Okwolekebwa 13 - Baibuli Ekibono kya Katonda 2014

Ebisolo ebibiri

¹ Agho naabona ekisolo ekikukunuka mu nhandha. Kyali n'emitwe musanvu n'amayiga ikumi; ku buli iyiga nga kuliku engule ate ku buli mutwe nga kuliku eriina erivuma Katonda.

² Ekisolo ekyo kye nabona kyali kiboneka ng'oti mpala. Ebigere byakyo nga biri ng'oti n'eby'ekisolo ekikambwe, ate omunwa gwakyo nga guli ng'oti gwa mpologoma. Ogusota gwagha ekisolo ekyo amaani gaagwo, n'ekityamo kyagwo ky'obwakyabazinga, n'obuyinza bungi.

³ Ku mutwe ogundi ku gy'ekisolo kwali kuboneka ng'oti kuliku eibwa nga lyakukiita. Aye eibwa eryo lyawona. Ensi yoonayoona yeewuunhia era yaanonereza ekisolo ekyo.

⁴ Abantu baasinza ogusota kuba gwagha ekisolo obuyinza bwagwo, baasinza n'ekisolo nga bakoba bati: “Naani ali ng'oti n'ekisolo kino, era naani asobola okulwana nakyo?”

⁵ Ekisolo kyagheebwa omunwa, kyesaakasaaka era kyavuma Katonda era kyaikirizibwa okuba n'obuyinza okumala emyezi amakumi ana n'ebiri (42).

⁶ Kyainhama okuvuma Katonda, n'okuvuma eriina lye, n'ekifo mw'aba, n'abo boonaboona ababa mu igulu.

⁷ Era kyaikirizibwa okutanula olutalo ku batuukirivu era n'okubaghangula, era kyagheebwa obuyinza ku bika byonabyona, ni ku nse dhoonadhoona, ni ku nnimi dhoonadhoona ni ku maghanga goonagoona.

⁸ Abantu ab'oku nsi abo abataaghandiikibwa mu kitabo kya bulamu ng'ensi ekaali kutondebwa, balisinza ekisolo ekyo. Ekitabo ekyo kya Ntaama Nto ere eyaitibwa.

⁹ Ali n'amatu awulire.

¹⁰ Kiisi muntu eyategekerwa okunhagibwa, alitwalibwa mu bunhage. Era kiisi muntu eyategekerwa okwitibwa empiima, alifa mpiima. Agho ni abatuukirivu bateekwa okuba n'okwikiriza era n'okuguminkiriza.

¹¹ Agho naabona ekisolo ekindi nga kikukunuka mu itaka. Kyali n'amayiga abiri ng'oti ga ntaama nto era nga kyogera ng'oti gusota.

¹² Kyakozesa obuyinza bwonabwona obw'ekisolo ekyasooka, nga n'ekisolo ekyasooka kyene kyona kirigho kiri kubona. Kyakaka ensi yoonayoona n'ebigirimu okusinza ekisolo ekyasooka, ekyawona eibwa eryali ery'okukiita.

¹³ Ekisolo kino ekyokubiri kyakola ebyewuunhio kyatoola omuliro gwene mu igulu kyagumagaza ku nsi ng'abantu boonaboona babona.

¹⁴ Kyaguya abantu ab'oku nsi n'ebyewuunhio bye kyaikirizibwa okukola mu maiso ag'ekisolo ekyasooka. Kyabalagira okukola ekifaananie eky'ekisolo ekyo ekyateebwaku eibwa n'empiima aye ni kimala kirama.

¹⁵ Kyaikirizibwa okuta obulamu mu kifaananie ekyo, ekifaananie ekyo kisobole n'okwogera, era kiite boonaboona abaloba okukisinza.

¹⁶ Ekisolo kyakaka abantu boonaboona, abato n'abakulu, abakombe n'abaavu, ab'eidembe n'abairu, okuteebwaku akamanhiso ku mukono omusaadha oba mu kyeni.

¹⁷ Kiisi muntu yaaloberwa okugula oba okutunda, okutoolaku ng'amaze okuteebwaku akamanhiso ako, ako nga n'eriina ery'ekisolo oba omughendo.

¹⁸ Kino kyetaagisa magezi: ow'amagezi yeekalirise amakulu ag'omughendo ogw'ekisolo ekyo, kuba gutegeeza liina lya muntu. Omughendo gw'ekisolo ekyo, guli lukaaga na nkaaga na mukaaga (666).