Olwembo 5 - Baibuli Ekibono kya Katonda 2014

Omusaadha

¹ Mwanhinaze iwe omugole wange, ndidhie mu nimiro yange, naasoloza obuwoowo bwange obwa mirra n'obuwoowo obundi, naalya ku mudheenene gwange ogw'endhuki ni ku bisasala byagwo, era naanhwa ni ku mwenge gwange ogw'emizabbibu ni ku mata gange. Imwe abagonzania, mulye era munhwe, munhwere irala mwigute omukwano.

Abakazi Olwembo olwokuna Omukazi

² Nali ntendwike, aye nga omwoyo gwange guli kuwulira. Agho naawulira ng'omugonzi wange ali kukonkona ku lwigi, ng'akoba ati: “Ndhiguliraagho, mwanhinaze iwe omugonzi wange, iwe aziraku ghakyamu naire era ali ng'oti njiibwa. Omutwe gwange n'enviiri dhange biboze n'omusulo.”

Omusaadha Omukazi

³ Mbaire mmaze okutoolamu ebivaalo byange, kabiri ndhiremu okuvaala? Mbaire mmaze okunaaba ku bigere, kabiri ndhiremu okubifuutuusa?

⁴ Omugonzi wange yaabisa omukono mu kituli eky'omu lwigi, omwoyo gwange gwampakukapakuka.

⁵ Naasituka okwiguliragho omugonzi wange, ng'amakono gange n'engalo dhange biri kutoonha ebizigo eby'akawoowo ka mirra, era ebizigo ebyo byatoonha ni ku munhololo ogw'olwigi.

⁶ Naiguliragho omugonzi wange, aye nga yaviiregho ira yaaja! Neegomba mpulireku ng'ayogera, era naamunoonia aye nga timubona. Naamweta aye nga tandhiramu.

⁷ Abakuumi bandhagaana nga bali kulawuna ekibuga, bankuba, bantaaku ebinuubule. Abakuumi b'ekibuga abo bantoolaku n'ekitambaala kye nali neeghembereire.

⁸ Imwe abaghala ab'e Yerusalemu, ndi kubakoba mulayire, muti bwe munaabona omugonzi wange, munaamunkobera muti ndwaire olw'okumugonza einho.

Abakazi

⁹ Mukazi iwe asinga obulungi mu bakazi boonaboona, omugonzi wo kiki ekimuleetera okuba ow'endhawulo ku bandi? Kiki ekimufuula ow'endhawulo einho, memale otulayize otyo?

Omukazi

¹⁰ Omugonzi wange anhirira era aboneka bulungi; mu bantu omutwalo omulamba (10,000), yenka n'abonekamu.

¹¹ Mu maiso ali ng'oti zaabu omukenenule, enviiri dhe dha mutere, ndhirugavu ng'oti ikoova.

¹² Amaiso ge gali ng'oti njiibwa edhiri gha nsulo edh'amaadhi, era nga enjiibwa edho badhinaaziiza n'amata, dhaatereera bukalamu.

¹³ Amatama ge gavaaku akawoowo ng'oti nimiro ya buwoowo bwa mere. Omunwa gwe guli ng'oti bimuli ebyetebwa liri, ebiri kutoonhologoka akawoowo ka mirra.

¹⁴ Amakono ge gaakolebwa bulungi ng'oti mpeta dha zaabu, edhaateebwaku amabaale ag'omughendo. Omubiri gwe mulungi ng'oti isanka lye baalimbyaku amabaale ag'omughendo ageetebwa saffiro.

¹⁵ Amagulu ge malungi ng'oti n'empango dhe baakola mu mabaale ag'omughendo agamirimiinha, ni badhita mu bikolo ebya zaabu. Era wa kitiibwa ng'oti n'ensozi edh'e Lebanoni, n'emiti gyaku emivule egyegombebwa.

¹⁶ By'ayogera biwooma okuwulirisa, era yeenayeena nga bw'ali ansanhusa. Imwe abaghala ab'e Yerusalemu, atyo bw'ali omugonzi, era oyo ni mukagwa wange.