Omulangirizi 11 - Baibuli Ekibono kya Katonda 2014

Omuntu omugezi by'akola

¹ Banga mugabi, osuulenga emere yo ku maadhi, nga ghabiseegho ekiseera eidha kukwirizibwanga.

² Ebintu byo obigabirangaku abantu abagheraku, ng'oti musanvu oba munaana, kuba tosobola kumanha kizibu kija kukugwira ku nsi kuno.

³ Ebire bwe biidhula amaadhi, bigafuka gaagwa ku nsi; n'omuti ghe gugwire, ghe gusigala gheene agho, ka ghabe ku luuyi olw'omukono omusaadha oba ku lw'omugooda, olw'e buvandhuba.

⁴ Ole eyeetegereza empewo nga bw'eri kuja, tasiga mu biseera bitali bituufu; n'ole eyeekalirisa ebire nga bwe byekuluumulula, takungula mu biseera bitali nibyo.

⁵ Nga bw'otaidhi ngira empewo y'ebitamu, waire okumanha amagumba bwe gakulira mu nda ey'omukazi ali enda, era otyo bw'otaidhi ngeri Katonda y'akolamu ebintu byonabyona.

⁶ Osiganga ensigo dho ku nkyo era n'eigulo otyo aghazira kwisa mukono, kuba toidhiiku dhinaakula bukalamu; ka dhibe dh'osize ku nkyo oba dh'osize eigulo oba dhoonadhoona.

⁷ Obutangaavu bulungi, era omuntu bw'abona endhuba asangaala.

⁸ Omuntu bw'aghangaala emyaka emingi, agwaine agisanhukirengamu gyonagyona. Aye ate aidhukirenga ng'enaku edh'okuba mu kizikiiza ng'afiire dhija kuba kamaala. Ebyo byonabyona ebiriidha biziramu muganhulo.

Okugha abaisuka amagezi

⁹ Iwe omwisuka, sagambira mu bwisuka bwo era weeyagale ng'okaali mwisuka. Kolanga ebyo by'oyenda, era weetuusengaku ebyo omwoyo gwo bye gwegomba. Aye manha nti Katonda aja kukusalira omusango olw'ebyo byonabyona.

¹⁰ Weewonienga ebyo ebikweraliikiriza mu mwoyo, n'ebyo ebikuleetera okulumizibwa mu mubiri, kuba okuba omuto n'okuba omwisuka, byombi biziramu muganhulo.