, n'ekiseera eky'okuzimba.

⁴ Ekiseera eky'okuwowoola, n'ekiseera eky'okuseka. Ekiseera eky'okulira, n'ekiseera eky'okukina.

⁵ Ekiseera eky'okusuula ere amabaale, n'ekiseera eky'okusoloza amabaale. Ekiseera eky'okugwa omuntu mu kifuba, n'ekiseera eky'okuloba okumugwamu.

⁶ Ekiseera eky'okufuna, n'ekiseera eky'okufiirwa. Ekiseera eky'okukuuma ekintu, n'ekiseera eky'okukisuula ere.

⁷ Ekiseera eky'okukanulamu engoye olw'enaku, n'ekiseera eky'okutunga. Ekiseera eky'okusirika, n'ekiseera eky'okwogera.

⁸ Ekiseera eky'okugonzania, n'ekiseera eky'okukyagha. Ekiseera eky'entalo, n'ekiseera eky'emiraala.

⁹ Magoba ki omukozi g'afuna mu kufaabiikana kwe?

¹⁰ Nabona nga Katonda yateeragho abantu okwetawulanga mu kufaabiikana.

¹¹ Yaakola buli kintu nga kija bukalamu mu kiseera kyakyo. Yaata mu bantu omwoyo ogwenda okumanha ebyaligho, n'ebirigho, era n'ebiribaagho, aye yaaloba kubagha kumanha mwene Katonda by'akola okuva mu kwinhama okutuuka ku nkomerero.

¹² Ndidhi nti abantu kye bandikoze ekisinga, kyandibaire kya kubanga basangaavu, na kwesanhusanga ekiseera kyonakyona kye baba abalamu.

¹³ Era ndidhi nga Katonda n'agha omuntu okulya, n'okunhwa, n'okweyagalira mu ebyo by'aba afunie mu kufaabiikana kwe.

¹⁴ Katonda oyo buli ky'akola kibaagho byanda na byanda, ghazira kisoboka kwongerwaku waire okutoolebwaku. Yakola atyo, abantu bamutyenga.

¹⁵ Ebintu ebirigho buti byalighooku, n'ebyo ebija okubaagho byaligho ira. Katonda alagira ebyo ebyalighooku, kabiri byairamu okubaagho.

Abantu mu nsi tibakola mazima

¹⁶ Era nabona nga ku nsi, mu kifo aghandibaire okukola amazima oyagaanagho bikolwa bibi, ni mu kifo aghandibaire obutuufu woona waayagaanagho bikolwa bibi.

¹⁷ Naakoba mule nti: “Katonda aja kusalira abatuufu n'ababi omusango, kuba buli kintu na buli kikolwa yakiteeragho ekiseera kyakyo.”

¹⁸ Era naakoba mule nti Katonda aleba abantu, asobole okubalaga nga beene boona bali ng'oti nsolo busolo

¹⁹ kuba ekija okutuuka ku beene, n'ekija okutuuka ni ku nsolo. Beene baja kufa, n'ensolo dhoona dhife, empewo ye bagheera dhoona ye dhigheera. Abantu bazira kye basinga nsolo, kuba obulamu bw'omuntu n'obw'ensolo buziramu muganhulo.

²⁰ Ekifo abantu ye baja, n'ensolo ye dhija: bava mu nkungu era kabiri baira mu nkungu, n'ensolo dhityo.

²¹ Naani aidhi oba ng'omwoyo gw'omuntu guja ghaigulu ate ogw'ensolo gwaja ghansi mu itaka?

²² Kale naabona ng'omuntu kye yandikoze ekisinga, kyandibaire kya kweyagalira mu ebyo by'akoze. Ogwo nga n'omugabo gwe. Kuba naani asobola okumwiza okubona ebija okubaagho nga mwene amaze okufa?