Omulangirizi 2 - Baibuli Ekibono kya Katonda 2014

¹ Naakoba mule nti: “Kale ni ka ngezeeku ebinhumo, neesanhuse.” Aye naabona nga kyona kiziramu muganhulo.

² Naakoba nti: “Okwira agho mu kuseka obuseke, kuli ng'oti kugwa iralu, n'amasanhu gazira kye gagasa.”

³ Naanoonereza inho n'amagezi, naalowooza ku ky'okwesanhusa nga nhwa omwenge gw'emizabbibu, mbe ng'omusiru bw'akola. Nga nkoba nti oba katyo, ekyo abantu kye bagwaine okukola ku nsi mu nnaku entono edho, dhe bamala ku nsi nga balamu.

⁴ Neekolera ebintu kamaala: naazimba amayumba, naasimba amasamba ag'emizabbibu.

⁵ Naalima enimiro, naadhisimbamu emiti egy'ebibala egya buli kika.

⁶ Naasima ebidiba eby'okutoolangamu amaadhi ag'okufukirira emiti egyo.

⁷ Naagula abairu abasaadha n'abakazi, era n'abairu abandi baabazaalira mu maka gange. Naaba n'ebyayo kamaala, omuli ente n'entaama n'embuzi, naasinga n'abo boonaboona abansooka okuba mu Yerusalemu.

⁸ Naasoloza feeza, ni zaabu, n'eby'obukombe ebindi kamaala okuva mu biketezo bye nafuganga. Naataagho abasaadha n'abakazi abaanhemberanga, era naaba n'abakazi ab'embali ng'omusaadha yeenayeena bwe yaalyenze.

⁹ Nafuuka mukologho okusinga abo boonaboona abansooka okuba mu Yerusalemu, era naasigala nga ndi mugezi.

¹⁰ Buli kintu amaiso gange kye geegombanga, nga nkifuna. Na buli ekisanhusa kyonakyona omwoyo gwange kye gwayendanga, nga nkyetuusaaku. Kale naasanhukanga olw'ebyo byonabyona bye nakolanga, era eyo yaaba nga n'empeera ye nafunanga mu ebyo byonabyona bye nakolanga.

¹¹ Agho naalowooza ku bintu byonabyona bye nakola, n'okufaabiikana kwange nga mbikola, naabona nga byonabyona muzira muganhulo, nga kiri ng'oti kubinga mpewo ogigeme. Mu butuufu ghazira kintu kiri na mugaso ku nsi.

¹² Kale naira ku kulowooza ku magezi n'eiralu n'obusiru, kuba kyabazinga azira kiyaaka ky'asobola kukola ole ye yasikira ky'ataamala ira kukola.

¹³ Agho naabona ng'amagezi malungi okusinga obusiru, ng'obutangaavu bwe buli obulungi okusinga enzikiiza.

¹⁴ Omuntu omugezi atambula ng'abona y'aja, aye omusiru atambula ng'oti ali mu nzikiiza. Aye ate nazuula nti ekija okutuuka ku musiru, n'ekija okutuuka ni ku mugezi.

¹⁵ Olwo naakoba mule nti: “Ekituuka ku musiru n'ekija okutuuka ni ku nze, kale nabeerera ki omugezi einho ntyo?” Kyenava ni nkoba mule nti ekyo kyona muzira muganhulo,

¹⁶ kuba omugezi tibamwidhukira, ng'oti n'omusiru yeena bwe batamwidhukira. Mu biseera ebiidha, boonaboona baliba beerabirwa ira. Ng'omugezi bw'afa, n'omusiru yeena bw'afa.

¹⁷ Kale naakyagha obulamu, kuba kiisi ekikolebwa ku nsi kiinumya bulumye. Byonabyona biziramu muganhulo, biri ng'oti kubinga mpewo ogigeme.

¹⁸ Agho naakyagha ebintu byonabyona bye nakola ku nsi nga nfaabiikana, kuba nabona nga nja kubirekera oyo aja okwiragho nga nze nviiregho.

¹⁹ Ate nga waire ghazira aidhi, oba omuntu oyo aja kuba mugezi oba musiru, aye era oyo n'aja okwefuga ebyo bye nfaabiikaniire ku nsi nga nkozesa amagezi gange. Ekyo kyona muzira muganhulo.

²⁰ Kale naatuuka okweidhusa n'okuwaamu eisuubi mu mirimo gyange gye nakola ku nsi nga nfaabiikana,

²¹ kuba omuntu asobola okukola ebintu n'amagezi ge, n'obukugu, era n'obwegendereza, aye by'akoze byonabyona yaabirekera omuntu owundi ataabikolerera. Ekyo kyona muzira muganhulo, era kibi inho.

²² Kale olwo omuntu afunamu ki mu bintu by'afaabiikanira nga yeerumya ku nsi?

²³ Ekiseera eky'obulamu bwe akimala mu bulumi na kweraliikirira, n'obwire yaaloba kutenduka, kuwuumuza ku birowoozo. Ekyo kyona muzira muganhulo.

²⁴ Omuntu kye yandikoze ekisinga, kyandibaire kulya, na kunhwa, na kweyagalira mu ebyo by'aba afunie mu kufaabiikana kwe. Aye ekyo kyona nabona nga kiri mu buyinza bwa Katonda

²⁵ kuba aghazira Katonda naani asobola okulya oba okusanhuka?

²⁶ Omuntu asiimya Katonda, Katonda amugha amagezi n'okumanha era n'eisanhu, aye omwonooni Katonda amugha gwa kusoloza nga bw'atereka obukombe, amale abughe oyo asiimya Katonda. Ekyo kyona muzira muganhulo, era kiri ng'oti kubinga mpewo ogigeme.