Okwolekebwa 18 - Baibuli Ekibono kya Katonda 2014

Okuzikirira kwa Babiloni

¹ Ebyo bwe byawa, naabona malaika owundi ng'aika ng'ava mu igulu, ng'ali n'obuyinza obutaloodheka. Ekitiisa kye kyamulisa ensi yoonayoona.

² Yaayogera n'eiroboozi ery'amaani ati: “Agwire, agwire Babiloni omukologho! Afuuse kifo omwesololeza emizimu emibi egya buli nsambo, na kiisi nhonhi mbi etali nongoofu.

³ Kuba amaghanga goonagoona gaatamiira omwenge ogw'obwenzi bwe. Bakyabazinga ab'oku nsi baayenda naye, n'abasuubuzi ab'oku nsi bakombaghalira ku kwedhalabya kwe okungi.”

⁴ Era naawulira amamiro agandi agava mu igulu nga gakoba gati: “Bantu bange, mumuveemu, mulobe kweyimba mu bibi bye, na kugabana ku bibamba bye;

⁵ kuba emungo ey'ebibi bye etuukira irala ku igulu, ni Katonda aidhi ebyonoono bye.

⁶ Mumukole nga mwene bwe yabakola, ate ku bikolwa bye mumwesasuuzeemu emikuzi ebiri. Ekikopo kye yabatabulira imwe, mukimutabuliremu obuka bwa mikuzi ebiri.

⁷ Ye yakomya okwesaaka n'okwedhalabya, mwena ye mube mukomye okumudaaza n'okumuliza enaku; kuba yeesuuta mu mwoyo ati: ‘Ninze kyabazinga omukazi, tiri namwandu, era tirimanha bughafu naire.’

⁸ Ebibamba bye kye biriva bimwidhira ku lunaku olulala, endwaire ya kawumpuli, obughafu, n'endhala. Era alyokebwa omuliro, kuba Musengwa Katonda ali kumusalira omusango okumusinga wa maani.”

⁹ Bakyabazinga ab'ensi abaayendanga naye era ni beedhalabyanga bwe balibona omwosi ng'ali kuya, balimulirira era baagegenga.

¹⁰ Balyemerera ghalaku olw'okutya okudaagadaaga kwe, baakoba bati: “Okagwireku, okagwireku iwe Babiloni ekibuga ekikologho! Iwe ekibuga eky'amaani! Ozikiriziibwa mu saawa busaawa eti!”

¹¹ Abasuubuzi b'ebintu ab'oku nsi balirira era baagegenga kuba ghaliba nga ghazira agula bintu byaibwe.

¹² Nga ghazira agula zaabu, feeza, binhere, bikomo bya mabaale ga mughendo, ngoye mpegheevu edh'ebitiibwa edha nakasooma n'edha liiri n'edha kasaayisaayi, waire okubaagho agula ekintu eky'omuti ogwa kawoowo, oba eky'eisanka, oba eky'omuti ogw'omughendo, oba eky'ekyuma eky'ekikomo, oba eky'ekyuma ekigumu einho, oba eky'amabaale ag'omughendo agamirimiinha.

¹³ Era nga ghazira agula buwoowo, na birungo, na bubbaani, na muzigo ogwa kawoowo ogwetebwa mirra. Era nga ghazira agula mwenge gwa mizabbibu, na muzigo gwa bibala bya miti myoliva, na buwunga buseereibwa bukalamu, na ngaano, waire okugula ente n'entaama, embalaasi n'ebigaali eby'omu lutalo, oba okugula abairu n'obulamu bw'abantu.

¹⁴ Balimukoba bati: “Ebirungi byonabyona bye weegombanga okufuna bizikiriire. Eby'obukombe byonabyona n'eby'ekitiisa bikuwoireku, era tokairayo kubibonaku kabiri!”

¹⁵ Abasuubuzi b'ebintu ebyo be yakombaghaza, balyemerera ghala olw'okutya okudaagadaaga kwe, baalira era baagegenga,

¹⁶ nga bakoba bati: “Okagwireku! Okagwireku iwe ekibuga ekikologho, eyavaalanga ebivaalo ebighegheevu eby'ebitiibwa ebya nakasooma n'ebya kasaayisaayi; ng'otoonha zaabu n'ebinhere, n'ebikomo eby'amabaale ag'omughendo.

¹⁷ Mu saawa busaawa eti ofiiriirwa eby'obukombe ebyo byonabyona!” N'abakulu ab'amaato, n'abakozi ab'oku maato, n'abantu be bawungula, n'abo boonaboona abakola ku nhandha, balyemerera ghala.

¹⁸ Bwe balibona omwosi ng'ali kuya baliwowoigana bati: “Ghaali ghabaireghooku ekibuga ekikologho ng'oti ni kino.”

¹⁹ Era balyeyugha enkungu mu mitwe, baalira era baagegenga nga bakoba bati: “Okagwireku! Okagwireku, iwe ekibuga ekikologho, ekyakombaghaliramu abo boonaboona abaali n'amaato ku nhandha! Mu saawa busaawa eti kizikiriire!

²⁰ Imwe mwenamwena abali mu igulu musagambe, kuba azikiriziibwa! N'imwe abatuukirivu, n'abatume, n'abalanzi musagambe! Kuba Katonda amusaliire omusango gwamusinga olw'ebyo bye yabakola.”

²¹ Agho naabona malaika ow'amaani, yaaginga eibaale eriri ng'oti lubengo lukologho, yalisuula mu nhandha ng'akoba ati: “Babiloni ekibuga ekikologho kityo bwe kirisuulibwa ghansi n'amaani amangi, ni kitairayo kuboneka kabiri.

²² Enhembo edh'abakubi b'entongooli, n'edh'abembi, n'edh'abafuuyi b'endere, n'ab'endeka, tidhiriirayo kuwulirwa mu iwe. Mu iwe timulyagaanibwamu kabiri mukozi mukugu wa mulimo gwonagwona, waire okusa kw'olubengo okwirayo okuwulikika.

²³ Okumulika okw'entaala tikuliirayo kabiri kuboneka mu iwe, waire amamiro ag'oyo abayiiza omugole oba ag'omugole mwene, okwirayo okuwulirwa mu iwe. Abaasuubuliranga mu iwe abaali abakologho ku nsi wabaguya, n'amaghanga goonagoona wagaguyanga n'obulogo bwo.”

²⁴ Mu oyo n'omwayagaanibwa omusaayi ogw'abalanzi, n'ogw'abatuukirivu, n'ogwa abantu boonaboona abaitibwa ku nsi.