Olwembo 6 - Baibuli Ekibono kya Katonda 2014

Abakazi

¹ Mukazi iwe asinga obulungi mu bakazi boonaboona, omugonzi wo ajiire gha, tukubeereku okumunoonia?

Omukazi

² Omugonzi wange ajiire mu nimiro ye omuli obuwoowo obw'omu mere. Ajiire kwayira eyo ebyayo bye n'okusolozaayo ebimuli ebyetebwa liri.

³ Omugonzi wange oyo, wange, zeena ndi wuwe. Ayayira ebyayo bye mu bimuli ebyetebwa liri.

Olwembo olwokutaanu Omusaadha

⁴ Iwe omugonzi wange, oboneka bulungi ng'oti n'ekibuga Tiruza, oboneka bulungi ng'oti n'ekibuga Yerusalemu. Ate otiisa ng'oti n'eigye erisitwike okulwana.

⁵ Lekera agho okuuningirira otyo, kuba amaiso go gampangwire. Enviiri dho dhiikirira ku mutwe gwo ng'oti n'ekighaso eky'embuzi, bwe kiikirira ku lusozi Gileadi.

⁶ Amaino go gatukula ng'oti kighaso kya ntaama dhe baakamala okusalaku obuviiri ni badhinaaza, ni dhitambula nga dhiri ibiri ibiri, nga ghazira eziragho.

⁷ Amatama go nga gali mu kitambaala kyo kye weeghembereire, gaboneka bulungi ng'oti kibala kya ku mukomamawanga, kye basazeemu aghabiri.

⁸ Waire nga kyabazinga ali ni bainhebantu nkaaga (60), n'abakazi abandi ab'embali kinaana (80), n'abaghala kamaala nga tibabalika,

⁹ nze omugonzi wange ali mulala yenka omulungi ng'oti njiibwa, era aziraku ghe yakyama naire. Oyo n'omwana omughala yenka ku inhina, era omugonzi einho ku inhina oyo. Abaghala boonaboona abamubonaku bamwesiimisa, ni bainhebantu n'abakazi ba kyabazinga abandi ab'embali boona bamusaaka.

¹⁰ Nga bakoba bati: “Naani ono ali n'amaiso ng'oti n'endhuba eri kuvaayo, aboneka obulungi ng'oti mwezi, amesunkana ng'oti kwaka kwa ndhuba, ate atiisa ng'oti n'eigye erisitwike okulwana.”

Omukazi

¹¹ Agho nze naikirira, naatuuka mu nimiro ey'amaido ag'oku muti, okubona ebibala eby'omu kiiko nga bwe bimuliisa ekimuli, n'okubona oba nga emizabbibu gitaireku ebituutwa, era oba nga emikomamawanga gireese ekimuli.

¹² Naja okweidhuukiriza nga ndi kuloota, nga ndi mu kigaali eky'omu lutalo ghalala n'omugonzi wange.

Abakazi

¹³ Ira eno, iwe omughala Omushulamu, ira eno tukulingirire ku. Lwaki mwenda okuuningirira nze Omushulamu, ng'oti n'abalingirira omukini akinira mu nhiriri edh'abantu abali kubona bw'akina?