Okwolekebwa 9 - Baibuli Ekibono kya Katonda 2014

¹ Malaika owokutaanu yaafuuwa eigwala lye. Naabona emuunienie eyava ghaigulu n'egwa ku nsi, yaagheebwa ekisumuluzo ekiigula olwina olutakoma.

² Emuunienie eyo yaigulagho olwina olwo, omwosi gwava mu lwina olwo ng'oti n'oguva mu luyiira olunene einho, gwaidhula mu mpewo mwonamwona n'endhuba yairugala.

³ Mu mwosi omwo mwavaamu enzige, dheeyugha ku nsi era dhaagheebwa obukumu ng'oti n'obwa siga ow'oku nsi.

⁴ Dhaaloberwa okwonayona eisubi, n'emiti oba ekimera ekindi kyonakyona, okutoolaku abantu abo bonka abaziraku kamanhiso ka Katonda mu byeni byaibwe.

⁵ Dhaaloberwa okubaita, aye dhibaleetere bwa bulumi okumala entangama ya myezi etaanu, era nga obulumi obwo buli ng'oti n'omuntu bw'awulira nga siga amulumye.

⁶ Era mu nnaku edho abantu balyagala okufa aye baaloba kukubona, balyegomba okufa aye okufa kwabeesamba.

⁷ Mu mboneka, enzige dhaali ng'oti n'embalaasi edhitegekeibwa okuja mu lutalo. Ku mitwe gyadho nga kuliku ebyaboneka ng'oti ngule dha zaabu mu maiso nga dhiboneka ng'oti bantu.

⁸ Obuviiri bwadho nga buli ng'oti nviiri dha bakazi, amaino nga gali ng'oti ga mpologoma.

⁹ Nga dhiri n'ebigalagamba ebiri ng'oti bivaalo bya mu kifuba ebyakolebwa mu kyuma ekigumu einho. Okupapala okw'amaghagha gaadho nga kuli ng'oti n'okupakalania okw'ebigaali eby'omu lutalo ebiri kamaala ebighaluzibwa embalaasi nga dheeyuna mu lutalo.

¹⁰ Dhaali n'emikira egiriku obuluma ng'oti siga, era ng'amaani gaadho ag'okuleetera abantu obulumi okumala emyezi etaanu gali mu mikira gyadho egyo.

¹¹ Dhaali ni kyabazinga waadho adhifuga nga ni malaika ow'olwina olutakoma. Eriina lye mu Luheburayi, ni Abaddoni, mu Lugureki Apolwoni (eritegeeza “Namuzisa?”).

¹² Eky'entiisa ekisooka kyaja kityo ate nga ekaaliyo bibiri ebiri kwidha.

¹³ Agho malaika owomukaaga yaafuuwa eigwala lye. Naawulira amamiro nga gava mu mayiga ana ag'alutaari eya zaabu eri mu maiso ga Katonda.

¹⁴ Amamiro ago gaakoba malaika owomukaaga eyali n'endeka gati: “Sibula bamalaika abana abaasibibwa ku mwiga omunene Eufurate.”

¹⁵ Agho bamalaika abana baasibululwa nga baategekebwa ira okwita omuntu mulala mulala ku buli bantu basatu ku saawa eyo, ku lunaku olwo, mu mwezi ogwo mu mwaka ogwo.

¹⁶ Abalwani ab'oku mbalaasi baali obukaire ebikumi bibiri (200,000,000), ogwo n'omughendo gwe nawulira.

¹⁷ Era nti bwe nabona embalaasi mu kubonekerwa kwange: abavuzi baadho baali bavaire ebivaalo eby'omu bifuba eby'ekyuma ebyali ebimyufu ng'oti muliro, ebya bbululu ng'oti ibaale lya saffiro, n'ebya kyenvu ng'oti bunhota bwa salufa. Emitwe gy'embalaasi edho gyali ng'oti gya mpologoma, mu kanwa mwadho nga muvaamu omuliro, n'omwosi, n'obunhota bwa salufa

¹⁸ Ebibamba bino ebisatu: omuliro, n'omwosi, n'obunhota bwa salufa, ebyavanga mu kanwa omw'embalaasi edho, byaita omuntu mulala mulala ku buli basatu.

¹⁹ Amaani ag'embalaasi edho gaadhiringa mu kanwa ni mu mikira. Emikira gyadho nga giri ng'oti misota, nga kuliku n'emitwe gye girumisa.

²⁰ Abantu abandi boonaboona, abataitibwa bibamba bino, baaloba kwenenia mu ebyo bye baakolanga: Baaloba kuleka okusinza emizimu emibi n'ebisinzibwa ebitali Katonda bye baakola mu zaabu, ni mu feeza, ni mu kyuma eky'ekikomo, ni mu mabaale, ni mu miti, ebitasobola kubona oba kuwulira oba kutambula.

²¹ Era baaloba okwenenia olw'obutemo bwaibwe, n'obulogo bwaibwe, n'obudankaanu bwaibwe, n'obwibi bwaibwe.