Okwolekebwa 16 - Baibuli Ekibono kya Katonda 2014

Ebibya eby'obusungu bwa Katonda

¹ Agho naawulira amamiro ag'amaani nga gava mu isinzizo, gaakoba bamalaika omusanvu gati: “Muje muyughe ku nsi ebibya omusanvu eby'obusungu bwa Katonda.”

² Malaika asooka yaaja, yaayugha ekibya kye ku nsi. Amabwa amanene era amabi einho gaagema abantu abaaliku akamanhiso k'ekisolo n'abo abaasinza ekifaananie kyakyo.

³ Malaika owokubiri yaayugha ekibya mu nhandha. Enhandha yaafuuka ng'oti n'omusaayi ogw'omuntu omufu era kiisi kiramu kyonakyona ekyali mu nhandha kyafa.

⁴ Malaika owokusatu yaayugha ekibya kye mu miiga ni mu nsulo edh'amaadhi. Emiiga n'ensulo ebyo byafuuka musaayi.

⁵ Naawulira malaika ali n'obukumu ku maadhi ng'akoba ati: “Iwe omutukuvu aligho era eyaligho, bw'osala omusango tosaliriza.

⁶ Olw'okuba abantu baayugha omusaayi okw'abatuukirivu bo n'ogw'abalanzi, weena ky'oviire obagha omusaayi okunhwa. Ekyo kye bagwaine!”

⁷ Era naawulira amamiro nga gava ku alutaari, nga gakoba gati: “N'agh'agho Musengwa Katonda Aghanga Ebintu Byonabyona, bw'osala omusango tosaliriza era oba mutuufu.”

⁸ Malaika owokuna yaayugha ekibya kye ku ndhuba, era endhuba eyo yaikirizibwa okwokya abantu n'omuliro gwayo ogw'amaani.

⁹ Abantu baayokebwa n'omuliro ogw'amaani einho, baavuma eriina lya Katonda ali n'obuyinza ku bibamba ebyo, era baaloba kwenenia na kumusaaka.

¹⁰ Malaika owokutaanu yaayugha ekibya kye ku kityamo eky'obwakyabazinga eky'ekisolo. Obwakyabazinga bwakyo bwagema enzikiiza, abantu beerumaluma enimi olw'obulumi,

¹¹ baavuma Katonda ow'eigulu olw'okubaleetera obulumi n'amabwa era baaloba kwenenia ebyo bye baakolanga.

¹² Malaika owomukaaga yaayugha ekibya kye mu mwiga omunene Eufurate gwakala, okulekera bakyabazinga abava e buvandhuba engira.

¹³ Naabona emizimu emibi esatu egyaboneka ng'oti bikere, nga giva mu kanwa omw'ogusota, ni mu kanwa omw'ekisolo, ni mu kanwa omw'omulanzi omuguya.

¹⁴ N'egyo emizimu emibi egikola ebyewuunhio egija eyo ye bakyabazinga ab'ensi yoonayoona okubasoloza, batanule olutalo ku lunaku olukologho olwa Katonda Aghanga Ebintu Byonabyona.

¹⁵ “Bona, ndidha kwidha ng'omwibi! Wa nkabi oyo asigala ng'ali kumoga, n'akuuma ebivaalo bye, alobe kutambula madu, na kuswala mu bantu.”

¹⁶ Emizimu emibi egyo gyasololeza bakyabazinga mu kifo ekyetebwa Arimageddo mu Luheburayi.

¹⁷ Malaika owomusanvu yaayugha ekibya kye mu ibbanga. Amamiro ag'amaani gaava ku kityamo eky'obwakyabazinga mu isinzizo, nga gakoba gati: “Biwoire!”

¹⁸ Agho ghaabaagho okumyansa okw'eigulu, n'okududumuka, n'okutyabuka okw'olukuba, n'ensi okutengeeta. Bino byali tibibangaghooku kasookanga abantu batondebwa ku nsi.

¹⁹ Ekibuga ekikologho kyayabikamu ebitundu bisatu, n'ebibuga eby'ensi dhoonadhoona byagwa. Katonda yaaloba kwerabira Babiloni ekibuga ekikologho, yaakigha okunhwa okumaliramu irala ekikopo eky'omwenge ogw'emizabbibu, omwenge ogw'obusungu bwe obungi.

²⁰ Ebizinga byonabyona byasaanagho, n'ensozi dhaawaagho.

²¹ Amabaale ag'omugozi amakologho, nga buli ibaale lizitogha kilo ng'oti makumi ataanu (50), gaava mu igulu gaamagala ku bantu. Abantu baavuma Katonda olw'ekibamba eky'omugozi, kuba kyali kibamba kya ntiisa inho.