Okwolekebwa 7 - Baibuli Ekibono kya Katonda 2014

Abantu ba Katonda bateebwaku akamanhiso

¹ Ebyo bwe byawa, naabona bamalaika bana, nga beemereire ku nsonda eina edh'ensi, nga bagemereire empewo eina edh'ensi dhirobe kufuuwa ku nsi, ni ku nhandha, waire ku muti gwonagwona.

² Era naabona malaika owundi ng'ali kuniinaniina okuva e buvandhuba, ng'ali n'ekitaaku akamanhiso ka Katonda omulamu. Yaayeta n'amaani bamalaika abana abaali bagheereibwa obukumu okuzikiriza obukalu n'enhandha ku nsi.

³ Yaabakoba ati: “Mulobe kuzikiriza nsi, na nhandha, waire emiti, okutuusa nga tumaze okuta akamanhiso ku byeni by'abagheereza ba Katonda waife.”

⁴ Agho naawulira omughendo gw'abo abaateebwaku akamanhiso: Baali emitwalo ikumi n'ena n'enkumi ina (144,000), abaava mu buli kika ky'abantu ba Isiraeli.

⁵ Ab'omu kika kya Yuda abaateebwaku akamanhiso baali omutwalo mulala n'enkumi ibiri (12,000); ab'omu kika kya Reubeni omutwalo mulala n'enkumi ibiri (12,000); ab'omu kika kya Gadi omutwalo mulala n'enkumi ibiri (12,000);

⁶ ab'omu kika kya Asheri omutwalo mulala n'enkumi ibiri (12,000); ab'omu kika kya Nafutali omutwalo mulala n'enkumi ibiri (12,000); ab'omu kika kya Manasse omutwalo mulala n'enkumi ibiri (12,000);

⁷ ab'omu kika kya Simeoni omutwalo mulala n'enkumi ibiri (12,000); ab'omu kika kya Levi omutwalo mulala n'enkumi ibiri (12,000); ab'omu kika kya Issakari omutwalo mulala n'enkumi ibiri (12,000);

⁸ ab'omu kika kya Zebuluni omutwalo mulala n'enkumi ibiri (12,000); ab'omu kika kya Yosefu omutwalo mulala n'enkumi ibiri (12,000); n'ab'omu kika kya Benjamini boona omutwalo mulala n'enkumi ibiri (12,000).

Eikuukuubira mu igulu

⁹ Ebyo bwe byawa, naabona eikuukuubira ery'abantu abatabalika nga bava mu maghanga goonagoona, ni mu bika byonabyona, ni mu nse dh'abantu dhoonadhoona, ni mu nnimi dhoonadhoona. Baali nga beemereire gha mberi gh'ekityamo eky'obwakyabazinga, ni mu maiso ag'Entaama Ento, nga bavaire ebivaalo ebyeru era nga bagemye n'ensansa.

¹⁰ Baayasiikana bati: “Twalokolebwa Katonda waife atyaime ku kityamo eky'obwakyabazinga, era n'Entaama Ento!”

¹¹ Bamalaika boonaboona baayemerera nga beezungulwire ekityamo eky'obwakyabazinga era nga beezungulwire ab'obukumu n'ebitonde ebiramu ebina (4), beeyala gha mberi gh'ekityamo, nga balinze ghansi, baasinza Katonda,

¹² Nga bakoba bati: “Amiina. Okusinzibwa, okutiibwa, amagezi, okweyanzibwa, okusaakibwa, obukumu, n'amaani, bibenga bya Katonda waife ebyanda n'ebyanda! Amiina.”

¹³ Agho owundi ku bakulembeze yambuuza ati: “Abo abavaire ebivaalo ebyeru ni baani, era bava gha?”

¹⁴ Naamwiramu nti: “Isebo, niiwe oidhi.” Yankoba ati: “Abo n'abaabita mu kudaazibwadaazibwa okunene ni baamula ebivaalo byaibwe n'omusaayi ogw'Entaama Ento, ni bifuuka ebyeru.

¹⁵ Kyebava ni baba gha mberi gh'ekityamo kya Katonda, ni bamugheereza omusana n'obwire mu isinzizo lye. Era oyo atyaime ku kityamo eky'obwakyabazinga anaabanga nabo ng'abakuuma.

¹⁶ “Tibaliirayo kulumwa ndhala oba ndiwo. Endhuba teribookya waire olwota okubagema.

¹⁷ Entaama Ento eri ghagati gh'ekityamo ky'obwakyabazinga, enaabalabiriranga ng'omwayi, yaabakulemberamu, okubatuusa ku nsulo edh'amaadhi ag'obulamu. Era Katonda alyeya buli iziga mu maiso gaibwe.”