Omulangirizi 12 - Baibuli Ekibono kya Katonda 2014

¹ Idhukiranga Omutonzi ng'okaali mwisuka, enaku embi nga dhikaali kutuuka n'emyaka nga gikaali kutuuka mw'olikobera oti: “Tikaanhumirwa bulamu.”

² Mu kiseera ekyo oliba nga tokaabona bulungi butangaavu bwa muunienie, oba bwa mwezi, waire obw'endhuba. Era ng'olwo ebire biira ku igulu byagema ng'amaadhi gamaze okugwa.

³ Ng'olwo emikono gyo egyakutaasanga gidhugumira, n'amagulu go buti ag'amaani, nga ganafiighe. Ng'amaino tigakaanoza mere olw'okusigalamu amatono, era nga n'amaiso gaidhieku ekifu.

⁴ Amatu go nga tigakaawulira bulungi maloboozi ga bantu bali mu nguudo, oba okuwulira abaghala abali kwemba, waire okuwulira okusa kw'olubengo. Era nga n'amamiro ag'akanhonhi obunhonhi akali kwemba gakuzuusa mu ndoolo.

⁵ Ng'otya okuba mu bifo ebyeruupye ghaigulu, era ng'otya n'okutambula mu ngira wenka. Olwo nga n'enviiri dhifuuse ndheru, ng'okwetuka bukwetuke ng'oti isisi, era nga tokaali na kye weegomba. Ng'otuusiiza okuja mu kiwuumulo kyo eky'olubeerera, era nga n'abalizi bali kwesomba mu nguudo.

⁶ Omugugha ogwa feeza guliba gukutwike, n'ekibya ekya zaabu nga kimenheike, n'omugugha gwe basibaku ensugha esena amaadhi mu nsulo nga gukutwike, nga n'ensugha yeene emenheike.

⁷ Olwo ng'omubiri gwira mu itaka mwe gwava, n'omwoyo nga gwirayo ye Katonda eyagukugha.

⁸ Omulangirizi akoba ati Ghazira kintu kiri na muganhulo, bwenebwene ebintu byonabyona biziramu muganhulo naire.

Okufundikira

⁹ Olw'okuba Omulangirizi yali mugezi, yeeyongeranga okusomesa abantu eby'okumanha. Yeekebeedhanga ensambo, yaadhisengeka bukalamu n'obwegendereza bungi.

¹⁰ Yakozesanga ebibono ebinhoonha, aye nga by'aghandiika bituufu era nga bya mazima.

¹¹ Abantu abagezi bye boogera byogi, ng'oti n'oluti olusongovu omwayi lw'akozesa okusindiikiriza ente okutambula. Ate ensambo edhaasolozebwa dhisigala nga dhikaaligho, ng'oti n'omusumaali gwe baakomerera ni guguma begulugulu. Era ensambo edho dhaatugheebwa Katonda, Omwayi waife atulabirira.

¹² Mwana wange, ghaligho ekintu ekindi ky'ogwaine okumanha: okughandiika ebitabo tikukoma, n'okusoma einho kukooya omubiri.

¹³ Byonabyona bye nkobye obiwuliire. Kale ni tyanga Katonda era ogemenga amateeka ge, kuba eyo n'ensonga eyatondesa omuntu.

¹⁴ Era Katonda aja kutusalira omusango ku byonabyona bye tukola, ka bibe ebirungi oba ebibi, nga kw'otaire n'ebyo ebikolebwa mu ngiso.