Omulangirizi 1 - Baibuli Ekibono kya Katonda 2014

Obulamu bulimu muganhulo ki?

¹ Omulangirizi eyali mutabane wa Daudi, era nga kyabazinga mu Yerusalemu, akoba ati:

² Ghazira kintu kiri na muganhulo, bwenebwene ebintu byonabyona biziramu muganhulo naire.

³ Magoba ki omuntu g'afuna mu kufaabiikana kwe kwonakwona, kw'afaabiikanira ku nsi?

⁴ Oluse luno luvaagho, oluse olundi lwairagho, aye ensi esigalagho byanda na byanda.

⁵ Endhuba evaayo ku nkyo, yaamala yaagwa eigulo, kabiri yaayangugha okwirayo y'eviira.

⁶ Empewo efuuwa yaaja ku luuyi olw'omukono omusaadha olw'e buvandhuba, ate yaakyuka yaaja ku luuyi olw'omugooda. Kabiri yaafuuwa nga yeezungulula, olwo yaira ye yaviire.

⁷ Emiiga gyonagyona gikuuluula gyafuka mu nhandha, aye enhandha teidhula. Buli mwiga gusigala nga gukuuluulira eyo ye gukuuluulira buliidho.

⁸ Ebintu byonabyona bikooya, byaleetera omuntu okwesinwa ebitaloodheka. Amaiso tigalingirira ni gaiguta bye gabona, waire amatu okuwulira ni gaiguta bye gawulira.

⁹ Ekintu ekyalighooku era n'ekija okubangagho, n'ekintu ekyakolebwaku era n'ekija okukolebwanga. Ghazira kintu kiyaaka ku nsi.

¹⁰ Ghaligho ekintu ole ky'asobola okukoba ati: “Bona eno, kino kiyaaka?” Aye nga mu butuufu tikiba kiyaaka naire, kiba kyaligho ira nga n'ife tukaali kubaagho.

¹¹ Abantu abaligho buti tibaidhukira byaligho. N'abantu abalibaagho ye bwidha eyo, tibaliidhukira ebyo ebiriba nga bimaze okubaagho.

Omulangirizi bye yabona

¹² Nze Omulangirizi nali kyabazinga wa Isiraeli mu Yerusalemu.

¹³ Neeghaayo n'amagezi gange, naanoonereza era naayagaaza byonabyona ebikolebwa ku nsi. Naabona ng'ebyo byonabyona, n'omulimo omukalangufu ogutasanhusa naire, Katonda gwe yagha abaana ab'abantu okwetawulamu.

¹⁴ Nalingirira ebintu byonabyona ebikolebwa ku nsi, naabona nga byonabyona biziramu muganhulo, nga kuli ng'oti kubinga mpewo ogigeme.

¹⁵ Ekintu eky'engode ole tasobola kukigodolola, n'ekintu ekiziragho ole tasobola kukibala.

¹⁶ Agho naakoba mule nti: “Nfuuse muntu mukologho era omugezi einho, naasinga abo boonaboona abansooka okufuga mu Yerusalemu. Bwenebwene mboine ebintu kamaala, byandeetera okumanha n'okutegeera.”

¹⁷ Neeghaayo inho nsobole okumanha okwawulagho amagezi n'eiralu, n'obusiru. Aye naabona nga kyona kiri ng'oti kubinga mpewo kugigema.

¹⁸ Omuntu y'akomya okuba n'amagezi amangi, y'akomya n'okusoberwa; era y'akoma okweyongera okumanha ebingi, y'akoma n'okuba n'enaku.