Okwolekebwa 3 - Baibuli Ekibono kya Katonda 2014

Okughandiikira Ekikunsu eky'Abaikiriza eky'omu Sarudi

¹ “Ghandiikira malaika w'Ekikunsu eky'Abaikiriza mu Kurisito eky'e Sarudi, oti: oyo ali n'emyoyo omusanvu egya Katonda, n'emuunienie omusanvu, akoba ati: Ndidhi by'okola. Ndidhi ng'omanhiibwa okuba nga oli mulamu, ate ng'oli mufu.

² Zuuka, oyongere amaani mu ebyo ebikaasigairegho nga bikaali kufa, kuba mu by'okola tibonamu kituukiriire mu maiso ga Katonda wange.

³ “Kale idhukira bye wayegeresebwa ni bye wawulira, obigeme era weenenie. Bw'otaazuuke ndidha kwidha ng'omwibi, era tolimanha kaseera ke ndiidhiramu y'oli.

⁴ Aye mu Sarudi olimu n'abandi abatonotono abatayonoonanga bivaalo byaibwe: balitambula ninze mu bivaalo ebyeru kuba bagwaine.

⁵ Oyo aghangula, alivaazibwa ebivaalo ebyeru, era tirisasa liina lye mu kitabo kya bulamu, aye ndiryatula mu maiso ga Lata, n'aga bamalaika be.

⁶ Ali n'amatu, awulire Mwoyo by'akoba Ebikunsu eby'Abaikiriza mu Kurisito.

Okughandiikira Ekikunsu eky'Abaikiriza eky'omu Filadelufia

⁷ “Ghandiikira malaika ow'Ekikunsu eky'Abaikiriza mu Kurisito eky'e Filadelufia, oti: Oyo omutukuvu era ow'amazima, ali n'ekisumuluzo kya Daudi, aigulagho ni ghataba asobola kwigalagho, aigalagho ni ghataba asobola kwigulagho akoba ati:

⁸ Ndidhi by'okola. Bona, nakwiguliragho olwigi mu maiso go oluzira waire mulala asobola kulwigala. Ndidhi ng'oli n'amaani matono, aye weekalanguliire ku kibono kyange waaloba kuneegaana.

⁹ “Kale abo abeesoloza okusinza Sitaani, abeeyeta Abayudaaya ate nga ti Bayudaaya, aye nga baguya, ndibaleeta mu maiso go, baakuba amakiryaivu gha bigere byo, bamanhe bati nkugonza.

¹⁰ Olw'okuba waguminkiriza mu kudaazibwadaazibwa nga bwe nakulagira, ndidha kukuwonia ekiseera eky'okulebwa ekija okwidhira ensi yoonayoona okuleba abo abali ku nsi.

¹¹ Ndi kwidha mangu. Kalangula ky'oli nakyo ghalobe kubaagho akutwalaku kirabo kyo eky'obughanguzi.

¹² Oyo aghangula, ndimufuula empango mu isinzizo lya Katonda wange era talirivaamu. Ndimughandiikaku eriina lya Katonda wange, n'eriina ly'ekibuga kya Katonda wange Yerusalemu ekiyaaka ekiika nga kiva mu igulu ewa Katonda wange. Era ndimughandiikaku eriina lyange eiyaaka.

¹³ Ali n'amatu, awulire Mwoyo ky'akoba Ebikunsu eby'Abaikiriza mu Kurisito.

Okughandiikira Ekikunsu eky'Abaikiriza eky'omu Laodikea

¹⁴ “Ghandiikira malaika w'Ekikunsu eky'Abaikiriza mu Kurisito eky'e Laodikea, oti: Oyo oyetebwa Amiina, omudhulirwa omwesigwa, ow'amazima, era ensimuko y'ebyo Katonda bye yatonda, akoba ati:

¹⁵ Ndidhi by'okola. Ndidhi nga toli mwinhogovu oba omusu, nguli ni waliku kirala ku ebyo!

¹⁶ Aye kuba oli wa kiwozima, toli mwinhogovu ate toli musu, ndidha kukufuudha ere onve mu kanwa.

¹⁷ Okoba oti, ‘Ndi mukombe, ndi bukalamu, nzira kye ndhulirira’, waaloba kumanha ng'oli mughafu asaasirwa, omwavu, omutulu era ali ekidu.

¹⁸ “Kale nkugha amagezi onguleku zaabu alongooseibwa mu muliro osobole okuba omukombe, onguleku ebivaalo ebyeru ovaale owone ensoni edh'okubita ekidu, era onguleku obulezi obw'okusiiga ku maiso go oghange okubona.

¹⁹ “Nze abo be ngonza mbanenia era mbakangaivula. Kale fuba weenenie.

²⁰ Ndi ku lwigi nhemereire, nkonkona. Awulira amamiro gange n'aigulagho olwigi, ndingira omumwe naalya naye.

²¹ Oyo aghangula, ndimugha obukumu obw'okutyama ninze ku kityamo kyange eky'obwakyabazinga, nga zeena bwe naghangula ni ntyama ni Lata ku kityamo kye eky'obwakyabazinga.

²² Ali n'amatu, awulire Mwoyo ky'akoba Ebikunsu eby'Abaikiriza mu Kurisito.”