Olwembo 7 - Baibuli Ekibono kya Katonda 2014

Omusaadha

¹ Iwe omughala omumbeedha, ebigere byo nga birungi mu ngaito. Ebiteege byo birungi ng'oti n'amabaale ag'omughendo, agaaseeneibwa omukozi omukugu einho.

² Omudondo gwo guli ng'oti kikopo ekirimu omwenge ogw'emizabbibu omutabule obukalamu. Enda yo eri ng'oti kinhwa kya ngaano kye basibiisa ebimuli ebyetebwa liri.

³ Amabeere go gombi gaboneka bulungi, ng'oti n'empuuli ento eibiri enongo.

⁴ Enkoto yo ndeeyiriri ng'oti n'omunaala ogwakolebwa mu masanka. Amaiso go gamesunkana ng'oti n'amaadhi agali mu bidiba, ebiri gha mulyango ogwetebwa ogwa Bathirabbimu, mu kibuga Heshiboni. Enhindo yo ntereevu ng'oti n'ekituuti ekirengererwaku eky'e Lebanoni, ekiringiriiza Damasiko.

⁵ Omutwe gwo guli ghaigulu bulungi ng'oti n'olusozi Karumeli. Enviiri dho dha kitiibwa ng'oti langi ya nakasooma. Obulungi bwo bwasaamiriza ni kyabazinga.

⁶ Omugonzi wange iwe, ng'oli mulungi okufa obufe! Ng'okugonza kwo kuneesiimisa ebitaloodheka!

⁷ Oli mulangaadhu ng'oti n'omuti omunaazi, n'amabeere go gali ng'oti n'ebifaaganda eby'ebibala byaku.

⁸ Era naakoba nti: “Ndidha kuniina ku muti omunaazi ogwo, neegeme ku nsaga dhaagwo.” Amabeere go gali ng'oti n'ebifaaganda eby'emizabbibu, n'akawoowo ak'omuuka gw'ogheera kaaba ng'oti kawoowo ka bibala.

⁹ Omunwa gwo bye gwogera biwooma ng'oti n'omwenge ogw'emizabbibu ogusingayo bulungi. Ogwo n'omwenge ogugwaniire okunhwebwa omugonzi wange, gumubite mu kanwa ni mu maino, gumughegheeze amamiro.

Omukazi

¹⁰ Omugonzi wange oyo, nze ndi wuwe, era yeena ayenda nze.

¹¹ Idha eno, omugonzi wange iwe, tujeeku mu byalo tubeeku eyo.

¹² Ka tuwuune inho, tuje mu masamba ag'emizabbibu, tubone oba nga emizabbibu gitaireku ebituutwa, era nga gimuliisa n'okumulisa, era oba nga emikomamawanga gireese ekimuli. Eyo ye ndidha okukulaga nga bwe nkugonza.

¹³ Eyo oidha kuwunhiza akawoowo akava ku bimera ebyetebwa mandurake. Era ebibala byonabyona ebirungi biidha kuba agho ku mulyango gwaife. Omugonzi wange iwe, nkuleeteire ebisanhusa ebiyaaka n'ebikaire.