Okwolekebwa 19 - Baibuli Ekibono kya Katonda 2014

¹ Ebyo bwe byawa, naawulira mu igulu ekyawulikika ng'oti mamiro ga maani ag'abantu olukunkumuli, nga bakoba bati: “Musaake Katonda waife! Kuba obulokozi n'ekitiisa n'obukumu bibye!

² Bw'asala omusango tasaliriza, aba mutuufu; kuba asaze omusango gwasinga malaaya omukulu eyayonoona ensi n'obwenzi bwe. Malaaya abonerezeibwa olw'okwita abagheereza ba Katonda.”

³ Kabiri baakoba bati: “Musaake Katonda waife! Omwosi oguva ku malaaya gwa kunioka ebyanda n'ebyanda.”

⁴ Abakulembeze amakumi abiri n'abana (24), n'ebitonde ebiramu ebina (4), beeyala era baasinza oyo atyaime ku kityamo eky'obwakyabazinga, nga bakoba bati: “Amiina. Musaake Katonda waife!”

Embaga ey'obugole ey'Entaama Ento

⁵ Era amamiro gaava gha kityamo eky'obwakyabazinga nga gakoba gati: “Musaake Katonda waife mwenamwena imwe abagheereza be abamutya, abakulu n'abato.”

⁶ Agho naawulira ekyali ng'oti mamiro ag'abantu olukunkumuli, oba ng'oti mpiriito ya maadhi, oba ng'oti kutyabuka kwa lukuba okw'amaani. Eiroboozi lyakoba liti: “Musaake Katonda, kuba Musengwa Katonda waife Aghanga Ebintu Byonabyona, n'afuga.

⁷ Tusangaale, tusagambe, tusaake ekitiisa kye, kuba embaga ey'obugole ey'Entaama Ento etuuse, omugole yeetegeike.

⁸ Omugole oyo aikiriziibwa okuvaala ebivaalo ebighegheevu, ebyamule era ebimirimiinha.” Ebivaalo ebighegheevu n'ebikolwa ebirungi eby'abatuukirivu.

⁹ Era yankoba ati: “Ghandiika oti: Ba nkabi abo abeeteibwa ku mbaga ey'obugole ey'Entaama Ento.” Kabiri yankoba ati: “Bino n'ebibono bya Katonda byenebyene.”

¹⁰ Agho neeyala gha bigere bye okumusinza. Aye yankoba ati: “Leka otageza kukola ekyo! Nze ndi mugheereza mwino ghalala ni baganda bo abadhulira Yesu. Katonda y'obe osinze.” Kuba amazima Yesu ge yatwoleka n'agagha abalanzi bye bakoba.

Okulwana okw'oku nkomerero

¹¹ Agho naabona eigulu nga liigule, era okuja okulinga nti nga mbona embalaasi endheru! Eyali ali kugivuga nga ayetebwa Mwesigwa, Owamazima, asala emisango era n'alwana entalo mu butuufu.

¹² Amaiso ge gaali gaaka ng'oti muliro, ate ku mutwe gwe nga kuliku engule kamaala. Era ng'aghandiikiibwaku eriina eritamanhiibwa muntu wundi okutoolaku mwene yenka.

¹³ Yali avaire ekivaalo ekiidhwire omusaayi. Eriina lye nga ni Kibono wa Katonda.

¹⁴ Amagye ag'omu igulu gaamunonereza, ng'abaisirukale bali kuvuga embalaasi endheru era nga bavaire ebivaalo ebyeru, ebyamule, era ebighegheevu.

¹⁵ Mu munwa gwe mwavaamu empiima endhogi ey'okughangula amaghanga. Aligafuga n'omwigo ogw'ekyuma, yaatyankirira emizabbibu mu kikunhiro mwavaamu omwenge ogw'obusungu obungi obwa Katonda Aghanga Ebintu Byonabyona.

¹⁶ Ku kivaalo kye ni ku kiteege kye nga kughandiikiibwaku eriina liti: “Kyabazinga wa bakyabazinga era Musengwa w'abasengwa.”

¹⁷ Agho naabona malaika ng'ayemereire ku ndhuba. Yaayeta n'amaani enhonhi dhoonadhoona edhiguluka nga dheeruupye eyo mu igulu, ati: “Mwidhe mwesololeze ku mbaga ya Katonda enkologho.

¹⁸ Mwidhe mulye emirambo gya bakyabazinga, n'egy'abakulu b'abaisirukale, n'egy'abasaadha ab'amaani, n'egy'embalaasi, n'egy'abadhivuga, n'egy'abantu boonaboona, ab'eidembe n'abairu, abakulu n'abato.”

¹⁹ Agho naabona ekisolo ni bakyabazinga ab'oku nsi n'amagye gaibwe, nga bakungaine okulwanisa oyo atyaime ku mbalaasi n'eigye lye.

²⁰ Ekisolo kyagemebwa ghalala n'omulanzi omuguya eyakola ebyewuunhio mu maiso gaakyo. Ebyewuunhio ebyo bye yakozesa okuguya abo abaaganha okuteebwaku akamanhiso k'ekisolo era n'okusinza ekifaananie kyakyo. Ekisolo ekyo ghalala n'omulanzi omuguya, bombi baasuulibwa mu nhandha ey'omuliro n'obunhota bwa salufa nga balamu.

²¹ Abaasigalagho baitibwa n'empiima eyava mu munwa gw'oyo atyaime ku mbalaasi. Enhonhi dhoonadhoona dhaalya dhaafundeera emirambo gyaibwe.