Okwolekebwa 5 - Baibuli Ekibono kya Katonda 2014

Enzingo y'ekitabo n'Entaama ento

¹ Naabona enzingo y'ekitabo mu mukono omusaadha ogw'oyo atyaime ku kityamo eky'obwakyabazinga, ng'eghandiikiibwa munda ni ku ngulu era ng'esibiibwaku n'obumanhiso musanvu.

² Era naabona malaika ow'amaani, yaabuuza n'amamiro ag'amaani ati: “Naani agwaine okukakampula obumanhiso obusibye enzingo y'ekitabo n'okugizingulula?”

³ Aye ghaabula naire omulala mu igulu oba ku nsi, waire ghansi mu bafu, asobola okuzingulula enzingo ey'ekitabo, waire okugisomamu.

⁴ Nze naalira inho amaziga okubona nga ghabuzeegho omuntu naire omulala ati, agwaine okuzingulula enzingo ey'ekitabo n'okugisomamu.

⁵ Agho owundi ku bakulembeze yankoba ati: “Otalira. Bona, oyo ayetebwa Empologoma, ow'omu ighanga lya Yuda, mwidhukulu wa Daudi yaghangula, era asobola okukakampula obumanhiso omusanvu, n'okuzingulula enzingo ey'ekitabo.”

⁶ Agho naabona Entaama Ento ng'eyemereire ghagati aghali ekityamo eky'obwakyabazinga, ng'eboneka ng'eyaitibwaku. Ebitonde ebiramu ebina (4) byali bigyezungulwire aghalala n'abakulembeze. Yali n'amayiga musanvu n'amaiso musanvu, nga n'egyo emyoyo omusanvu egya Katonda egitumibwa mu nsi yoonayoona.

⁷ Yaaja, yaatoola enzingo ey'ekitabo mu mukono omusaadha ogw'oyo atyaime ku kityamo eky'obwakyabazinga.

⁸ Bwe yakola ekyo, ebitonde ebiramu ebina (4) n'abakulembeze amakumi abiri n'abana (24), beeyala mu maiso ag'Entaama Ento. Buli mulala yali n'entongooli, n'ebibya ebya zaabu ebiidhwire obubbaani ng'okwo n'okusaba okw'abatuukirivu.

⁹ Baayemba olwembo oluyaaka, bati: “Ogwaine okutoola enzingo ey'ekitabo n'okukakampula obumanhiso obugisibye, kuba waitibwa era waanunulira Katonda abantu, aba kiisi kika, kiisi lulimi, kiisi luse, na kiisi ighanga.

¹⁰ Wabafuula obwakyabazinga era waabafuula bakabona ba Katonda waife ab'okufuga ku nsi.”

¹¹ Agho naabona era naawulira amamiro ga bamalaika, enkumi n'enkumi, obukaire n'obukaire, nga beezungulwire ekityamo eky'obwakyabazinga n'ebitonde ebiramu, n'abakulembeze.

¹² Baayogera n'amamiro ag'amaani bati: “Entaama Ento eyaitibwa egwaine okuba n'obukumu, n'obukombe, n'amagezi, n'amaani. Era egwaine okusaakibwa, okugheebwa ekitiisa, n'okusinzibwa!”

¹³ Era naawulira buli kitonde mu igulu, ni ku nsi, ni ghansi mu bafu, ni mu nhandha, byonabyona nga bikoba biti: “Oyo atyaime ku kityamo eky'obwakyabazinga era n'Entaama Ento, asaakibwe, agheebwe ekitiisa, asinzibwe, era abenga wa maani ebyanda n'ebyanda!”

¹⁴ Ebitonde ebiramu ebina (4) byakoba biti: “Amiina.” Era abakulembeze beeyala baasinza.