Olwembo 8 - Baibuli Ekibono kya Katonda 2014

¹ Ha, kale ngoli wali mwanhinaze eyayonka ku mabeere ga maama, memale ni nkwagaana eyo ku luya, nandikunhwegeire ghaabulagho n'omuntu ankobaku.

² Nandikutwaire naakwingiza mu ndhu ya maama, wandhegeresa okugonza nga tuli eyo. Nandikughaire waanhwa omwenge ogw'emizabbibu ogutabwirwamu ebiguwoomya, naakugha waanhwa n'omubisi gwe bakunhie mu mikomamawanga gyange.

³ Omukono gwe omugooda aguziziike ghansi agh'omutwe gwange, ate omukono gwe omusaadha gungemereire.

⁴ Imwe abaghala ab'e Yerusalemu, ndi kubakoba mulayire, muti timwidha kutabulatabula waire okusiikuula okugonza kwaife, okutuusa nga ife beene twenze.

Olwembo olwomukaaga Abakazi

⁵ Naani oyo ali kwidha ng'aviira mu irungu, nga bagemagaine n'omugonzi we? Nasiikuula okugonza kwo nga ndi ghansi agh'omuti ogw'ebibala, agho mu kifo inhoko ghe yali mu kulumwa ng'akuzaala.

Omukazi

⁶ Gonzanga mulala nze zenka, onsibe ku omwoyo gwo ng'akamanhiso. Olobenga kugemerera wundi mu makono go okutoolaku nze zenka. Kuba okugonza kuli n'amaani agaagayaga n'ag'olumbe; eighali liri n'obukambwe obwagayaga n'obw'okufa. Okugonza kutumbuka ng'oti muliro gwene, kwayokya ng'oti n'omuliro oguli kubbeibbera ogw'amaani.

⁷ Okugonza ni bw'okufukirira amaadhi amangi einho tikuzima; ni bwe guba omwidhuzo gw'amaadhi tigasobola kumira kugonza okwo, ni kudimira. Ole bw'aghaayo obukombe bwonabwona bw'ali nabwo agule okugonza, bamunhooma bunhoome.

Baanhina b'omukazi

⁸ Tuli ni mwanhinaife omuto, akaali okusunia amabeere. Tulimukolera ki bwe ghalibaagho aidha okumukobya?

⁹ Mwanhinaife oyo bw'anaaba ekisenge, twidha kumuzimbaku omunaala ogwa feeza. Aye bw'anaaba olwigi, twidha kumukomereraku embaawo edh'omuvule, abe munda mwadho.

Omukazi

¹⁰ Ndi kisenge, era amabeere gange n'eminaala egy'oku kisenge ekyo. Bwemba aghali omugonzi wange, mba bukalamu naawulira emiraala.

Omusaadha

¹¹ Solomoni yali n'eisamba ery'emizabbibu e Baali Hammoni. Abalimi baalipangisa, nga buli muntu asasula ebitundu bya feeza lukumi (1,000) okulimiramu.

¹² Solomoni k'afune ebitundu bye ebya feeza olukumi (1,000), n'abalimi abapangisa bafunemu ebitundu ebikumi ebibiri (200). Aye eisamba eryange lirigho nga lyange ku bwange.

¹³ Iwe omugonzi wange aba eyo mu nimiro, banange bali kuteegerera okuwulira amamiro go. Kale ni yogeraku mpulire.

Omukazi

¹⁴ Omugonzi wange iwe, yangughaku oidhe ng'oti n'empuuli, oba ng'oti n'empongo ento ku nsozi edhimeraku ebiwoomesa emere.