Okwolekebwa 14 - Baibuli Ekibono kya Katonda 2014

Entaama Ento n'abantu baayo

¹ Ebyo bwe byawa naabona Entaama Ento ng'eyemereire ku lusozi Sioni, ng'eri n'abantu emitwalo ikumi n'ena n'enkumi ina (144,000) era ng'eriina lyayo n'erya Lata waayo gaghandiikiibwa mu byeni by'abantu abo.

² Ate naawulira amamiro agava mu igulu nga gali ng'oti mpiriito ya maadhi, era nga gali ng'oti kutyabuka kwa lukuba. Amamiro ago ge nawulira gaali ng'oti bakubi ba ntongooli nga bali kukuba entongooli dhaibwe.

³ Baayemba olwembo mu maiso ag'ekityamo eky'obwakyabazinga, n'ag'ebitonde ebiramu ebina (4), n'ag'abakulembeze. Olwembo olwo nga luyaaka era nga ghazira wundi asobola kulwega, okutoolaku abo bonka emitwalo eikumi n'ena n'enkumi eina (144,000), abaali bamaze okununulwa mu nsi.

⁴ N'abo abatukuvu abateeyonoona na bakazi, baasigala nga beegha. N'abo abanonereza Entaama Ento buli y'eja era abaanunulwa mu bantu, baaba ng'oti bibala ebisooka okukungulwa ebigheebwayo eri Katonda n'eri Entaama Ento.

⁵ Tiboogerangaku bya kusubagha era baziraku kibi kyonakyona.

Bamalaika abasatu

⁶ Agho naabona malaika owundi ng'ali kuguluka, nga yeeruupye eyo mu igulu. Yali agheereibwa amawulire amalungi ag'ebyanda n'ebyanda agakobere abo abali ku nsi aba kiisi kika, aba kiisi lulimi, aba kiisi luse n'aba kiisi ighanga.

⁷ Yaayogera n'amamiro ag'amaani ati: “Mutyenga Katonda mumusaake, kuba ekiseera kye eky'okusaliramu omusango kituuse. Mumusinze oyo eyatonda eigulu n'ensi, n'enhandha, n'ensulo.”

⁸ “Ni malaika owundi owokubiri yairaku ng'akoba ati: Agwire, agwire Babiloni omukologho, eyanhwesa amaghanga goonagoona omwenge ogw'obutwa ogw'obwenzi bwe!”

⁹ Malaika owundi owokusatu yairirira bale ababiri ng'ayogera n'amamiro ag'amaani ati: “Kiisi muntu asinza ekisolo n'ekifaananie kyakyo, n'aganha okuteebwaku akamanhiso kaakyo mu kyeni oba ku mukono,

¹⁰ yeena alinhwa omwenge ogw'emizabbibu ogw'obusungu bwa Katonda, nga gufukiibwa mu kikopo eky'obusungu bwe era nga tigudhuuluusiibwamu naire. Era alidaazibwadaazibwa n'omuliro n'obunhota bwa salufa, mu maiso ga bamalaika abatukuvu n'ag'Entaama Ento.

¹¹ Omwosi ogw'okudaazibwadaazibwa kwaibwe gwa kunioka ebyanda n'ebyanda. Era abasinza ekisolo n'ekifaananie kyakyo, na kiisi yeenayeena eyateebwaku akamanhiso k'eriina lyakyo, tibaligheeraku omusana n'obwire.”

¹² Agho ni abo abatuukirivu abagema ebiragiro bya Katonda, ni basigala nga baikiriza Yesu, bateekwa okuguminkiriza.

¹³ Naawulira amamiro agava mu igulu nga gakoba gati: Ghandiika oti: “Okuva ni buti ba nkabi abafu abafiira mu Musengwa! Mwoyo akoba ati: Bwenebwene ba nkabi! Okuva ni buti bawuumwire mu kutakabana kwaibwe, kuba ebikolwa byaibwe bibanonereza.”

Okukungula

¹⁴ Agho naabona ekire ekyeru, era nga ku kire okwo kutyaimeku afaanana ng'oti mwana wa muntu. Ng'ali n'engule ya zaabu ku mutwe, n'omuwolo omwogi mu ngalo.

¹⁵ Agho malaika owundi yaava mu isinzizo yaalangiriza n'amamiro ag'amaani y'ole atyaime ku kire ati: “Kozesa omuwolo gwo owoobye, ekiseera eky'okukungula kituuse kuba ebikungulwa eby'ensi bituuse.”

¹⁶ Agho ole atyaime ku kire yaawuuba omuwolo gwe ku nsi, eby'oku nsi byakungulwa.

¹⁷ Malaika owundi yaava mu isinzizo ery'omu igulu, yeena ng'ali n'omuwolo omwogi.

¹⁸ Agho malaika owundi ali n'obukumu ku muliro yaava ku alutaari. Yaayeta n'amaani ng'akoba ole ali n'omuwolo omwogi ati: “Kozesa omuwolo gwo okungule ebifaaganda eby'emizabbibu egy'oku nsi, kuba emizabbibu gyaku gyenze.”

¹⁹ Agho malaika yaawuuba omuwolo gwe ku nsi, yaakungula emizabbibu gyayo, yaagisuula mu ikunhiro eikologho ery'omwenge gw'emizabbibu ery'obusungu bwa Katonda.

²⁰ Emizabbibu gyakunhirwa mu ikunhiro kuliya kw'ekibuga, mwavaamu omusaayi gwakuuluula ng'amagulu ag'embalaasi eyemereire gabuliramu, gwakuuluula kilo mita ng'ebikumi bisatu (300).