Okwolekebwa 4 - Baibuli Ekibono kya Katonda 2014

Okusinza okw'omu igulu

¹ Ebyo bwe byawa, naabona olwigi olwigule mu igulu. Era n'amamiro ge nali nsoose okuwuliraku agaali ng'oti ndeka gankoba gati: “Niina ghano, nkwoleke ebiri n'okubaagho oluvainhuma lwa bino.”

² Amangu ago Mwoyo yandidhaku, era naabona ekityamo eky'obwakyabazinga mu igulu nga kiriku akityaimeku.

³ Oyo eyali akityaimeku, emboneka ye, ng'amesunkana ng'amabaale ga yasipera ni sarudio. Musoke yali yeezungulwire ekityamo ekyo, nga amesunkana ng'oti n'eibaale lya semaragido.

⁴ Okwezungulula ekityamo eky'obwakyabazinga ekyo, ghaaligho ebityamo ebindi eby'obwakyabazinga amakumi abiri na bina (24), nga kutyaimeku abakulembeze amakumi abiri na bana nga bali mu bivaalo ebyeru, era bavaire engule edha zaabu ku mitwe.

⁵ Ku kityamo eky'obwakyabazinga ekyo nga kuvaaku okumyansa okw'eigulu, okududumuka, n'okutyabuka okw'olukuba. Emberi waakyo nga ghaligho ebisiki ebiri kwaka, era nga bino n'emyoyo omusanvu egya Katonda.

⁶ Emberi gh'ekityamo ekyo, nga ghaligho enhandha eri ng'oti kirawuli, era ng'ebitamu amaiso. Ate okwezungulula ekityamo ekyo, ku buli luuyi lwakyo, ng'eriyo ebitonde ebiramu bina, nga biidhwire amaiso emberi n'einhuma.

⁷ Ekitonde ekiramu ekisooka kyali kiri ng'oti mpologoma ekyokubiri nga kiri ng'oti nte nume ekyokusatu nga kyakula mu maiso ng'oti muntu ekyokuna nga kiri ng'oti nkookooma eri kuguluka.

⁸ Buli kirala ku bitonde ebiramu ebyo ebina nga kiri n'amaghagha mukaaga. Era nga ebitonde ebiramu ebyo biidhwire amaiso ku ngulu ni munda. Omusana n'obwire nga tibirekera kwemba biti: “Musengwa Katonda Aghanga Ebintu Byonabyona, mutukuvu, mutukuvu, era mutukuvu, n'eyaligho, n'aligho, era n'aliidha.”

⁹ Ebitonde ebiramu ebyo byaghanga ekitiisa oyo atyaime ku kityamo eky'obwakyabazinga omulamu ebyanda n'ebyanda, nga bimusaaka era nga bimweyanza. Bwe byabanga nga bikola bityo,

¹⁰ ng'abakulembeze amakumi abiri n'abana (24) beeyala mu maiso g'oyo atyaime ku kityamo eky'obwakyabazinga, baamusinza oyo omulamu ebyanda n'ebyanda. Era engule dhaibwe baadhiisa gha mberi gh'ekityamo nga bakoba bati:

¹¹ “Musengwa era Katonda waife, ogwaniire okugheebwa ekitiisa, okusaakibwa, era n'obukumu. Kuba niiwe watonda ebintu byonabyona, byatondebwa era byabaagho olw'okwenda kwo.”