Okwolekebwa 17 - Baibuli Ekibono kya Katonda 2014

Malaaya omukulu

¹ Agho owundi ku bamalaika omusanvu abaali n'ebibya omusanvu, yaidha yankoba ati: “Idha nkulage omusango bwe gusalirwa malaaya omukulu atyaime okumpi n'amaadhi amangi.

² Bakyabazinga ab'ensi baayenda naye, n'abantu abali ku nsi baatamiira omwenge ogw'obwenzi bwe.”

³ Agho mu Mwoyo, malaika yantwala mu irungu, naabona omukazi ng'atyaime ku kisolo ekya kasaayisaayi. Kyali kiidhwire amaina agavuma Katonda, era nga kiri n'emitwe musanvu, n'amayiga ikumi.

⁴ Omukazi oyo yali avaire ebivaalo eby'ebitiibwa ebya nakasooma n'ebimyufu, ng'ali kutoonha zaabu, n'ebinhere, n'ebikomo eby'amabaale ag'omughendo einho. Yali agemye ekikopo kya zaabu nga kiidhwire ebyenhinhalwa n'eikoodera eby'obwenzi bwe.

⁵ Mu kyeni kye mwali mughandiikiibwamu eriina ery'amakulu amagise liti: “Babiloni omukologho, azaala bamalaaya n'ebyenhinhalwa eby'oku nsi.”

⁶ Naabona ng'omukazi atamiire omusaayi gw'abatuukirivu, n'ogw'abo abaitibwa olw'okudhulira Yesu. Bwe namubona, neewuunhia inho!

⁷ Aye malaika yankoba ati: “Weewuunhia ki? Ka nkukobere amakulu amagise ag'omukazi oyo, n'ag'ekisolo ky'ali kuvuga, ekiri n'emitwe omusanvu n'amayiga eikumi.

⁸ Ekisolo ky'oboine kyaligho, aye mperaano tikikaaligho. Aye kiidha kuniinaniina okuva mu lwina olutakoma, kije kizikirizibwe. Abantu abali ku nsi, beene maina agataaghandiikibwa mu kitabo eky'obulamu, okuva ensi lwe yatondebwa, balyewuunhia bwe balibona ng'ekisolo ekyaligho, mperaano tikikaaligho, ate nga kiriidha.

⁹ “Kino kyetaagisa amagezi n'okutegeera. Emitwe omusanvu, n'ensozi omusanvu omukazi dh'atyaimeku

¹⁰ era ni bakyabazinga omusanvu. Abataanu ku abo baagwa, mulala akaaligho, owundi akaali kwidha. Era bw'aliidha, ateekwa kumalagho bwa kaseera buseera.

¹¹ Ate ekisolo ekyaligho aye mperaano ekitakaaligho, kitegeeza kyabazinga owomunaana, owundi ku bale omusanvu era aja okuzikirizibwa.

¹² Ate amayiga eikumi g'oboine, gategeeza bakyabazinga eikumi abakaali kufuna bwakyabazinga. Aye abo ghalala n'ekisolo balifuna obwakyabazinga baafugiraku esaawa ndala.

¹³ Bano baisa kirala, era baagha ekisolo obukumu bwaibwe n'okufuga kwaibwe.

¹⁴ Balirwanisa Entaama Ento aye eribaghangula ng'eri ghalala n'abo abaginonereza be yayeta, be yalondamu era abeesigwa; kuba Entaama Ento eyo ni Musengwa w'abasengwa era ni Kyabazinga wa bakyabazinga.”

¹⁵ Malaika era yankoba ati: “Amaadhi g'oboine malaaya g'atyaimeku, n'abo enkunkumuli edh'abantu, aba kiisi kika, kiisi lulimi, na kiisi ighanga.

¹⁶ Ate amayiga g'oboine, balyeyimba n'ekisolo baafuuka bazigu ba malaaya. Baja kumweya bamuleke kidu, bamulye emamba era bamwokere irala omuliro

¹⁷ kuba Katonda yabaleetera mu myoyo gyaibwe, okukola kye yategeka nga baisa kirala, baagha ekisolo obukumu bwaibwe n'okufuga kwaibwe, okutuusa ebibono bya Katonda lwe birituukirira.

¹⁸ Ate omukazi y'oboine, n'ekibuga ekikologho ekifuga bakyabazinga ab'ensi.”