Olwembo 3 - Baibuli Ekibono kya Katonda 2014

¹ Nga ndi ku buliri bwange obwire, naloota oyo ye ngonza, era naamunoonia, aye naaloba kumuzuula.

² Naakoba mule nti: “Ka nsituke nje ntambuletambule eyo mu kibuga, mu nguudo dhaakyo ni mu mpya dhaakyo, mmunoonie oyo ye ngonza.” Naamunoonia aye naaloba kumuzuula.

³ Abakuumi bandhagaana nga bali kulawuna ekibuga. Naababuuza nti: “Mumboneireku oyo ye ngonza?”

⁴ Aye mba naakamala okubabitaku nti, nga ndhagaana oyo ye ngonza. Naamugemerera, naaloba kumulekula, okutuusa bwe namutwala mu ndhu ya maama, mu kisenge kyenekyene eky'oyo eyanzaala.

⁵ Imwe abaghala ab'e Yerusalemu, ndi kubakoba mulayire empuuli n'empongo edh'omu nsiko, muti timwidha kutabulatabula waire okusiikuula okugonza kwaife, okutuusa nga ife beene twenze.

Olwembo olwokusatu Omukazi

⁶ Naani oyo ali kwidha ng'ava mu irungu, ng'ali ng'oti n'ekire eky'omwosi ekiri ng'oti mpango, nga bamusiize obuwoowo bwa mirra, baamuniokeza n'obubbaani, n'obuwoowo obwa buli nsambo abasuubuzi bwe batunda?

⁷ Bona, Solomoni n'ali kwidha nga bamubbeedeire mu kityamo kye. Abalwani ab'amaani nkaaga bamwezungulwire, abasingayo okuba ab'amaani mu Isiraeli.

⁸ Boonaboona bali n'empiima, era bakugu mu kulwana entalo. Buli muntu yeesibye empiima ye nga yeetegeike okulwana bwe bamulumba obwire.

⁹ Kyabazinga Solomoni yeekolera ekityamo kye, mu miti egy'e Lebanoni.

¹⁰ Empango dhaakyo yadhikola nga dha feeza, ekintu kye yeesiiraku yaakikola nga kya zaabu, ate ky'atyamaku nga kya langi ya nakasooma, era nga kyakolebwa abakazi ab'e Yerusalemu n'okugonza okungi einho.

¹¹ Imwe abaghala ab'e Sioni, mwidhe mubone kyabazinga Solomoni, ng'avaire ku mutwe engule inhina ye yamuvaaza, ku lunaku lwe yafumbirirwaku, olunaku olwo lwe yafuniraku eisanhu eritaloodheka.