Okwolekebwa 20 - Baibuli Ekibono kya Katonda 2014

Emyaka olukumi

¹ Agho naabona malaika ng'aika ng'ava mu igulu, ng'agemye ekisumuluzo ky'olwina olutakoma, era ng'agemye n'oludhegere olunene.

² Yaagema ogusota ogunene ogw'eira ogumanhiibwa ng'Omukemi era Sitaani, yaagusibira emyaka lukumi (1,000) ku ludhegere,

³ yaagusuula mu lwina olwo yaigalagho. Yaataaku n'ekuufulu gulobe kwiramu kuguya maghanga, okutuusa emyaka olukumi (1,000) lwe giriwaaku. Egyo bwe giriwaaku, gwa kusibulwa okumala akaseera katono.

⁴ Agho naabona ebityamo eby'obwakyabazinga nga bityaimeku abo abaagheebwa obukumu okufuga. Era naabona emyoyo gy'abo abaatemwaku emitwe olw'okudhulira Yesu n'olw'ekibono kya Katonda. Abo n'abataasinza kisolo waire ekifaananie kyakyo era abataaganha kuteebwaku kamanhiso kaakyo mu byeni oba ku mikono. Abo bairamu okuba abalamu era Kurisito yaafuga nabo emyaka lukumi (1,000).

⁵ Okwo n'okuzuukira okwasooka. Abafu abandi tibairamu kuba balamu okutuusa emyaka olukumi (1,000) lwe gyawaaku.

⁶ Ba nkabi era batukuvu abazuukirira mu kuzuukira kuno okusooka. Abo, okufa okwokubiri kubaziraku bukumu, aye baliba bakabona ba Katonda era ba Kurisito era balifuga naye emyaka lukumi.

Okughangulwa kwa Sitaani

⁷ Emyaka egyo olukumi (1,000) nga gimaze okuwaaku Sitaani alisibulwa mu ikomera lye,

⁸ yaafuluma okuguya amaghanga agali ku nsonda eina edh'ensi edheetebwa Gogi ni Magogi. Alibasoloza okulwana nga bali bangi ng'omusenho gw'enhandha.

⁹ Balisaatuukira mu nsi yoonayoona, baazingiza enkambi y'abatuukirivu, n'ekibuga kya Katonda ekigonzi. Aye omuliro guliika nga guva mu igulu, gwabazikiriza

¹⁰ N'omukemi eyabaguya alisuulibwa mu nhandha ey'omuliro n'obunhota bwa salufa mwe balidaazibwadaazibwa omusana n'obwire, ebyanda n'ebyanda. Enhandha eyo n'eyasuulibwamu ekisolo n'omulanzi omuguya.

Okusala omusango okusembayo

¹¹ Agho naabona ekityamo eky'obwakyabazinga ekikologho, nga kyeru, era nga kiriku akityaimeku. Eigulu n'ensi byabulagho mu maiso ge obutairayo kubonekaku.

¹² Naabona abafu, abakulu n'abato, nga beemereire mu maiso g'ekityamo ekyo eky'obwakyabazinga. Ebitabo byawumbululwa. Era n'ekitabo ekindi kyawumbululwa, ekitabo eky'obulamu. Abafu baasalirwa omusango okuva ku bye baakola, ebyaghandiikibwa mu bitabo.

¹³ Enhandha yaaghaayo abafu abaagirimu. Okufa n'Amagombe byona byaghaayo abafu be byali nabo. Boonaboona baabasalira omusango ng'ebikolwa byaibwe bwe byali.

¹⁴ Agho Okufa n'Amagombe byasuulibwa mu nhandha ey'omuliro. Enhandha eyo ey'omuliro, n'okufa okwokubiri.

¹⁵ Era kiisi muntu eyayagaanibwa ng'eriina lye tiryaghandiikibwa mu kitabo kya bulamu, yaasuulibwa mu nhandha ey'omuliro.