Olwembo 2 - Baibuli Ekibono kya Katonda 2014

¹ Nze ndi kimuli kya mu nsiko eky'e Sharoni, ndi kimera ekyetebwa eky'omu biiko.

Omusaadha

² Ng'ekimuli ekyetebwa liri bwe kiboneekerera nga kiri mu mawa, n'omugonzi wange atyo bw'aboneekerera ng'ali mu bakazi baine.

Omukazi

³ Ng'omuti ogw'ebibala bwe guba n'omuganhulo okusinga emiti egindi egy'omu kibira, n'omugonzi wange atyo bw'abasinga basaadha baine. Nnhumirwa okutyama mu kinsense eky'omuti ogwo, era ebibala byagwo bimpoomera inho.

⁴ Yaanhingiza mu kisenge mwe baliira embaga, okugonza kwe yandaga kwaba ng'oti ni bendera gye bawuubira omuntu ow'ekitiibwa.

⁵ Mumpe ku mizabbibu emikalu ndyeku ndhiremu amaani, munkamulire ni ku bibala nhweku mpulire ku bulamu; kuba okugonza kwenda bwa kundhita bwite!

⁶ Omukono gwe omugooda aguziziike ghansi agh'omutwe gwange, ate omukono gwe omusaadha gungemereire.

⁷ Imwe abaghala ab'e Yerusalemu, ndi kubakoba mulayire empuuli n'empongo edh'omu nsiko, muti timwidha kutabulatabula, waire okusiikuula okugonza kwaife, okutuusa nga ife beene twenze.

Olwembo olwokubiri Omukazi

⁸ Ndi kuwulira amamiro ag'omugonzi wange! Bona ere, wuule. Ali kwidha ng'atuumiratuumira ku nsozi enene, era yaidha ng'adalandira ku busozi obutono.

⁹ Omugonzi wange ali ng'oti mpuuli, oba ng'oti mpongo nto. Bona ere, wuule ayemereire kuliya kw'endhu yaife. Ali kulengeza mu idinisa, yaabisa amaiso mu katimba kaamu.

¹⁰ Agho omugonzi wange yaayogera, yankoba ati: “Omugonzi wange, situka. Omulungi wange, idha tuje.

Omusaadha

¹¹ Bona, ebiseera eby'ekiinhogogo biwoireku, amaadhi galekeire okugwa gaajiire,

¹² era buti ebimuli biri buli ghantu. Ebiseera eby'okwemba bituuse, enjiibwa odhiwulira nga dhembera mu nsi yaife.

¹³ Emitiini gitooleire okubala, n'emizabbibu gimuliisa ebimuli, gyaleeta akawoowo. Omugonzi wange, situka. Omulungi wange, idha tuje.

¹⁴ Oli ng'oti njiibwa eyeegisiisa mu ntanda edheeyatisa mu lubaale, mu nkompe edhiri mu nsozi. Leka nkulingirireku mu maiso, kuba muboneka bulungi. Era leka mpulire ku mamiro go ng'oyogera, kuba gawooma okuwulirisa.

¹⁵ Mutugemere ebibe, ka bibe bito oba bikulu, ebyo ebyonoona amasamba gaife ag'emizabbibu; kuba emizabbibu gyaife gimuliisa ebimuli.”

Omukazi

¹⁶ Omugonzi wange oyo, wange, zeena ndi wuwe. Ayayira ebyayo bye mu bimuli ebyetebwa liri.

¹⁷ Omugonzi wange, kyuka oire, obe eno ng'oti n'empuuli oba empongo ento bw'eba mu nsozi edh'e Betheli, okutuusa obwire bwe bunaakya buli kazikiiza nga kaweereiregho irala.